Yesù gooma bɔɔ rìi dèu ɛ̀rɛ̀nzhɛ̀n dzuà faagoo fa reè tsɛ
12
1 Àyìwà, tà shɔ̀ùn, Yesù yè e maa è goomaa è ka gooma bɔɔ ì ɲàn. À ci: «Kpiri sɔn na ɛ̀rɛ̀nzhɛ̀n dzu wɔɔ, è kɛ̀yngɛ kun, à y'à ka à laguru. È kɔ̀ɔ̀ ɲɛɛn, ɛ̀rɛ̀nzhɛɛ̀n nà vùr'la min niì, à yuà yè bo. È sangaso ji, à kplatsuubaa rèè nà bà ni min niì, y'à kààwɔɔ̀. Tà shɔ̀ùn è dzùà kɛ̀ɛ̀yfa to faagoofadzin neè swey mà, è dɔ̀n bè jìì gbààn na.
2 Tɔ̀ùn, ɛ̀rɛ̀nzhɛɛ̀n nàu wɔ, è re faagoofadzian soo ka ɛ̀rɛ̀nzhɛ̀n dzuà faagoo fa reè rè, yè bà ni à raa nìn ɛ̀rɛ̀nzhɛɛ̀n sìn.
3 Tɔ̀ faagoofadzian bèu wɔ min niì, ɛ̀rɛ̀nzhɛ̀n dzuà faagoo fa reè y'à kun y'à ban, y'à sixɔɔma baji be.
4 È sèè kɔn, è faagoofadzin kpɛrɛ ka è re. Yè tɔ̀ sa kun kɔn y'à ban e kuùn fɔ y'à mɛ̀ɲɛ̀n, y'à ɲɛ̀n.
5 È soo kpɛrɛ ka kɔn. Tɔ̀un, yè tɔ̀ vu. È giri kpɛ̀rɛ̀kuru ì ka è re, yè swey ban è ɲan, yè swey vu.
6 Àwà, è to dzùtsià dzin kpiri soo pee dòònun, à tɔ̀ niì kɛ̀niɔ̀n fɔ è bè geren. À lataan, è tɔ̀ ka è re, è dzin ci: "È kpɛ̀yn nà blà wɔ mun dzin kpir'la ɲàn."
7 Dzùà faagoo fa reè dzùtsià dzin kpir'la jàu min niì, yè dzin e si ra ci: "À shɛnsenbaà rìì yɛ nèe, y'a wa m'a vu, shɛɛ̀n yè bà mùn naa."
8 Yè dzùtsià dzin kpir'la kun tɔ̀un y'à vu, y'à geren maa dzùà bònè.»
9 Àwà, dzùtsià nà fee rìì fa tɔ̀un ? À nà nà, è twɛy faagoo fa reè sapɛ vu, è dzùà sìn mòò kpɛrɛ ì rà.
10 Nèe gooma riì yɛ Ŋaablà re Goomaa doùn, ye na tɔ̀ kàràn gbɛ ? À sɛbɛɔ̀n ci: "Gbà ji reè kpàà riì maaŋ, tɔ̀ rii nàu sèè è bà gbàà nɔ̀nkɔ̀n kpaa, nìi ni kpàà dzyee reè sapɛ jɔɔn.
11 Tɔ bou Tsìfaà rìì ɲàn, è bà kabagoo ɲe jaa ra."»
12 Àyìwà, Yesù dziu twɛy gooma reè dè min niì, Dzyèèsìbee mòdzin neè jɔɔndzin neè yè e maa yè jaa gaa, ci ye nà à kun, kàtsu è na à tɔ̀ ci Yesù nèe gooma bɔɔ rèe dè siɔ̀n ye rìì là. Ŋà yè shi jàmaà jɔɔn, y'à bàto mɔn, yè bèe.
Faridziɲɛn rèè myɛ̀ɛ̀n ɲɛun Yesù jɔɔn min niì kɔnsɔɔn goo ka
13 Tɔ̀un, yè Faridziɲɛn rèè swey, ko màsà kpiri Erodzì kpɛyn dzin neè swey ka à kpɛyn, gè riì ni à to twɛy yè bè myɛ̀ɛ̀n ɲɛn à jɔɔn, y'à kun e dzugoomaa ka.
14 Twɛy bèu wɔ, yè dzin à ra ci: «Kàrànfaà, ɲe y'à tɔ̀ ci wo sààbeen rìì dèe, wo na mòò jaadzin siɛ̀n. Mòdzian sapɛ soo wo re, wo to Ŋaabla shià kàr'na mòdzian nà sààben tsɛ. Àwà ɲe nà wo tey goo soo ra, kɔnsɔɔn yè sàrà Ɔ̀rɔmùn màsà kpiri blàa rè, tɔ dàaŋnà ràà, à na dàaŋnà ? Mùn wù mùn y'a sìn naà, mun na wù mùn y'a sìn ?»
15 Yesù yè è re duungoofiibeè tɔ̀ nìi fa, è dzin è ra ci: «Feera ye yè bà mun dzuun bomà gaa ? Ye nà ko ɲɛɛn tanman soo ka n kɔ m'a siin.»
