Pɔlì nìi dèu furu goo kàjaa tsɛ
7
1 Àwà ye sɛbɛɛn fau goo nìì reè tsɛ, twɛy kàjaa tsɛ, à wùɔ rìì yɛ kpiri mà e dzyɛn tàan na waa. 2 Ŋà gè rii ni à to kɛ̀kɛ̀ɛ̀ybe mà fa, à wù kpir'la sapɛ ko e yɛr'là taan, è bà taàn sapɛ ko e yɛr'là kpiri. 3 Tà doùn, nìi tsìi ni kpir'la rà taàn kàjaa tsɛ, kpir'la yè tɔ̀ sìn à ra. Tɔ̀ soo tsuru, nìi tsìi ni taàn sa ra kpir'la kàjaa tsɛ, taàn yè tɔ̀ sìn à ra. 4 Àwà tàan sàò na ni e yɛr'la gɔɔ̀n tsɛ waa, fɔ kpir'la. Tɔ̀ soo tsuru, kpir'la tsu saò na ni e yɛr'la gɔɔ̀n tsɛ waa, fɔ taàn. 5 Tà doùn, e maà e si xɔ̀n waa. E dzia byɛ̀n à mà nì ye watsi to Ŋaabla mafyɛɛ̀n kamà. Tà shɔ̀ùn e dzia sèè e si ma, gè riì ni à to e ma nà gba e yɛrɛ dzuun, tɔ̀ ye bà saabu Sùtana yè e dzuun bo waa. 6 Mun nèe dèe m'a ka shi rii kpàdè ye ra, à na goo jikɔɔn ye jɔɔn waa. 7 À kpɛ̀yn na mun sàò mòdzian sapɛ yeè bà ni mun tsuru, ŋà à mòdzian sapɛ ko e re kɔ̀ì ge rìì Ŋaablà re. Sɔn naa nèe, kpɛr'laa yè bà kpɛrɛkuru.8 Mun nìi dèe kpiri bla rèè ko fùn shɔ̀ùn taan rèè rà, tɔ̀ rii yɛ ci nìi wù è mà, yè to nèe tsuru a ci mun. 9 Ŋà è ma ba nà dzi e yɛrɛ kun, yè furu fa, kàtsu fur'la fauma fyan kur'là byɛnbee mà. 10 Nìì reè furuɔ̀, mun nìi dèe twɛy ra, à to na mun dèvu waa, à Tsìfaà rìì dèvu, tɔ̀ rii yɛ, ci taàn mà bo e re kpir'la rè waa. 11 À to ye bo, à mà furu dɛ, tàmàfa è sèè e re kpir'la rè. Àwà kpir'la, tɔ̀ tsu mà e re tààn bàji waa. 12 Nìi dzyee rèè, mun nìi dèe twɛy rà, à to na Tsìfaà dèvu waa, tɔ̀ rii yɛ ci ɲɛyna bɛy taàn sɔn ye ba ni mùn neema kpir'la sɔn ne, à to y'à jà ci wo dzia tsùɔ̀ fa à re, à mà à bàji waa. 13 Tɔ̀ soo tsuru, ɲɛynamoo taan nì ye ba ni ɲɛyna bɛy kpir'le, à y'à jà wo dzia tsùɔ̀ fa à ka, à mà bo à re waa. 14 È ɲɛn à tsɛ, kpiri ɲɛyna bɛɛ, tɔ fɛnɛbeè e re tààn ɲɛynamoò saabu rɔn, tàan ɲɛyna bɛɛ yè bà fɛnɛbee e re kpiri ɲɛynamoo saabu rɔ̀n. À ma ba na tɔ̀ tsuru, è dzin nèè na nà bà mòdzin nooŋma ì, tɔ̀ to y'à tàrà è Ŋaablà raa. 15 Ŋà ɲɛyna bɛɛ sàò ye ba n'a re wò yeè tsùɔ̀ dzii bà, à y'à fa. Neema kpir'la, tàmafa taan, twɛy na shiɔ̀ tɔ̀ goò doùn waa, è ɲɛn à tsɛ, Ŋaabla ye kiriɔ rìì ye yè jaamabee fa jaancin na. 16 Àwà ɲɛynamoo taàn, w'a tɔ̀ wo ye ba nà a re kpir'la tsi ɔ ? Ɲɛynamoo kpir'là, wo sa y'a tɔ̀ wo ye ba nà a re tààn tsi ɔ ?
