Jean 18

E Yesù kuun min niì

1 Àyìwà, Yesù Ŋaablà mafyɛ̀n dòu tà tsuru watsi riì bwèy, è bo mɔn à ko e re kàràndzin neè yè bè don sɔn kɛyn, tɔ kir'là Sedɔrɔn doon. Tɔ̀ gàne rɔ̀n, gɔ̀ɔ̀ gane lamɔ̀nɔunma wùù sɔn na ni. Àwà, à ko e re kàràndzin neè yè bè dɔ̀n mɔn.

2 Yudà, tɔ̀ nìi ni Yesù jàànfaà rà, tɔ̀ sa na tɔ̀ gàneè kpàtɔ̀, kàtsu Yesù na dɛ̀rɔɔ̀n è bèe è ka mɔn.

3 Yesù ko e re kàràndzin neè ni tɔ̀ gàne rɔ̀n, Yudà, tà ko kaadzin kuru sɔn yeè nà e kungɔ bo mɔn, Ŋaablà re gbà blàa kplatsuubaa rèè swey sa na ni è ka. Saaka jɔɔndzin neè, ko Faridziɲɛn rèè rìì na twɛy ka naɔ̀ è bà Yudà tɛ̀y. E ci e ye nà bo, fìtsina rèè ko sàkɔ̀ɔ̀dziira deunma rèè ko màràmàge rèè rìì na ni è suun.

4 Goo nìi sapɛ nà Yesù tàrà, à na tɔ̀ tɔ̀ tsùù nòn. Tà doùn è kpɛrɛ̀ na è ra, è tey ci: «Ye tsì rii gaa ?»

5 Yè dzin à ra ci: «Ɲe Nazarɛtsika kpiri Yesù rìì gaa.»

E dzin è ra ci: «A mun nì.»

Tɔ̀ y'a tàrà, Yudà, tɔ̀ nìi ni à jàànfaà rà, tɔ sa ni è ɲan.

6 Àwà, Yesù dziu dzin min niì, ci à wò rii, è sapɛ yeè bè e bonè, yè mɛɛy dzɔn nɔ̀n.

7 Yesù yè è tey kɔn ci: «Ye tsì rii gaa ?»

Yè dzin ci: «Ɲe Nazarɛtsika kpiri Yesù rìì gaa.»

8 È dzin è ra ci: «Mun na dzin ye ra nòn, ci à mun nì ɔ̀ ? È ba mun nì gaakɔɔn, ye nèe rèè to mɔn yè bèe.»

9 Tɔ̀un, à re gooma deuma sɔn yeè bo e shi tsɛ, nìi yɛ nèe ci: «Wo nìì reè sapɛ kɛɛ̀yfau mun mà, twɛy sɔn na firì mun suun waa.»

10 Àwà, kaamunun gbààn niì ni Shimɔn Piyɛr'lè, tɔ̀ yeè tɔ̀ sɔ̀ɔ̀n bo e taàn doùn. À y'à sɔ̀ɔ̀n bou, saaka jɔɔndzin blaa re faagoofadzian raa sirama si jaa re tor'là, è tɔ̀ sen bo mɔn caù. Tɔ̀ faagoofadzian tsoo na Malakusì

11 Yesù yè dzin Piyɛr'là tɔ̀un ci: «A re kaamunun gbàan wɔ e taàn doùn e shɔùn. Mun Fàà ci byɛnbe riì yè mun tàrà, tɔ̀ na wù è mun tàrà gbɛ ?»

12 Tɔ̀un, kaadzin kur'là mòdzin neè ko e kuntsiɛ̀ ko Ŋaablà re gbà blàa kplatsuubaa nìì reè bàji beu, yè Yesù kun, y'à si rèè shì.

13 Tɔ̀un, saaka jɔɔndzin bla bɔrɔɔ riì ni, ci Anì, yè b'a ka tɔ̀ jɔ̀na re ŋe. Mòò riì na saaka jɔɔndzin bla yee tɔ̀ jiɛ rà, tɔ̀ na Kàyifè. Anì, tɔ̀ yeè bà na Kàyifè blan kpiri.

14 Kàyifè, wò rii na dzyèèsìbee mòdzin neè jɔɔndzin neè latsiɔ̀ nèe gooma ree ka nìi yɛ ci: «Nìi fyan, mòò sɔ̀n dzin soo yeè san jàmaàn mòdzin neè tsɔ̀saan ɲàn.»