16 Twɛy yè nà tɔ̀ ka. Tɔ̀un, à yè è tey ci: «Tsì rii ɲɛyn ko à tsoo ni tanman ree tsɛ ?» È ci à ra ci: «À Ɔ̀rɔmùn màsà kpiri blàa rìì.»
17 Yesù ci è ra tɔ̀un ci: «Nìi Ɔ̀rɔmùn màsà kpiri blàa raa gè rèè ye twɛy sìn tɔ̀ ra, nìi to Ŋaa raa rèè, ye twɛy sìn tɔ̀ sa ra.» Yesù rè goò yè ji è dzii tsɛ fɔ è bè geren.
Yesù nìi dèu fùn nèè sèè kpunan goo tsɛ
18 Àyìwà, tà shɔ̀ùn Sadzusiɲɛn rèè swey yè nà à kpɛyn. Sadzusiɲɛn rèè rìì ci fùn nèè fa sèè kpunan waa. Tà doùn, twɛy y'à tey. È ci:
19 «Kàrànfaà, kɛɛra Musà rè tàworataà doùn, à nèe gooma ree sɛbɛn tou mùn ne, nìi yɛ ci: "Kpir'la sɔn ye san è re tààn to, è mà bà dzin tàraɔ̀ waa, tseyn kpiri ye ba ni à re, tɔ wù è tàan rèe sen, gè riì ni à to è dzin tàrà à ka, tɔ̀ yeè bà à tsìnà kpir'la tsu.
20 Àwà, keresima ɲɛɛ̀nun na ni, jɔ̀naà tàan seun, è san, à na dzin tàrà tàan rèe ka, nìi nà bà à tsu waa.
21 Fiiraa sa yeè tàan rèe sen, è san, à na dzin tàrà à ka waa. Nìi zhììgìraa, tɔ̀ sa raà yè kun tɔ̀ tsuru.
22 È ɲɛ̀ɛ̀nuàn sapɛ yeè bè dò, è pɛn na dzin tàrà tàan rèe ka waa. È sapɛ shɔùn, taàn sa yeè nà san.
23 Àwà, fùn nèè to ye na sèè kpunan ɔn, tàan rèe nà bà tsì rii soo raa è ɲan sa ? È ɲɛ̀ɛ̀nuàn sapɛ to y'à bà jàu e re tààn.»
24 Yesù yè dzin è ra tɔ̀un ci: «Ye fìriɔ̀, ŋà ye na à kùn tɔ̀ waa. À kùàn nì yɛ, ye na Ŋaablà re Goomaa dzin seunà, ye to na à re dzibaabee tsu tɔ.
25 Àwà, fùn nèè ye na sèè kpunan, kpiri fa tàan furu, tàan tsu to fa sìn kpir'la. È nà bà ni a ci jìrànxɔ rɔ̀n mɛ̀rɛ̀kɛ rèè.
26 Nìi fùn nèè raa sèè kpunan goo, ye na tɔ̀ kàràn kɛɛra Musà rè tàworataà doùn gbɛ ? Gɔ̀ɔ̀kùìrii tsuunmaà goo deò min niì kɛ̀ ? À deò ci Ŋaabla dziun Musà rà mɔn ci: "Mun Ibraximà rè Ŋaablà, ko Ishakà rè Ŋaablà, ko Yàkubà rè Ŋaablà."
27 Tà doùn, Ŋaablà na fun ì rè Ŋaablà waa, à jaama reè raa rìì. Ye fìriɔ̀ fɔ è bè geren.
Yesù ci Ŋaablà dzugooma xɔù niì blà dzyee rèè sapɛ ma
28 Àyìwà, Yesù tɔ̀ kaangoo riì jiu ko Sadzusiɲɛn rèè ka, Sàrìyà kaamoo sɔn toro jiumaà tɔ̀ ɲan, à y'à jà è latsiu'n kuru wùbeu. Tɔ̀un, è kpɛrɛ̀ Yesù rà, à y'à tey ci: «Ŋaablà dzugooma xɔù rèè sapɛ ɲan, kɛ̀n ni ni jɔɔn ?»
29 Yesù yè dzin à ra ci: «Ŋaablà dzugooma xɔù rìi ni dzyee rèè sapɛ jɔɔn, tɔ̀ rii siin. "A toro wɔ Isirayɛlì, mùn Tsìfa Ŋaablà rii Tsìfa soo pee.
30 A naà à kɛ̀n kɛ̀n'n kur'la sapɛ. À goò yè bà ni a vunun tsɛ, è bà ni a xɔɔn tsɛ, a kɛsɛmàà sapɛ yeè bà ni à tsɛ, a goò kun a faan sapɛ ka."
31 À fiiraa yè bà yɛ nèe ci: "A modzìnsia kɛ̀n jàci a yɛr'la." Ŋaablà dzugooma xɔù rèè sapɛ ɲan, pɛn na blà twɛy rìì mà waa.»
