Jean 19

1 Àyìwà, Pilatsì yè dzin tɔ̀un, ci Yesù yè kun, è dɔrɔ sɛɛn ka.

2 Kaadzin neè yè daà tsyɛ tɔ̀un, y'à minin e si ra, a ci màsà baanfla, y'à kuu Yesù kùùn. Yè màsà mɛ̀yɛ̀ blà xe sɔn sa dɔrɔ à vu ra.

3 Yè e kpɛr'la à ra, yè dziàn à ra ci: «Dzyèèsìbee mòdzin neè rè màsà kpir'là, tswɛ̀y yɛ a re !»

Yè sitaa dɔr'là à tààkuùn.

4 Pilatsì yè bo kɔn kpɛrɛ, è dzin jàmaà nà ci: «Àwà, mun nà bo na à ka da rɔ̀n mìin, ye bà à tɔ̀, ci mun na kùn pɛn jaɔ̀, nìi dzia bà kitsi mɛɛy kùn kpir'lee tsɛ waa.»

5 Yesù yè bo na da rɔ̀n tɔ̀ rii ɲàn, daa baanflaa ni à kùùn, mɛ̀yɛ̀ blà xee yè bà ni à mà. Pilatsì yè dzin è ra ci: «Kpir'la yɛ nèe !»

6 Saaka jɔɔndzin neè, ko gbà blàa kplatsuu reè jaa dziu ɲɛn Yesù mà min niì, yè e maa, yè sɛ̀ɛ fààn na ci: «È gban gɔɔ̀ rà, è gban gɔɔ̀ rà !»

Pilatsì yè dzin è ra ci: «Ye yɛ̀r'leè yè b'a ka, ye b'a gban gɔɔ̀ rà, kàtsu mun na kùn pɛn jàa, nìi dzia bà kitsi mɛɛy kùn à tsɛ waa.»

7 Yè dzin Pilatsì rà ci: «Sàrìya ni ɲe re, nìi y'à kpàdèe, ci à wù è vu, kàtsu, à ci wo Ŋaablà Dzin Kpir'la.»

8 Pilatsì toro jiu twɛy gooma reè ɲàn min niì, è shi kɔn fɔ è bè geren.

9 È sèè dɔ̀n Yesù ka jàmààntsì gbaà doùn, à y'à tey ci: «Wo boo min ?»

Ŋà, Yesù na à re goomaa latsi waa.

10 Pilatsì yè dzin à ra tɔ̀ rii ɲàn ci: «Wo y'à mɛnshɛ̀ɛn mun nì mà ɔ̀n ? Wo na à tɔ̀, à dzi ni mun na min wo bàji, à dzi yeè bà ni mun na sa, mun y'à to wo yè gban gɔɔ̀ rà ɔ̀ ?»

11 Yesù yè dzin à ra ci: «A ye wo re dzi ja mun tsɛ, Ŋaablà rii y'à sìɔn wo ra, tà boshɔ̀ùn, wo re dzi pɛn na ni mun tsɛ waa. Tɔ̀ kamà, mòò riì mun wɔɔ wo suun, tɔ̀ raa gooɲaan nì blà, è geren wo raà tsɛ.»

12 È sen tɔ̀ watsia rà, Pilatsì yè e maa è jaa gaa, wo nà Yesù bàji nìi tsuru. Ŋà, Dzyèèsìbee mòdzin neè yè e maa, yè sɛ̀ɛ fààn na ci: «Wo ye nèe kpir'lee bàji, wo na Ɔ̀rɔmùn màsà kpiri blàa dzunwɛynsi dɛ ! Mòò o moò ci wo màsa, tɔ Ɔ̀rɔmùn màsà kpiri blàa ɲan nì.»

