Jean 17

Yesù goo nìì reè gaaŋ e Fa Ŋaablà re, sani è bo dziɲaan doùn

1 Àyìwà, Yesù gooma doumaà shɔ̀ùn tɔ̀ tsuru, è jaà ɲansen ŋaablaxɔɔ̀ kpàkèrè è dzin ci: «Mun Fà Ŋaablà, watsia wɔu. A Dzin Kpir'la blàbee kpàdè, sànko, à sa yeè a blabee kpàdè. 2 Tɔ̀ fa, kàtsu wo fààn siun à ra, è bà ni dziɲan modzian sapɛ kuùn. Tà tsuru, wo nìì reè sapɛ wɔɔ à suun, è jaamabe dziù dòbɛɛ sìn twɛy rà. 3 A y'a myɛ̀n jaamabe dziù dòbɛɛ, tɔ̀ rii yɛ, e wo Ŋaablà soo takia tɔ̀, tà ko wo mòò riì ka nau, tɔ̀ yeè bà Yesù, wo Jaara Modzìàn e tɔ̀ tɔ̀. 4 Wo faagoo nìi wɔu mun suun, tɔ̀ boumaà e shi tsɛ mun ne, tɔ̀ y'a tou, wo blàbee yè tɔ̀ dzɔ̀nxɔmaà tsɛ. 5 Fà Ŋaablà, dòònun, blà wɔ n ɲan a taàkuùn. Blàbe niì na ni mun ne fɔ wo na dziɲan ɲɛn ŋe, tɔ̀ sìn n na.

6 Àwà, wo mòdzin niì reè tsiu dziɲan na, wo yè è sìn mun na, m'a tou twɛy yè wo tɔ̀. È na wo raa ì rìì, wo to yè è sìun mun na, è to yè wo re goomaa to e duùn. 7 Dòònun, y'à tɔ̀u, ci wo gè o ge sìun mun na, à sapɛ boo wo rìì lè. 8 Y'à tɔ̀u, kàtsu mun gooma niì reè dèu è ra, è ɲɛun è ra, ci wo rìì yè è dèu mun na è to yè e tsiì è ra. Awà, y'à tɔ̀u, ci sààben na, mun daɔn min bo wo rìì lè, è to ɲɛun à ra, ci wo rìì mun ka naɔ. 9 Mun wo màfyɛ̀ɛn è re. Mun na wo màfyɛ̀ɛn dziɲan modzin neè rè dɛ. Ŋà wo nìì reè sìun mun na, mun wo màfyɛ̀ɛn twɛy rìì lè, kàtsu è wo raa ì rìì. 10 Awà, gè o ge mun ne, à wo raa, gè o ge to wo re, à mun sa raa. Mun blàbee to kpàdeò è bo ye rìì ɲàn. 11 Sani dɛyn, mun fa bà ni dziɲan doùn dɛ, kàtsu mun bèe wo re. Ŋà nìi ye, ye nà to dziɲan doùn. Fà Ŋaablà, wo rìi ni a si, è màrà a tsoò baraka rɔ̀n, wo tɔ̀ niì sìun mun na. Tɔ̀ fa, è sa yeè bà soo, a ci mun ko wo soo nìi tsuru. 12 È mun to è ka, mun yè è màrau wo tsoò baraka rɔ̀n, wo tɔ̀ tsoo rìi sìun mun na. Min sapɛ kaàwɔu, mòò pɛn na firì è ɲan waa, fɔ mòò sɔn nìi na fìr'làmaà. Tɔ̀ mòò sɔn nèe fìriu, sànko, Ŋaablà re Goomaa doùn, gooma de dɔ̀unma bɔrɔɔ sɔn yeè bo e shi tsɛ.

13 Dòònun, mun nà n kpɛyn sèè wo re. Mun tɔ̀ sapɛ deè, è mun to dziɲan doùn ŋe, sànko, taamadzibe nìi yɛ mun ɲan, tɔ̀ yeè bà ni è ɲan, è bà taamadzibe dzii tsyɛunma. 14 Mun wo re goomaa sìun è ra, tɔ̀ kamà, dziɲan modzin neè yè è goo xɔbeu e ma, kàtsu, è na dziɲan raa waa, a ci mun tsu na dziɲan raa nìi tsuru waa. 15 Mun na wo màfyɛ̀ɛn, ci wo yè è bo dziɲan ɲan dɛ, ŋà, mun wo màfyɛ̀ɛn nì, wo yè è tààn Sùtana mà. 16 È na dziɲan raa waa, a ci mun tsu na dziɲan raa nìi tsuru waa.

17 Mun wo màfyɛ̀ɛn, e fɛnɛbe e bo ji e si a re, sààbeen baraka rɔ̀n. Wo re goomaa sààbeen rìì. 18 Wo mun ka nau dziɲan doùn nìi tsuru, mun sa yeè è kaà dziɲan doùn tà tsuru. 19 E kamà, min n bo jia n si wo re, sànko sààbeen baraka rɔ̀n, è sa yeè e bo ji e si wo re.

20 Àwà, mun na wo màfyɛ̀ɛn è bàsɔùn nè dɛ, ŋà, gè o ge nà ɲɛn mun na è re goomaa kamà mun ne goò ɲàn, mun wo màfyɛ̀ɛn twɛy sa re. 21 M'a gaa wo re, è sa yeè bà soo. Wo Fà Ŋaabla ni mun ɲan nìi tsuru, mun sa yeè bà ni wo ɲan, m'a gaa a re, yè bà ni mùn ɲan tɔ̀ tsuru, sànko dziɲan modzin neè yè ɲɛn à ra, ci wo rìì mun ka naɔ. 22 Wo blàbe rìi sìun mun na, mun sa tɔ̀ sìun è ra, sànko, yè bà soo, a ci mun ko wo soo nìi tsuru. 23 Tà doùn, mun ni è ɲan, wo sa yeè bà ni mun ɲan. Yè bà soo ɲaun, sànko dziɲan y'a tɔ̀ tɔ̀ tsuru, ci wo rìì mun ka naɔ, wo to yè è kɛ̀niɔ̀n, a ci wo mun kɛ̀niɔ̀n nìi tsuru.

24 Fà Ŋaablà, mun sào ni, wo nìì reè sìun mun na, mun nà bà ni min niì, è sa yeè bà ni mɔn, tà ko yè mun blàbee jà. Wo tɔ̀ blàbee sìun mun na, kàtsu, wo mun kɛ̀niɔ̀n, tɔ̀ y'a tàrà dziɲan na ɲɛn ŋe waa. 25 Fà Ŋaablà, wo rìi tereòn, dziɲan modzin neè na wo tɔ̀ waa, ŋà nìi mun, mun wo tɔ̀u. Mun ne kàràndzin neè to y'à fàànmuun, ci wo rìì mun ka naɔ. 26 Mun y'à tou yè wo tɔ̀, mun to nà à to yè wo tɔ̀ ari she ŋe, sànko wo mun kɛ̀niɔ̀n kɛ̀nìùn'n kur'liì rà, tɔ̀ kɛ̀nbààbee yè bà ni è ɲan, mun sa yeè bà ni è ɲan.»