Mòdzian sa ko e re faagoo Ŋaablà re
3
1 Àwà neema i, sààben ci yè e de, mun na dzi gooma ye ka, a ci Ŋaablà re Dzia raa goo rèè mòdzin ì waa, ŋà mun goomau ye ka rìì a ci gɔɔ̀n raa goo rèè mòdzin ì, ko dziin kòòmɛ̀ynii ì Kirisà ɲàn. 2 Mun nɔnɔɔn nì sìun ye ra y'a mìn, à naà ɲwɛyn màxɔù waa, kàtsu tɔ̀ fa ni dzi ku ye ɲan waa. À to yɛ̀rɛ̀ fa ku ye ɲan, arì she waa. 3 È ɲɛn à tsɛ arì she, dziɲaan goo rèè ni ye ɲan. È jaaɲininbeè ko kaà to ye fi, tɔ̀ na à kpàdèe ci dziɲaan goo rèè ni ye ɲan, ye juɔ yè bà mòdzìn juu ɔ ? 4 Ye ɲan, sɔn ye ba ci «wo Pɔl'laa», sɔn ci «wo Apɔlɔsì raa», tɔ̀ na mòdzìn juu fyeu ɔ ?5 Tà doùn, Apɔlɔsì fee rìì, Pɔlì yè bà fee ? Ŋaablà re faagoofabaa ì boshɔ̀ùn, nìì reè bàu saabu ye yè ɲɛynaà fa. È fiɛ̀ sa faagoò fau, è kòrò Tsìfaà rè kɔ̀ì ge sìunmaà ka è soo sookɔɔn nà. 6 Mun gèè siu, Apɔlɔsì y'à kɔ̀ yu, ŋà è bɔɔ, tɔ bàu Ŋaablà rii. 7 Tà tsuru, nìi gèè sìa, tà ko nìi y'à kɔ̀ɔ yu, twɛy sɔn na pɛn waa, fɔ à bɔɔbaà, nìi Ŋaablà. 8 Gèè sìbaà, ko à kɔ̀baà, è sapɛ soo, è soo soo sapɛ to nà sàrà è kòrò è re faagoò rìì ka. 9 È ɲɛn à tsɛ, ɲe ko Ŋaablà yeè e si faagoofasi ì à re faagoò doùn. Ye rìì Ŋaablà re dzù faramaà, ye yè bà à re gbà jiramaà.
Gbàà jiu'n kur'la
10 È kòrò Ŋaablà ɲanwùɔ ka à tɔ̀ niì fau mun ne, mun gbàà dzun bau a ci gbàjibaa akiritsi, mòò kpɛrɛkuru yeè gbàà ji à tsɛ. Ŋà, mòdzian soo soo sapɛ yeè e yɛrɛ kaàwɔ e re gbàà jiu'n kur'la rà à tsɛ. 11 Àwà nìi dzun bàunà, tɔ̀ yeè bà Yesù Kirisà, mòò pɛn na dzia kpɛrɛ tsùù tà shɔ̀ùn dɛ. 12 Mòo dzia gbàà ji tɔ̀ dzunbama rèe tsɛ ko sɛnu ka, tàmafa warifyɛ, tàmafa kpààmàge kpàxɔ ì, tàmafa gɔ̀ɔ, tàmafa vun gɔ̀rɔ̀, tàmafa ŋɛyn. 13 Ŋà è soo soo sapɛ faagoo kaatsi rìi faɔ̀ tɔ nà kpàdè fyɛ. Tsìɛ̀ sii sèè, tɔ nà tɔ̀, è ɲɛn à tsɛ, sàà nà à kpàdè. Tɔ̀ sii sèè, mòdzian soo sookɔɔn sapɛ re faagoò nìi boò, sàà nà tɔ̀ dzuun bo. 14 Mòò riì rè gbà jiuma ma dzi bara, tɔ nà sàrà tàrà. 15 Ŋà mòò riì raa nà dzu, à nà bà tɔ̀ re mɛɛy. À yɛ̀r'la kpɛ̀yn nà tsi, ŋà à nà bà a ci mòò riì tsiɔ sà dzu ra.
16 Àwà ye na à tɔ̀ ci ye Ŋaablà re gbà blàa rìì, à re Dzia yè bà e tsuuŋnà ye ɲan ɔn ? 17 Mòò riì ye Ŋaablà re gbà blàa bara, Ŋaablà sa nà tɔ̀ tsìfa bara. È ɲɛn à tsɛ, Ŋaablà re gbà blàa fɛnɛɔ̀, tɔ̀ to ye rìì.
Dziɲaan raa akiritsifabee fàkɔ̀ɔ̀nbe Ŋaablà jaa dzuun
18 Mòò pɛn mà e yɛrɛ san fìrì. Sɔn ye ba e yɛrɛ jaà akiritsi ye ɲan a ci dziɲan raà tsuru, à y'à to è bà fàkɔɔn, è bà ni ba akiritsi sààben na. 19 Àwà nèe dziɲan ree raa akiritsifabee, tɔ fàkɔ̀ɔ̀nbe rìì Ŋaablà jaa dzuun. È ɲɛn à tsɛ, à sɛbɛɔ̀n Ŋaablà re Gooma doùn nèe tsuru ci: «À akiritsi rèè kuàn e yɛr'la rè sànbee myɛ̀ɛ̀n dzu.» 20 È bà sɛbɛɔ̀n sa ci: «Tsìfaà akiritsi rèè kɛ̀sɛmàà tɔ̀, nìi nàfà bɛy. 21 Tà doùn, mòò pɛn mà mòdzin neè bà e yɛrɛ̀ blàbè saabu waa, è ɲɛn à tsɛ, gè sapɛ ye raa. 22 Pɔlì ò, Piyɛrì ò, dziɲaan ò, jaamabee ò, saàn ò, she goo rèè ò, gbey goo rèè o, à sapɛ ye raa. 23 Ŋà ye, ye Kirisà raa, Kirisà yè bà Ŋaablà raa.