13 Àwà, Pilatsì twɛy gooma reè myɛ̀un min niì, è Yesù bo da rɔ̀n kɔn. Jàmààntsì gbaà gàne sɔn na ni, à dzɔɔ̀n lamɔ̀nɔɔ̀n wùù ko kpàa ka, Dzyèèsìbee mòdzin neè rè kungoòmàà ɲàn, è na tɔ̀ gàneè kir'là <Gàbatà>. Awà, Pilatsì yè nà e tsuù e re kitsikun'na tsùùràgee tsɛ tɔ̀ gàne rɔ̀n.

14 Geren n tsɛɛ̀ sɛr'là goo rèè na ni sààn. Tɔ̀un, bwèè tar'la màgba, Pilatsì yè dzin dzyèèsìbee mòdzin neè rà, ci: «E re màsà kpir'là yɛ nèe !»

15 Ŋà, yè e maa yè sɛ̀ɛ fààn na ci: «È vu, è vu ! È gban gɔɔ̀ rà !»

Pilatsì yè dzin è ra ci: «Min ye re màsà kpir'là gban gɔɔ̀ rà ɔ̀ ?»

Saaka jɔɔndzin neè yè dzin ci: «Màsa kpɛrɛ na ni ɲe re Ɔ̀rɔmùn màsà kpiri blàa tɛ̀y waa.»

È Yesù gbaun gɔɔ̀ rà min niì

16 Àwà, Pilatsì lataan yè nà Yesù wɔ kaadzin neè suun, ci yè b'a gban gɔɔ̀ rà.

Yè Yesù kun tɔ̀un, yè dɔ̀n be à ka.

17 Àwà, Yesù nà gban gɔ̀ɔ nìi rà, y'à to à yɛ̀r'la yè tɔ̀ sen. Yè bo à ka wɔ̀ɔ̀ doùn tɔ̀ rii ɲàn, yè b'a ka gàne sɔn ɲan, tɔ kir'là ci kùngɔ̀ xɔɔ̀ gàneè. Dzyèèsìbee mòdzin neè rè kungoòmàà ɲàn y'à kir'là Gɔligotà.

18 Kaadzin neè Yesù gbaun gɔɔ̀ rà mɔn nì. Yè mòkun fii kpɛrɛ ì sa gban à tɔnmà e raa gɔɔ ì rà, à yè bà ni è shiɲaanfi.

19 Pilatsì yè sɛbɛndzin sa fa, tɔ̀ yeè gban Yesù raa gɔɔ̀ rà. A na sɛbɛɔ̀n nèe tsuru ci: "Nazarɛtsika kpiri Yesù, Dzyèèsìbee mòdzin neè rè màsà kpir'là".

20 Dzyèèsìbee mòdzin neè giri yè tɔ̀ sɛbɛndzian kàràn, kàtsu Yesù na gbaɔn min niì, tɔ̀ dàn naà gbàn wɔ̀ɔ̀ rà waa. È giri yè dzi à kàràn sa, kàtsu sɛbɛndzin nee na faɔ̀ Dzyèèsìbee mòdzin neè rè kungoòmàà ɲàn, ko kungoòmà sɔn ɲan, nìi kir'là Latɛn goòmàà, è bà faɔ̀ Gɛrɛki goòmàà ɲàn.

21 Saaka jɔɔndzin neè yè dzin Pilatsì rà tɔ̀un ci: «À na wù w'a sɛbɛn ci: "Dzyèèsìbee mòdzin neè rè màsà kpir'là" waa. Ŋà, à wù w'a sɛbɛn, ci: "Kpir'lee ci wo dzyèèsìbee mòdzin neè rè màsà kpiri".»

22 Pilatsì yè dzin è ra ci: «Mun ye nìi sɛbɛn, mun tɔ̀ sɛbɛun nì.»

È Yesù rè vya rèè tanaun min niì

23 Kaadzin neè Yesù gban dòu gɔɔ̀ rà watsi riì bwèy, y'à re vya rèè sen, yè twɛy tanan tananmà nààlen, è soo sookɔɔn sa ko e raa. Y'à re mɛ̀yɛ blaa sa sen, jimà pɛn na ni tɔ̀ ra waa, à myɛɔ̀n vya fa soo, è sen jìran nɔ̀n, è nà fɔ dzɔn nɔ̀n.

