Dzyèè rìi ni Pɔlì ko Korɛntsika reè fi
4
1 Tà doùn, mòdzian yè ɲe jàtsi kun Kirisà rè faagoofabaa ì, ko Ŋaablà re gòndo reè goojaabobaa ì. 2 Tɔ̀ to y'à tàrà, nìi gaa goojaabobaà rè, tɔ̀ rii yɛ, mòò yè ɲɛn à ra. 3 Mun ne, ye kitsi kunuun mun tsɛ ò, mòò kpɛrɛ ì rìì to kitsi kunuun mun tsɛ ò, tɔ̀ na gèsɔn mun ne waa. Mun tsu to yɛ̀rɛ̀ na kitsi kun'na n yɛrɛ tsɛ tsu. 4 Àwà mun akir'là kpɛ̀yn na mun jààkia kàjaa pɛn tsɛ waa tɔ sààben, ŋà tɔ̀ na à kpàdèe ci mun tereòn waa. Nìi mun kitsia, tɔ Tsìfaà rìì. 5 Tà doùn, e maà kitsia kùnùn e watsia jɔɔn waa. E maà kùnùn, Tsìfaà nà bwey mà bà wɔɔ waa. Tɔ̀ riì ye na nà, à na tsiitsii dzuun goo mɛnɛunma rèè sapɛ bo vyevyeè rà, è duungoo reè sapɛ bo da. Tɔ̀un mòdzian soo soo sapɛ wù tsoo dzi riì ka, è nà tɔ̀ tàrà Ŋaablà re.6 Àwà n neema ì, ye rìì kamà, mun twɛy goo rèè ka jaa kpadei fau è ɲɛn mun yɛ̀r'la ko Apɔlɔsì tsɛ. Mun tɔ̀ fau gè riì ni à to, ye yè kàràn tàrà bo ɲe re è kòrò nèe gooma ree ka, nìi yɛ ci "Goo pɛn mà geren sɛbɛunmaà tsɛ waa", tɔ mà nà bà saabu ye e yɛrɛ blabe, ye sɔn fyanbe sɔn ma waa. 7 Àwà tsì rii wo boo dzyee rèè ɲàn ? Fèè rìì ni wo re, wo na nìi tàra è bo Ŋaablà re ? Wo to ye ba à tàrau, feera wo y'à yɛrɛ blabee a ci wo na à tàrà waa ? 8 Ye cɛun tàr'là rà nòn, ye bàu gètsi ì nòn. Ye màsàbee dzii kuun, ɲe bɛy. Ye yè bà na baɔ̀ màsà ì sààben na ɔ, ɲe sa fa ni ba màsa ì ye ka ɔ ! 9 Àwà m'a jàa ci Ŋaabla ɲe kɛɛradzin neè bàu bònè dzin ì, a ci à san ka kitsi mɛrɔɔn nìì reè tsɛ. È ɲɛn à tsɛ, ɲe bàu siin faa ge ì dziɲan re, mɛ̀rɛ̀kɛ sen ɲɛn adamadzin mòdzin ì tsɛ. 10 Kirisà kamà, ɲe fàkɔɔn ì, ye yè bà akirima ì. Ɲe fààn bɛy ì, ye ye bà fààntsi ì. Bla wɔɔ̀ ye ɲan, ɲe yè bà kɔɔ̀n. 11 È bè suu fɔ nèe watsi ree dzu, ɲe ni dzuà ko mìnoò rà, à na vya ɲe mà, ɲe kun' n kuru ɲaan faɔ̀, ɲe yè bà tsyeere beè min niì sapɛ. 12 Ɲe byɛɛn, ɲe yè faagoò fa e yɛr'la sià ka. È ɲe ɲɛ̀ɛn, ɲe yè dzwɛ ji è ra, è ɲe byɛɛn, ɲe y'à tsi e ma. 13 È ɲe tsoo bar'la, ɲe y'à latsi gooma dzi ka. È bè suu she dzu, ɲe baɔ̀ dziɲaan ɲɔ̀ùn neè, dziɲaan gè nooŋmaà sapɛ.
14 Mun na twɛy goo rèè sɛbɛɛn m'a ka ye seey waa, ŋà min sɛbɛɛn rìì m'a ka ye sɔ̀nmi, a ci mun dzin kɛ̀niunma rèè. 15 Àwà, arì kàrànfa gbaakoron tsyeùn nì yè bà na ni ye re Kirisà ɲàn, fà giri na ni ye re waa. Kùnàgoo Dziɔ̀ baraka rɔ̀n, mun nì ye kereu Yesù Kirisà ɲàn. 16 Tà doùn, mun ye màxɔ̀ɔn, ye bà mun shɔ̀ùnminabaa ì. 17 Tɔ̀ rii kamà, mun Tsìmotè kaà ye re, mun dzin kpiri kɛniunmaà, è bà vusootsi Tsìfaà ɲàn. Mun yè n ne jaamabee shi jiɛ nìi tsuru Kirisà ɲàn, a ci mun y'à kàr'na nìi tsuru min niì sapɛ, ɲɛynamoo kur'lèè sapɛ re, à nà ye taa to tɔ̀ re. 18 Àwà, swey y'à kɛ̀sɛɛ̀ nìi fa ci mun na naà wɔ ye re mɔn waa, tɔ bàu saabu twɛy yè e yɛrɛ blabe. 19 Ŋà è ba Tsìfaà sàò, sani dɛyn, mun na bè ye re mɔn. Min wɔ mɔn, twɛy nìì reè blà e yɛr'le, è dzugoomaa nìi, mun fa à gaa min tɔ̀ tɔ̀ waa, fɔ è dzia nìi fa. 20 È ɲɛn à tsɛ, Ŋaablà re màsàbee na gooma na goo waa, ŋà à dzibaabe goo rii. 21 Ye gaa feera do ? Min bè kɔ̀n nì ka e kpɛyn gbɛ, tàà min bè kɛ̀nbààbe ko vununmacin nì ka ?