È bèu Yesù ka saaka jɔɔndzin bla Anì nè min niì

15 È bèkɔɔn Yesù ka, Shimɔn Piyɛrì ko kàràndzian sɔn na gbaɔn Yesù kpɛyn. Tɔ̀ kàràndzian na saaka jɔɔndzin blaa tɔ̀baa. Tɔ̀un, à sa yeè dɔ̀n Yesù ka saaka jɔɔndzin bla bɔrɔɔ rè fɔɔn doùn.

16 Nìi Piyɛrì, tɔ̀ yeè to fɔɔn dziɛ rà da rɔ̀n. Tɔ̀un, kàràndzin niì saaka jɔɔndzin blaa tɔ̀baa, tɔ̀ yeè bo na. À bo nau, tàan nìi dziɛ kplatsuɔ, è nà gooma tɔ̀ ka, è Piyɛrì dɔ̀n fɔɔn doùn.

17 Piyɛrì dɔ̀nkɔɔn, tɔ̀ faagoofadzin taan nìi fɔɔn dziɛ kplatsuɔ, tɔ̀ yeè dzin à ra ci: «Wo sa na kpir'lee re kàràndzin neè sɔn ni fyeu ɔ ?»

À ci: «Mun na è sɔn waa.»

18 Mùnkɛɛ̀ na ni nìi fa, tɔ̀ kamà faagoofadzin neè ko kaadzin neè na sàtsììn sa sɔn wɔɔ, yè bà tɔ̀ laguruɔ̀, yè e ma gɔ̀r'la. Piyɛrì sa na tsìiŋnà è ka mɔn, è bà e ma gɔ̀r'la.

19 Tɔ̀un, nìi Yesù rè kàràndzin neè, tà ko à mòdzian kàr'na goo nìì reè tsɛ, saaka jɔɔndzin bla Anì yè Yesù tey twɛy goo rèè mà.

20 Yesù yè dzin à ra ci: «Mun gooma niì sapɛ deu mòdzian jaa ra, mun na à pɛn dè mɛnɛn doùn waa. Kudɛyn, mun na mòdzian kàr'na waajibi fa gba rèè doùn, min bà è kàr'na Ŋaablà re gbà blàa rà, dzyèèsìbee mòdzin neè sapɛ yeè e ladzyèe twɛy gàne nìì reè ɲàn. Mun na gèsɔn pɛn dè gòndo ɲan waa.

21 Feera, wo yè bà mun teè ? Nìì reè mun lamyɛun, mun nìi dèu, twɛy tey tɔ̀ mà. Mun nìi dèu è ra, y'à jaa tɔ̀.»

22 Yesù tɔ̀ goomaa dèu min niì, Ŋaablà re gbà blàa kplatsuubaa rèè mòò sɔn nìi tsìiŋnà à tɛyn, tɔ̀ y'a dɔrɔ e taàkuùn, è dzin à ra ci: «Tɔ saaka jɔɔndzin blaa rè goomaa latsiu'n kur'la rìì wo re o ?»

23 Yesù yè dzin à ra ci: «Min ba gooma ɲaan ni deò, à ɲaanbemaà nìi, tɔ̀ kpàdè. Mun to ye ba wùù rii deò, fee mun ban kun wo re ?»

24 Tɔ̀un, Yesù si rèè shì tsùuŋmaà, Anì y'à bàji be Kàyifè rè, saaka jɔɔndzin bla yee.

25 Tɔ̀ y'a tàrà, Shimɔn Piyɛrì ni fɔɔn doùn, è ma gɔ̀r'la sàà rà. Tɔ̀un, sɔn y'a tey ci: «Wo sa na kpir'lee re kàràndzin neè sɔn ni ɔ̀n ?»

Ŋà, Piyɛrì yè e sɔswɛy ci: «Ayi, mun na è sɔn dɛ.»

26 Àwà, Piyɛrì kpir'liì toro sɔn kùnùn bou, tɔ̀ kpir'la raa neema kpiri sɔn na ni mɔn. Tɔ̀ sa na saaka jɔɔndzin blaa raa faagoofadzian sɔn. È dzin Piyɛr'là ci: «Mun na wo jà à ka gɔ̀ɔ̀ gane lamɔ̀nɔunma wùù ree ɲan ɔn ?»

27 Ŋà, Piyɛrì yè e sɔswɛy kɔn, ci à na wò waa. Tɔ̀ nɔ̀nkɔɔ rɔn ko e sa, tsɛ̀ken sɔn yeè ben.