24 Kaadzin neè yè dzin e si ra ci: «E maà à to mìn mɛ̀yɛ bla ree vyɛ̀ waa, mìn kaan ji à ra, è ba wù è sìn mòò riì rà, mùn nà tɔ̀ tsìfa tɔ̀.»

Gooma sɔn na dè dɔɔ̀n bɔrɔɔ Ŋaablà re Goomaa doùn. Nèe faumaà y'à to, tɔ̀ goomaa yè bo e shi tsɛ, nìi yɛ nèe ci:

È mun ne vya rèè tanaun e si ra,

mun ne mɛ̀yɛ blaa, yè kaan ji tɔ̀ ra.

Kaadzin neè tɔ̀ rii fau.

Nìì reè na tsìiŋnà Yesù gbaàn gɔɔ̀ tɛyn

25 Tɔ̀ y'a tàrà, Yesù gbaàn gɔɔ̀ tɛyn, à naà tsìiŋma ni, à naà neema taan ni. Kpiri sɔn, ci Klopasì, tɔ̀ raa tààn Mariyamùn ni, Mariyamùn Màngàdàràkà taàn yè ɲɛn è tsɛ.

26 Tɔ̀un, Yesù yè to gɔɔ̀ rà mɔn, è naà jà. À re kàràndzin neè ɲàn, à nìi kɛ̀niɔ̀n, tɔ ni à naà tɛyn. Yesù yè dzin e naà nà ci: «Naà, nèe rìì bà a dzin kpir'la dòònun.»

27 Tà shɔ̀ùn, è dzin tɔ kàràndzian nà ci: «Nèe kun a na dòònun.»

È sen tɔ̀ watsia rà, tɔ̀ kàràndzian yè Yesù na Mariyamùn sen tsuù e re tsii.

Yesù yè e xɔn bou min niì

28 Tà shɔ̀ùn, Yesù y'à tɔ̀, ci goò sapɛ dzii tsyɛun nìi fa, è nèe gooma ree dè, ci: «Mìnoò ni mun na.»

Tɔ̀ dèumaà yè Ŋaablà re Goomaa doùn gooma deuma bɔrɔɔ sɔn bo e shi tsɛ.

29 Tsyɛn sɔn na ni mɔn, tɔ tsyɛɔ̀n mììnge kùunmaà nà. Yè fu sɔn sen tɔ̀un, yè tɔ̀ wɔ mììnge kùunma rèe ɲan. Kaadzin neè yè gɔ̀ɔ sɔn naa sààn sen, nìi kir'là, ci Isɔpuku, yè fu rèe shì tɔ̀ kùngɔ ra. Y'à ɲansen, y'à tsun Yesù dziɛ̀ rà.

30 À mììnge kùunma rèe nèeŋ min niì, è dzin ci: «Goò sapɛ dzii tsyɛun !»

Tà shɔ̀ùn, è kungɔ sùùru, è xɔn bo.

31 Àwà, tɔ̀ jisee na ɲànwɔ siɛ jɔɔn wɔɔ jisee rìì. Dzyèèsìbee mòdzin neè jɔɔndzin neè sàò naà ni à re, mòdzin gbaunma rèè yè ɲànwɔ siɛ̀ jisee fa gɔɔ̀ rà waa. Tɔ̀ y'a tàrà, tɔ̀ ɲànwɔ sii soo na jisee, nìi blà è geren ɲànwɔ̀ sìì dzyee reè tsɛ. Tà doùn, yè b'a gaa Pilatsì rè, ci à y'à to mòdzin gbaunma rèè sàn nèè yè kɛɛy kɛɛy, sànko yè san tabe è fùn nèè yè jàà bo gɔɔ̀ rà.

