Kàràndzin neè nàu fɔn Yesù fùàn nà min niì kɔ̀ɔ̀ doùn
20
1 Àyìwà, shikuan jisee jɔnaa gbishɛɛ̀mà mur'lɔn, Mariyamùn Màngàdàràkà taàn yè bè fùn kɔɔ rà. Tɔ̀ y'a tàrà dzɔɔ̀n naà viɔ̀ waa. À wɔumaà mɔn, à y'à jà kpàà brisi rìi na ka fùn kɔɔ tsyeeŋna, tɔ bou dziɛ̀ rà.
2 Tɔ̀un, è vwɛ̀ɛ̀y be, è b'a jaa dè Shimɔn Piyɛr'là, tà ko kàràndzin niì goo na dzi Yesù rà. À ci è ra ci: «È Tsìfaà sen bou fùn kɔɔ doùn, ɲe to na à tɔ̀, y'à jiɔ̀ min niì waa.»
3 Piyɛrì ko tɔ̀ kàràndzian tɔ̀ goomaa myɛ̀un min niì, è fiɛ̀ sa yeè bo tɔ̀un, yè dɔ̀n be fùn kɔɔ rà.
4 È fiɛ̀ sa na vwɛ̀ɛ̀y beè e si re, ŋà tɔ̀ kàràndzian ɲantabeu Piyɛrì mà, tɔ̀ jɔ̀na yeè wɔ fùn kɔɔ rà.
5 À bèu wɔ, è mɛɲɛn è siin fa kɔ̀ɔ̀ doùn, è kasangee tsùuŋma jà, à na dɔn waa.
6 Shimɔn Piyɛrì nìi na gbaɔn à kpɛyn, tɔ̀ sa yeè nà wɔ. A wɔu, è dɔ̀n kɔ̀ɔ̀ doùn. Tɔ̀un, è kasangee tsùuŋma jà.
7 Vya nìi na ka Yesù kùngɔɔ̀ miniɔ̀n, è tɔ̀ sa ja, à miniɔ̀n e miniun'n kur'la rà, è bà tsùuŋnà e si, e tsuùma nɔ̀n.
8 Tà doùn, kàràndzin niì jɔ̀na wɔu kɔ̀ɔ̀ rà, tɔ̀ sa yeè dɔ̀n, à y'à jà, è ɲɛn à ra.
9 È bè wɔ fɔ tɔ̀ watsia mà, gooma niì na sɛbɛɔ̀n Ŋaablà re Goomaa doùn, ci à wù Yesù yè sèè kpunan bo fùn nèè fi, è akiri naà tɔ̀ jaɔ̀ ŋe waa.
10 Tà shɔ̀ùn, kàràndzin fiɛ̀ yè e kpɛyn sèè e re tsii.
11 Àwà, Mariyamùn, tɔ̀ na tsìiŋnà kɔ̀ɔ̀ tɛyn da rɔ̀n, è bà gɛɛ. À gɛɛykɔɔn tà tsuru, è nà e mɛɲɛn, è siin fa be kɔ̀ɔ̀ doùn.
12 Tɔ̀un, è mɛ̀rɛ̀kɛ fii tsùuŋma jà, mɛ̀yɛ̀ fyɛ ni twɛy mà. Yesù fùàn na ɲɛɔ̀n min niì, mɛ̀rɛ̀kɛɛ̀ soo na ni à kùngɔɔ̀ tsùùmaà kpàkèrè, soo yè bà ni à sàn nèè tsùùmaà kpàkèrè.
13 Mɛ̀rɛ̀kɛ rèè yè dzin à ra ci: «Tàan, wo gɛɛ feera ?»
Mariyamùn yè dzin ci: «È mun Tsìfaà sen bou, mun to na a tɔ̀, y'à jiɔ̀ min niì waa.»
14 À ni tɔ̀ dèè rà, è jaa kere e bonè, è Yesù tsìiŋma jà, ŋà, à naà à tɔ̀ ci à wò rii waa.
15 Yesù y'à tey ci: «N neema taan, wo gɛɛ feera ? Wo tsì rii gaa ?»
Mariyamùn na à siɛ̀n, ci à tɔ̀ gɔ̀ɔ̀ gane lamɔ̀nɔunma wùɔ faagoofabaà nìi fa, è dzin ci: «N neema kpiri, wo rìì ye ba à seòn, e ba beò à ji min niì, à dè n na, min b'a sen.»
16 Yesù y'à kiri ci: «Mariyamùn !»
Mariyamùn yè e jaa kere à kpàkèrè, è dzin jaa soo Dzyèèsìbee mòdzin neè rè kungoòmàà ɲàn nèe tsuru ci: «Ràbunì !» (Nìi dzuɔn ci <Kàrànfaà>.)
