Pɔlì kɛ̀kɛ̀ɛ̀ybe rìi gooma deu Korɛntsi ɲɛynamoo kur'là fi
5
1 Àwà mùn y'a myɛ̀ɛn min niì sapɛ, ci kɛ̀kɛ̀ɛ̀ybe ni ye fi, arì nìi kaatsi na ni ɲɛyna bɛy reè tsu fi waa. À dèe ci ye ɲan, sɔn ni e fa rè tààn ka. 2 Arì she ye to yè e yɛrɛ blabee ŋe. N ci tɔ̀ na wù è bà taamaŋununbe brìsi rìì ye re, nìi nà bà saabu mòò riì tɔ̀ goò faɔ̀, ye tɔ̀ kaa bo e fi ! 3 Mun ne, mun kɛ̀sɛɛn ma ba ni ye ka mɔn gɔɔ̀n kàjaa tsɛ, akir'là kàjaa tsɛ mun ni, mun to kitsia kunuun à goò fabaà tsɛ nòn, a ci mun ni. 4 Àwà, ye na e ladzyèè mùn Tsìfa Yesù tsoo ra, mun sa yeè bà ni ye ka tɔ̀ ladzyee ko'ùn akir'là kàjaa tsɛ, è kòrò à re fàan ka, 5 tɔ mòò riì, è wɔ Sùtana suun, gè riì ni à to à gɔɔ̀n yè bara, à xɔɔn yè bà ni tsiuma tàrà Tsìfaà raa jisee sii sèè. 6 Kùn na ni ye re yɛ̀rɛblàbee rà waa. Ye na tɔ̀ ci buru fua gè kiɲaanin nì buru fa guuŋmaà sapɛ furà ɔ̀ ? 7 Tɔ̀ doùn, ye e foò fyɛ bo buru fua gè bɔrɔɔ ɲàn, ye bà a ci buru fa guuŋma yeu è ɲɛn à tsɛ buru fua gè na ni ye ɲan dɛ, kàtsu Kirisà, ɲe re Geren n tsɛɛ̀ sɛr'là sààtòmòìriɛ bou saaka. 8 Tɔ̀ kamà mìn sɛr'là fa, mùn mà à fa ko buru fua gè bɔrɔɔ ka waa, mùn to mà à fa ɲaan ko ɲanbee buru fua gè ka waa. Ŋà mùn y'a fa buru ka, buru fua gè na ni nìi ɲan waa, nìi yɛ e fyɛ, ko sààbeen.9 Awà mun sɛbɛn niì kau ye re, m'a dèu ye ra tɔ̀ doùn, ci e maà dzyèè kɛ̀kɛ̀ɛ̀y gòò fa reè ka goo sɔn pɛn doùn waa. 10 Ŋà, à na dziɲaan kɛ̀kɛ̀ɛ̀y gòò fa reè ko e kuru gooma dekɔɔn waa, à to na à wàsà bɛy reè ko jàànfà moo rèè, ko à ɲɔ̀n kɔ reè gooma dekɔɔn waa. È ɲɛn à tsɛ, è ba na twɛy rìì, fɔ ye yè bo dziɲaan doùn nì. 11 Àyi, à na twɛy gooma dekɔɔn waa, ŋà mun ye sɛbɛun ci ye mà dzyèè mòò riì ka, tɔ nìi ci wo ye neema, à to ni kɛ̀kɛ̀ɛ̀y goo fyɛ̀'ùn, tàmàfa à na wasaa, tàmafa à ɲɔ̀nkɔbaa, tàmafa à ni ɲɛ̀ɛn nì fyɛ̀'ùn, tàmafa à dɔ̀ɔ̀kɔɔn, tàmafa à jàànfà moo. E maà ɲwɛyn tsu rii ɲɔn tɔ̀ mòdzìn kaatsia ka waa. 12 Mòò to ni dzin ci à ni mun nì mà min kitsi kunùn dà dzin neè tsɛ ɔ ? Doun dzin neè raa kitsia, tɔ̀ na ni ye rìì suun ɔn ? 13 Dà dzin nèe, Ŋaablà rii nà twɛy raa kitsia kùnùn. Ye, ye gooɲaanfabaà kaa bo e fi, a ci à sɛbɛɔ̀n Ŋaablà re Goomaa doùn nìi tsuru.