32 Sàrìyà kaamoo yè dzin Yesù rà tɔ̀un ci: «À wùbeu Kàrànfaà ! Wo dzin nìi fau ci à soo pe, ci kpɛrɛkuru na ni à tɛ̀y, wo sààben deu.
33 E Ŋaablà kɛn kɛ̀n'n kur'la sapɛ, à goò yè bà ni a vunun tsɛ, a kɛsɛmàà yè bà ni à tsɛ, a goò kun a faan sapɛ ka, tà shɔ̀ùn a modzìnsia kɛ̀n jàci a yɛr'la, saaka dzu kpaankɔɔn reè, ko saaka dzyee bokɔɔn reè pɛn na ni tɔ̀ rii jɔɔn waa.»
34 Àwà, Yesù y'à jàu min niì ci à wò re goomaa latsiu ko akiri ka, è dzin à ra ci: «Wo ko Ŋaablà re màsàbee ɲàn dɔ̀ɔ̀ fi na gbàn waa.» Tà shɔ̀ùn, mòò pɛn kùùn naà xɔ, è Yesù tey goo sɔn pɛn mà dɛ.
Yesù nìi dèu Ŋaablà Jaa ra Moò ko Ŋaablà fia tsɛ
35 Àwà è Yesù to mòdzian kàr'nà nà Ŋaablà re gbà blàa fɔɔn rè, è tey fa ci: «Feera sàrìyà kaamoo reè yè bà dziàn, ci Ŋaablà Jaara Moò màsà kpiri Dawudà tsua dzin ?
36 Màsà kpiri Dawudà yɛ̀r'la to dziun Ŋaablà re Dzi Fɛnɛɛ baraka rɔ̀n ci: "Mùn Tsìfa Ŋaabla dziun mun Tsìfaà rà ci: Nà a tsuù n sirama si jaa rè, fɔ min bè a ɲan rèè sapɛ wɔ a san dzuun."
37 Màsà kpiri Dawudà yɛ̀r'la ye ba Ŋaablà Jaara Moò kir'là ci wò Tsìfa ɔ, à to bàa dzùrù, è bà à tsua dzin kɔn ?» Jàma brìsià toro wɔumaà Yesù rè, à re gooma reè myɛ̀nkɔɔn na dzibeò è ra fɔ è bè geren.»
Yesù nìi dèu Sàrìyà kaamoo reè juɔ tsɛ
38 À re kàr'nà doùn, à na dziàn è ra ci: «Ye e yɛrɛ kaàwɔ sàrìyà kaamoo reè rà. Nìi dzi è ra, yè e ɲantsyeere beè mɛ̀yɛ bla bla reè ka e ma, mòdzian yè è tsɔ̀ beè blàbèma jàmà gane reè ɲàn.
39 È ba Ŋaa blabe gba rèè doùn, tsùùma nìì reè ni jɔɔn, è gaa twɛy rìì là. Mòò to ye è kiri e re jaaravi ɲwɛyn na, è ye be wɔ, è gaa tsùùma rèè sapɛ ɲan wùù reè rìì là.
40 È fùnshɔ̀ùntaan rèè màniɛ̀n, yè è suun gee sapɛ tsi è ra. Tɔ̀un, yè ba Ŋaablà mafyɛ̀ɛn, è tɔ̀ fa toò rìì fur'lu, yè tɔ̀ ka e juɔ mà mɛnɛn mòdzian mà. Àwà, kitsi riì nà mɛɛy è tsɛ, tsìɛ̀ sii sèè, tɔ nà xɔbe e si fɔ è bè geren.
Yesù nìi dèu fùnshɔ̀ùntaan gbakɔɔn rè goò tsɛ
41 Àwà, tà shɔ̀ùn, mòdzian ɲɛyn niì reè sìan Ŋaablà ra kɔ̀ì ge, è tɔ̀ jia gè nìi doùn Ŋaablà re gbà blàa doùn, Yesù yè bè e tsuù è jaa kere tɔ̀ ra, è mòdzian ɲɛyn jikɔɔn kààwɔɔ̀. Gètsi rèè giri na ɲɛyn giri jia.
42 Tà doùn, fùnshɔ̀ùntaan gbakɔɔn sɔn sa yeè nà, tɔ̀ yeè ɲɛɛn myɛ̀yn fii ji. Tɔ̀ naà gereon tanman soo tsuru tsɛ waa.
43 Yesù yè e re kàràndzin neè kiri kpɛ̀rɛ̀ e ra tɔ̀un, è dzin è ra ci: «Sààben na mun nì ci e ra, nèe fùnshɔ̀ùntaan gbakɔɔn ree ɲɛyn giri jiu, è geren dzyee rèè sapɛ tsɛ.
44 Àwà, nìi dzyee rèè, twɛy sapɛ yeè e raa rèè tsɛ mɔn'na nì jiu. Ŋà fùnshɔ̀ùntaan gbakɔɔn, tɔ̀ yeè e shɛɛ̀n sapɛ rii jiu, arì pɛn tsu na ni à re è bà ni ɲwɛyn ɲɔn dɛ.»