17 Yesù yè dzin à ra ci: «Maà n kun tsìì to waa, kàtsu mun na teyn be Fà Ŋaablà kpakèrè ŋe waa. Bè neema karàndzin neè rìì kpɛyn, e bè dzin è ra, ci mun ci mun tèyn beè n Faà rè, è bà ye sa Fa. Ɔ̀ɔn, ci mun tèyn beè n ne Ŋaablà re, ye sa re Ŋaablà.»
18 Tɔ̀un, Mariyamùn Màngàdàràkà taàn sa yeè bè dzin kàràndzin neè rà ci wo Tsìfaà jàu. Yesù nìi dèu à ra, è tɔ̀ jaa dè kàràndzin neè rà.
Yesù yè e yɛrɛ kpadèu e re kàràndzin neè rà min niì
19 Awà, tɔ̀ shikuan jisee jɔna soo yɛ̀r'la ɲɛ̀rɛɛ̀ rɔ̀n, kàràndzin neè na e ladzyèeŋnà gbà sɔn doùn. È na tɔ̀ gbàà dzii rèè sapɛ sooŋnà e ma, dzyèèsìbee mòdzin neè jɔɔndzin neè jɔɔn shiɲaanbeè kamà. Tɔ̀un, Yesù yè nà bàràma bo è fi. À tsìiŋmaà, è dzin è ra ci: «Ŋaa yè xɛɛrɛ fa e re.»
20 Tɔ̀ dèumaà shɔ̀ùn Yesù rè, è si rèè ko e gaakaa kpàdè è ra. Yesù jàumaà kàràndzin neè rè, tɔ̀ yeè è taama dzibe, fɔ è bè geren.
21 Àwà, Yesù yè dzin è ra e shɔùn ci: «Ŋaa yè xɛɛrɛ fa e re. Mun Fà Ŋaabla mun ka nau nìi tsuru, mun sa ye kaà tà tsuru.»
22 À tɔ̀ dèu min niì, è dzu ŋɔ̀ɔ̀n fyɛ ji è tsɛ, è dzin è ra ci: «Ŋaablà re Dzi Fɛnɛɛ yè to e re.
23 Ye ye mòò o moò raa gooɲaan tsii mɛɛy bo tɔ̀ vu ra, tɔ mɛɛy bou taki rii. Ye to ma mòò o moò raa mɛɛy bo tɔ̀ vu ra, à ni tsuù à vu ra.»
24 Kàràndzin teeŋ fiɛ̀ ɲàn, nìi tsoo ci Tomà, yè bà à kir'là sa, ci fìrìkàmaa, Yesù nà bwey rɔ̀n gbàà doùn, tɔ̀ naà ni ko è ka waa.
25 Kàràndzìn dzyee reè yè nà dzin à ra tɔ̀un ci: «Ɲe Tsìfaà jàu.»
Ŋà, Tomà yè dzin è ra ci: «Myɛ̀ɛ̀n nìì reè ka à gbaun, mun ma tɔ̀ fyɛ̀ɛ̀ jà à sitaa rèè doùn, min siiniɛn wɔ è fyɛ̀ɛ̀ shɔ̀ùn, mun to mà n sià wɔ à gaakaa vɔ̀ tsɔ̀maà rè fyeu, mun fa ɲɛn à ra waa.»
26 Àwà, shikun soo tà shɔ̀ùn, kàràndzin neè na e ladzyèeŋnà kɔn yeu gbàà doùn, Tomà sa yeè bà ni è ka tɔ̀un. Gbàà dzii rèè sòoŋmaà, Yesù yè nà, è nà e tsiì è fi, è dzin è ra ci: «Ŋaa yè xɛɛrɛ fa e re.»
27 Tà shɔ̀ùn, è dzin Tomà nà ci: «Tomà, nà a siiniɛn ka, e nà à wɔ n sià kɔ̀ɔ̀ rè a siin. Nà a sià ka, e nà à wɔ n gaakaa rè. Maà bà mòdzin, nìi na ɲɛɔ̀n Ŋaablà ra waa, to e bà ɲɛɔ̀n à ra.»
28 Tomà yè dzin à ra ci: «Mun Tsìfaà, mun ne Ŋaablà.»
29 Yesù yè dzin à ra ci: «Wo mun jàu nìi fa, tɔ̀ rii wo ɲɛun mun na. Nìì reè na mun jaɔ̀ waa, è to ɲɛun mun na, twɛy raa wùbeu.»
30 Àwà, Yesù tàànmàshɛn kabagooma giri kpɛ̀rɛ̀kuru ì fau e re kàràndzin neè jaa ra, nìì reè gooma na deò nèe kìtaabu rèe doùn waa.
31 Ŋà, nìì reè gooma deò, twɛy sɛbɛɔ̀n rìì, sànko ye ɲɛn à ra, ci Yesù rìì Ŋaablà Jaara Modzìàn, Ŋaablà Dzin Kpir'la. A to ye ɲɛn à ra, wo jaamabe dziɔ̀ tàrau à tsoò baraka rɔ̀n.