32 Kaadzin neè yè nà tɔ̀un. È nàu wɔ, mòkun fii nìì reè gbaun gɔɔ̀ rà ko Yesù ka, yè jɔ̀naà raa sàn nèè kɛɛy kɛɛy, fiiraa raa rèè, yè twɛy sa kɛɛy kɛɛy, sànko yè san tabe.

33 È wɔu Yesù tsɛ watsi riì bwèy, y'à jà, tɔ saun nòn. Tɔ̀ kamà, è na tɔ̀ raa sàn nèè kɛɛy kɛɛy waa.

34 Ŋà, kaadzian soo y'a gaakaa vɔ̀ tsɔ̀ ko e re tànmaa ka, tsìɛn ko yuà sa yeè bo jaa soo.

35 Mòò riì twɛy goo fauma rèè lakɛɛ, à yɛ̀r'la jaadzin ni yè è jàu. A to nìi dèe, tɔ sààben taki rii. À yɛ̀r'la y'à tɔ̀, ci wo sààbeen rìì dèe. A y'à lakɛɛ rìì, sànko ye sa yeè ɲɛn à ra.

36 Tɔ̀ goò fau nì, sànko Ŋaablà re Goomaa doùn gooma de dɔ̀unma bɔrɔɔ sɔn yeè bo e shi tsɛ, nìì yɛ ci:

À xɔ rèè pɛn fa kɛɛy waa.

37 Gooma de dɔ̀unma bɔrɔɔ kpɛrɛ yè bà ni kìtaabuà doùn kɔn ci:

È mòò riì vɔ̀ tsɔ̀u, è nà wò rii siin.

È Yesù fùn wɔu min niì

38 Àwà, kpiri sɔn na ni, tɔ̀ tsoo ci Yusufù, è bà boò wɔ̀ sɔn ɲan, ci Arimate. Tɔ̀ kpir'la sa na Yesù rè kàràndzian sɔn ni, ŋà, à na à faa mɛnɛn doùn, kàtsu à na shiɔ̀ Dzyèèsìbee mòdzin neè jɔɔndzin neè jɔɔn. Nèe goo rèe rèè faumaà shɔ̀ùn, Yusufù yè bè Pilatsì rè, è b'a gaa à re, ci è shi sin, Yesù fùàn yè jàà bo gɔɔ̀ rà. Pilatsì yè tɔ̀ shi sin à ra. Àwà, Yusufù yè bè tɔ̀ rii ɲàn, è bè Yesù fùàn jàà bo gɔɔ̀ rà.

39 Kpir'liì bèu Yesù kpà sii sɔn see fene, ci Nikodɛmùn, tɔ̀ sa yeè nà. A nàkɔɔn, è nà mà tsusaa ge fama kinin dziù kaatsi fii ka e suun, yè bà gbiimaɔ̀n e si ɲan. Kaatsi soo kir'là ci miirì, soo yè bà kir'là ci aluwɛsì. Twɛy vùnbee na cilo mòò tsyeùn tsuru boò.

40 Àwà twɛy mòkun fiɛ̀ sa yeè Yesù fùàn sen tɔ̀un, yè mà tsusaa gè fama kinin dziù rèe tsùsa à mà, y'à kasange. Y'à fa a ci Dzyèèsìbee mòdzin neè yè e re fùn nèè wɔɔ̀ nìi tsuru, è bè è re làndà shià tsɛ.

41 È na Yesù gbaɔn gɔɔ̀ rà min niì, gɔ̀ɔ̀ gane lamɔ̀nɔunma wùù sɔn na ni mɔn. Tɔ̀ gàne rɔ̀n, fùn kɔ̀ɔ̀ ye na ɲɛɛna, a ci kpankɔɔ, fùn pɛn na wɔ ja nìi doùn ŋe waa.

42 À dzyèèsìbee mòdzin neè rè ɲànwɔ siɛ̀ jɔɔn wɔɔ jisee nìi fa, tɔ̀ kɔ̀ɔ̀ to tsyɛn mɔn do, yè Yesù wɔ mɔn.