Pɔ̀lì ci Ŋaabla y'a kiriu à y'à to nìi tsuru, e to tà tsuru
17 Tɔ̀ nìn yè bo à ra, nìi bàu mòdzian soo soo sapɛ nin Tsìfaà re, Ŋaablà y'a kiriu à y'à to nìi doùn, è re jaamabee fa tɔ̀ tsɛ. Mun tɔ̀ rii shi tsuù beè ɲɛynamoo kur'lèè sapɛ re. 18 Àwà sɔn kiriu è tàrà à shɛɔn kɛ̀ ? À mà e shɛunmaà mɛnɛn waa ! Sɔn to kiriu è tàrà à na shɛɔn kɛ̀ ? À mà to è shɛn dɛ ! 19 A shɛun o, a na shɛn ò, tɔ̀ sɔn na pɛn waa. Nàfa ni nìi ɲàn, tɔ̀ rii yɛ, e Ŋaablà dzugooma xɔù rèè shi jiì. 20 Àwà Ŋaabla mòò sɔn sɔɔ̀n sapɛ kiriu à y'à to nìi tsuru, è to tɔ̀ tsuru. 21 Wo kiriu è wo to jòn nì ɔ̀ ? Maà tɔ̀ ka a vyɛɛ̀y waa. Ŋà e ba dzia xɔrɔnbe e bo à ɲan, tɔ̀ fa. 22 È ɲɛn à tsɛ, jòn nìi kiriɔ Tsìfaà ɲàn, tɔ Tsìfaà rè xɔrɔn. Tɔ̀ soo tsuru, xɔrɔn nìi sa kiriɔ, tɔ Kirisà rè jòn. 23 Tà doùn, e maà bà mòdzin ì rè jòn dɛ, kàtsu ye kùngɔ ma bou kpàxɔù rà. 24 Neema ì, e moò sɔn sɔɔ̀n sapɛ kiriu è to nìi tsuru, ye to tɔ̀ tsuru Ŋaablà jaa dzuun.
Nìi reè na furu fa ŋe, ko fùn shɔ̀ùn taan rèè, Pɔli nìi dèu twɛy raa furu goo tsɛ
25 Àwà nìì reè na furu ŋe, pɛn na ni mun ne m'a dè twɛy rà Tsìfaà rè dè ɲàn waa. Ŋà min n naa akir'la rii sìan, nìi mòdzin naa, mòo dzia ɲɛn nìi rà è ɲɛn Tsìfaà màtsuruumaà tsɛ mun na. 26 Mun nìi jàa ci à wù, tɔ̀ rii yɛ ci watsi ree xɔbee nìi boò, à wù mòdzian sapɛ ma è to nèe tsuru. 27 Wo tàan furuunà ɔ̀ ? Maà à gaa a fur'la sàn dɛ. Wo na tàan furuunà ɔ̀ ? Maà à gaa e tàan furu dɛ. 28 Ŋà e furu fa, a na gooɲaan faɔ̀ waa. Cangur'liì na kpiri tɔ, tɔ̀ sa ye furu, à na gooɲaan faɔ̀ waa. Ŋà furu fa reè nà byɛnbe riì jà e re jaamabee ɲàn, mun n'a re min ye tààn tɔ̀ rii mà. 29 Àwà neema reè, mun nìi dèe e ra, tɔ̀ rii yɛ ci watsia kurubeu. Tà doùn, dòònun, tàan ni nìì reè rè, y'à bà a ci tàan na ni è re waa. 30 Nìì reè gɛɛ, y'à bà a ci è na gɛɛ waa. Nìì reè taama dzi, y'à bà a ci è taama na dzi waa. Nìì reè fìɛ faa, y'à bà a ci gè na ni è suun waa. 31 Nìì reè dziɲan ree dzibe boò, y'à bà a ci è na à dzibe boò waa. È ɲɛn à tsɛ dziɲan ree ni niu'n kur'liì rà, tɔ nà dɔ̀n bo. 32 Mun nìi gaa, tɔ̀ rii yɛ ye mà vyɛ̀ɛ̀y waa. Mòò riì na furu faɔ̀ waa, tɔ̀ vyɛ̀ɛ̀ymaà Tsìfaà raa goo rèè rìì. È ɲɛn à tsɛ, à y'à gaa wò goo yè bà dzi Tsìfaà rà. 33 Ŋà mòò riì furu faɔ̀, tɔ vyɛ̀ɛ dziɲaan raa goo rèè rìì ka, è ɲɛn à tsɛ à y'à gaa wò goo yè dzibe e re tààn nà. 34 Tà doùn, à taraɔ̀ kàjaa fii rèe fi. Tɔ̀ soo tsuru, tàan nìi na kpiri seòn waa, ko canguru kpiri tɔ bɛɛ, twɛy vyɛ̀ɛ̀ymaà Tsìfaà raa goo rèè rìì, gè riì ni à to yè fɛnɛbe gɔɔ̀n ko akir'là kàjaa tsɛ. Ŋà tàan nìi furuɔ̀, tɔ vyɛ̀ɛ dziɲaan raa goo rìì ka. È ɲɛn à tsɛ, à y'à gaa wò goo yè dzibe e re kpir'la rà. 35 Àwà ye nàfa rìì kamà, mun tɔ̀ dèe ye ra. À na ni a ci m'a bàa ye mà fààn waa, ŋà ye bà ni goo fa nìi wù, ye yè bà shiɔ̀ Tsìfaà rà, ye mà tara waa.
36 Àwà mòò riì tàan màkuɔn, à y'a jà ci kur'là ɲanbee kamà wo nà goo dàà bɛy fa e makùn taàn nà, è ba dzia goo rèè fa e shi tsɛ a ci a dzi à ra nìi tsuru, nìi yɛ yè fur'la fa, yè tɔ̀ fa. À na gooɲaan faɔ̀ waa. 37 Ŋà, mòò riì y'à latigɛɔ̀ e dusùkuan sapɛ ka, à na à mà fààn waa, fɔ à y'à sàɔ rìì, è dzyèè à ka e yɛr'la dusukuan nà ci wo nà e makùn taàn latsuù, tɔ goowùù faa. 38 Tà tsuru, nìi yè e màkùn taàn fur'la, tɔ goowùù faa. Ŋà nìi na e raà fur'la waa, tɔ̀ raa fyan kɔn.