Pɔlì nìi dèu kitsi goo tsɛ ɲɛynamoo rèè ko e si fi
6
1 Àwà, goo ye dɔn ye sɔn ko sɔn fi, fee bèe à to ye yè bè tɔ̀ kitsi kunun teren bɛy reè rè, ye yè Ŋaa re mòdzìn neè to ? 2 Ye na à tɔ̀ ci Ŋaa re mòdzìn neè rìì nà kitsia kùnùn dziɲan tsɛ ɔ ? Ye rìì to ye ba nà kitsia kùnùn dziɲan tsɛ, ye ni gba ye yè twɛy goorii rèè kitsi kunùn ɔ̀n ? 3 Ye to yè b'a tɔ̀ ci ɲe nà kitsia kùnùn mɛ̀rɛ̀kɛ rèè tsɛ kɛ̀ ? Tà doùn, gooma na ni dziɲan ree goo rèè mà waa. 4 Tà bwèy twɛy dziɲaan goo rèè kaatsi ye dɔn ye sɔn ko sɔn fi, ɲɛynamoo kur'là na nìì reè daàn, ye ni à to twɛy yè bà à goò kitsikununbaa ì ɔ̀ ? 5 Mun nèe dèe ye re seey rìì kamà. Tà bwèy, akiritsi pɛn na ni ye fi nìi nà dzi twɛy goo rèè kitsi kunùn twɛy neema reè ko e si fi ɔ ?. 6 Ŋà è bè wɔ fɔ neemaa sɔn yeè e neemasi kitsia, à to na min kpɛrɛ fɔ ɲɛyna bɛy reè bììn ! 7 À kɛ̀sɛɛn ma ba goo kpɛ̀rɛ̀, kitsi jauma ye ko e si fi nòn, tɔ ye re mɛɛy. Fee to y'a toò tɔ̀un ye fa e tsiì teren bɛy goo rà ? Feera ye fa e tsiì mòo yè bà ni ye suun gee tsi ye ra ? 8 Ŋà ye rìì teren bɛy goo faa, ye yè dzyee rèè suun ge reè tsi è ra, nìi ye neema reè. 9 Ye na à tɔ̀ ci teren bɛy goo fa reè nìn na ni Ŋaablà re màsàbee ɲàn ɔ̀n ? E maà e yɛrɛ maniin dɛ ! Kɛ̀kɛ̀ɛ̀y gòò fa reè, ko ɲɔ̀n kɔ reè, ko ɲànmɔ̀ɔ̀bè fa reè, ko kpiri ì bàuma tàan ì, ko kpiri ko kpiri gaa reè, 10 ko shɔn rèè, ko wàsà bɛy reè, ko dɔ̀ɔ̀kɔɔn reè, ko ɲɛ̀yn fa reè, ko jàànfà moo rèè, twɛy nìn na ni Ŋaablà re màsàbee ɲàn waa. 11 Àwà ye swey na ni tɔ̀ rii tsuru. Ŋà ye fòoŋ, ye yè fɛnɛbe ye bà Ŋaablà raa, è kpàdè ci ye tereòn Tsìfa Yesù Kirisà tsoò baraka rɔ̀n, ko mùn ne Ŋaablà re Dzia baraka rɔ̀n.Gɔɔ̀n Tsìfaà raa rìì
12 Goò sapɛ dàaŋnà mun ne, tɔ sààben, ŋà nàfa na ni à sapɛ ɲan waa. Ɔ̀ɔn, goò sapɛ dàaŋnà mun ne, ŋà mun fa n tsiì min bà gèsɔn pɛn ne jòn waa. 13 Ɲwɛyn ge rèè, twɛy doòn raa, doòn tɔ̀ yeè bà ɲwɛyn ge rèè raa. Ŋaablà to nà twɛy fiɛ̀ sa bara bo mɔn. Ŋà gɔɔ̀n, tɔ̀ na kɛ̀kɛ̀ɛ̀ybee raa waa. À Tsìfaà raa rìì, Tsìfaà yè bà à raa. 14 Tà doùn, Ŋaablà Tsìfaà sèè kpunaun nìi tsuru è bo saàn ɲàn, à nà ɲe sa seè kpunan tɔ̀ tsuru, e re dzibaabee baraka rɔ̀n. 15 Ye na à tɔ̀ ci ye gɔɔ̀n Kirisà gɔɔn gàne rèè rìì ɔ̀ ? Mun ni dzi Kirisà gɔɔ̀n gàne rèè sen m'a bà ɲànmɔ̀ɔ̀taan gɔɔ̀n gàne ì ɔ̀ ? Ayi dɛrɛ ! 16 Ye na à tɔ̀ ci mòò riì dzyèe ɲànmɔ̀ɔ̀taàn ka, à y'à ko e gɔɔ̀n bàa gɔn soo rii ɔ̀ ? È ɲɛn à tsɛ, à deò Ŋaablà re Goomaa doùn nèe tsuru ci: «È fiɛ̀ nà bà gɔn soo.» 17 Ŋà mòò riì yè e shià Tsìfaà rà, à ko tɔ̀ sa bàa gè soo rii xɔɔn kàjaa tsɛ. 18 Ye vwɛ̀ɛ̀y kɛ̀kɛ̀ɛ̀ybee jɔɔn ! Mòdzin gooɲaan dzyee niì reè sapɛ faa, à sapɛ gɔɔ̀n dà kèrè goo, ŋà kɛ̀kɛ̀ɛ̀ybee, tɔ gooɲaan, à nìi faa e yɛr'la gɔɔ̀n rà. 19 Tàà ye na à tɔ̀ ci ye gɔɔ̀n Ŋaablà re Dzi Fɛnɛɛ rè gbà blàa rìì ɔ̀, Ŋaablà tɔ̀ niì siɔ̀n ye ra, è bà ni ye ɲan ? Tà doùn, ye na e yɛr'laa dɛ ! 20 È ɲɛn à tsɛ, ye kùngɔ ma bou kpàxɔù rà. Tà doùn, ye nɔɔrɔ ɲɛn Ŋaabà tsɛ e gɔn nɔ̀n !