Pɔlì ci wo Kirisà gooma deu dèù'n kur'liì rà Korɛntsika reè rà
2
1 Àwà neema reè, mun bèu ye kpà watsi riì bwèy, min bè Ŋaablà re gòndoo gooma de ye ra, mun na be gooma tɔ brisi ka, mun to na be akiritsifabe ka. 2 È ɲɛn à tsɛ, è mun to ye fi, mun na à gaa min goo sɔn pɛn tɔ̀ fɔ Yesù Kirisà, Yesù Kirisà gbaunma gɔɔ̀ rà. 3 Tɔ̀ rii y'à to, mun bèumaà ye re mɔn, mun ŋɔ̀n na fyɛn, mun shiɔ̀, mun mà yè bà sɔ̀ɔn a ci goo kpɛ̀rɛ̀. 4 Àwà mun ne goomaa, ko mun ne waajibia, à pɛn naà adamadzin mòdzin ne akiritsifabee gooma tɔ waa, ŋà à sapɛ na goo kpàdèkɔɔn dzibaabe ka, Ŋaablà re Dzia baraka rɔ̀n. 5 Tà fau, gè riì ni à to, ye re ɲɛynaà mà gban adamadzin mòdzin ì nè akiritsifabe tsɛ waa, ŋà è ba ni Ŋaablà re dzibaabee rìì tsɛ.Ŋaablà raa akiritsifabee
6 Tɔ̀ to y'à tàrà, ɲe sa akiritsifabee sɔn ni gooma deè ɲɛynamoo mɔunma rèè rà, akiritsifabe riì na nèe dziɲan ree raa waa, à to na nèe dziɲan ree kùntsii rèè raa waa, twɛy dò boò peu. 7 Ŋà Ŋaablà raa akiritsifabee, ɲe tɔ̀ rii gooma deè. Tɔ̀ akiritsifabee na gòndo mɛnɛn tsùuŋma, Ŋaabla na nìi ŋɛ̀nɛ̀ɲɛɔ̀n sani dziɲan ye ɲɛn, è bà ni à ka nɔɔrɔ ɲɛn ɲe tsɛ. 8 Dziɲan ree kùntsii rèè pɛn na tɔ̀ akiritsifabee tɔ̀ waa. È ɲɛn à tsɛ, yè ba na à tɔ̀un, è fa ni nɔɔrɔɔ Tsìfaà gban gɔɔ̀ rà waa. 9 Ŋà, à sɛbɛɔ̀n Ŋaablà re Gooma doùn nèe tsuru ci: «Mòdzin jaa na ɲɛn ja gè niì mà ŋe, à toro to na à myɛ̀n jà ŋe, à to yɛ̀rɛ̀ na jaà jà à akir'la ŋe tsu, Ŋaabla tɔ̀ rii sɔ̀n byɛ̀n tsùuŋnà e kɛnbaa rèè rè. 10 Àwa Ŋaabla tɔ̀ goò kpàdeu ɲe rìì là e re Dzia baraka rɔ̀n. È ɲɛn à tsɛ, Ŋaablà re Dzia goò sapɛ ɲan siɛ̀n, arì Ŋaabla re gòndo niì reè tsun. 11 Tsì rii soo ni adamadzin mòdzin neè ɲàn, ci wò y'a tɔ̀ nìi ni adamadzin mòdzin ɲan fɔ akir'lìi ni à tsìfa ɲan ? Tɔ̀ soo tsuru, nìi ni Ŋaablà ɲan, mòò pɛn na dzia tɔ̀ tɔ̀, fɔ à re Dzia. 12 Àwà nìi ɲe, ɲe na dziɲan raa dzia tàraɔ̀ waa, fɔ Dzi riì boo Ŋaablà re, gè riì ni à to, Ŋaabla kɔ̀ì ge nìì reè siɔ̀n ɲe ra, ɲe yè twɛy tɔ̀. 13 Ɲe na twɛy goo rèè dèe gooma ì ka, nìi adamadzin mòdzin ne akiritsifabee kàràn waa, fɔ Ŋaablà re Dzia nìi kàr'na. È ɲɛn à tsɛ, ɲe rìì xɔɔn raa goò dèe xɔɔn raa gooma ì ka. 14 Adamadzin mòdzin maanaa na e tsiɛ Ŋaablà re Dzia raa goo rèè rà waa, kàtsu tɔ fàkɔ̀ɔ̀nbe rii à jaa ra. À na dzia è tɔ̀ waa, è ɲɛn à tsɛ, Ŋaablà re Dzia soo pe rii y'à toò, yè tɔ̀ bo e si ɲan. 15 Ŋaablà re Dzia ni mòò riì ɲàn, tɔ goò sapɛ tɔ bo e si ɲan, ŋà mòò pɛn na à raa rèè tɔ̀ bo e si ɲan waa. 16 Àwà à sɛbɛɔ̀n Ŋaablà re Goomaa doùn ci: «Tsì rii dziu Tsìfaà kɛ̀sɛmàà tɔ̀ è bà ni kàràn sìn à ra ?» Tɔ̀ to y'à tàrà, Kirisà raa kɛ̀sɛmàà ni ɲe re.