E bèu Yesù ka Pilatsì rè min niì, è kitsi

28 Tà shɔ̀ùn, yè bo ko Yesù ka Kàyifè rè. Ɔ̀rɔ̀mùnkà kpiri jàmààntsi rìi tsoo ci Pilatsì, yè b'a ka tɔ̀ re jàmààntsì gbaà doùn. Tɔ fau gbishɛɛ̀mà mur'lɔn nì. Nìi dzyèèsìbee mòdzin neè jɔɔndzin neè, twɛy na e tsiì yè dɔ̀n jàmààntsì gbaà doùn waa, kàtsu y'à jàu, ci ye ye e gbiiman karfir'leè ɲàn, tɔ nà ye noo, ye fa dzi Geren n tsɛɛ̀ sɛr'la ɲwɛɛ̀n ɲɔn waa.

29 Tɔ̀ kamà, jàmààntsi Pilatsì yè bo na è kpà da rɔ̀n, è tey ci: «Fee soo ye jàà kun kpir'lee ra ?»

30 Yè dzin à ra ci: «Kpir'lee ma ba na gooɲaanfabaa fyeu, ɲe fa à wɔ wo suun do.»

31 Pilatsì yè dzin è ra ci: «Ye yɛ̀r'leè yè bè à ka, ye bè kitsia kùnùn à tsɛ, è bè ye re sàrìyà shià tsɛ.»

Yè dzin ci: «À shi na ni ɲe suun, ɲe yè mòò kitsi, ci è vu waa.»

32 Yesù na nà san saun'n kur'liì rà, à gooma niì deò tà goò tsɛ, nèe sapɛ fau, sànko tɔ̀ goomaa yè bo e shi tsɛ.

33 Tɔ̀un, Pilatsì yè dɔ̀n jàmààntsì gbaà doùn kɔn, à yè Yesù kir'na, à y'à tey ci: «Wo rìì Dzyèèsìbee mòdzin neè rè màsà kpir'là ɔ̀ ?»

34 Yesù yè dzin ci: «Wo yɛ̀r'la rìì tɔ̀ kɛ̀sɛɔ wo y'à dè ràà, tàà swey rìì tɔ̀ deò wo ra mun tsɛ ?»

35 Pilatsì yè dzin à ra ci: «Mun Dzyèèsìbee mòdzin gbɛ ? Wo kuan mòò rèè, ko saaka jɔɔndzin neè rìì wo wɔɔ mun suun. Wo fee rìì faɔ̀ do ?»

36 Yesù yè dzin ci: «Mun ne màsàbee na nèe dziɲan ree doùn naa waa. Mun ne màsàbee yè bà na nèe dziɲan ree doùn naa, mun kpɛyn dzin neè na nà kaà fa mun kamà, sànko mun mà wɔ dzyèèsìbee mòdzin neè jɔɔndzin neè suun waa. Ŋà, mun ne màsàbee to na nèe dziɲan ree doùn naa do.»

37 Pilatsì y'à tey tɔ̀un ci: «Tà bwèy, wo màsa rii kɛ̀ ?»

Yesù yè dzin à ra ci: «Wo rìì y'à dèu, mun màsa. Mun kere kùàn nì, min nà dziɲaan doùn, min sààbeen dè. Sààbeen dzi mòò o moò rà, twɛy sapɛ yeè e toro wɔɔ̀ mun ne goomaa rè.»

38 Pilatsì y'à tey kɔn ci: «Fee rìì sààbeen ?»

Pilatsì twɛy goomaa reè dè dòu, è bo na dzyèèsìbee mòdzin neè kpà da rɔ̀n kɔn, è dzin è ra ci: «Mun na kùn pɛn jàa, nìi dzia bà kitsi mɛɛy kùn kpir'lee tsɛ waa.

39 Geren n tsɛɛ̀ sɛr'là ye wɔ, ye re làndà shià doùn, kàsòdòùndzian soo bo bàjia. Ye sào ni min dzyèèsìbee mòdzin neè rè màsà kpir'là rìì bàji ye kɔ̀ ɔ̀ ?»

40 Yè sɛ̀ɛ fààn na ci: «Ɔ̀ɔɔn, maà tɔ̀ bàji waa, Barabasì rìì bo bàji !»

Tɔ̀ y'a tàrà Barabasì, tɔ̀ na gookoronfabaa rìì.