Pɔlì nìi dèu ɲɔ̀n sààkà shu rèè ɲɔɔ̀n tsɛ
8
1 Àwà nìi ɲɔ̀n saaka rèè shuà raa kàjaa, à saaben, mùn y'a tɔ̀ ci twɛ̀ɛ ni mùn sapɛ ɲan. Ŋà twɛ̀ɛ gè riì, tɔ mòdziìn blàbee e yɛr'le. Kɛ̀nbààbee rìì fààn wɔɔ̀ mòò ɲàn. 2 Mòdzian sɔn ye ba e kɛsɛɛ̀ ci wo goò sɔn tɔ, à na baà à tɔ̀ ŋe, a ci à wù è tɔ̀ nìi tsuru waa 3 Ŋà mòdzian sɔn ye ba Ŋaablà kɛniɔ̀n, à tɔ̀ tsìfa tɔ̀.4 Tà doùn, nìi ɲɔ̀n saaka rèè shuà raa ɲɔn goo, mùn y'a tɔ̀ ci ɲɔ̀n pɛn na ni dziɲaan doùn waa, ŋaablà kpɛrɛ to na ni Ŋaablà soo tɛ̀y waa. 5 À kpɛ̀yn sààben, gè ì jàtsi kuɔn jìrànxɔ rɔ̀n ko dzɔ̀nxɔɔ̀ sa tsɛ, ci twɛy ŋaablà ì, è bè wɔ fɔ ŋaablà reè ko tsìfa rèè na gè gìrìbè san. 6 Ŋà ɲe re, Ŋaablà soo pe rii ni, nìi Fàà, gè sapɛ boo tɔ̀ niì ɲan, mùn yeè bà à raa, ko Tsìfa soo pe, nìi Yesù Kirisà, gè sapɛ ni tɔ̀ niì baraka ɲan, ɲe sa ni nìi baraka ɲan.
7 Ŋà, tɔ̀ twɛ̀ɛ na ni mòdzian sapɛ ɲan waa. È ɲɛn à tsɛ, swey dɛ̀rɛɔ̀ tɔ̀ ɲɔ̀n goo riì rà, arì she tɔ̀ ɲɔ̀n sààkà shu rèè, y'à ɲɔɔ̀n. Tà tsuru è kòrò è akir'là fàan dzyɛ̀nbee ka, y'à jàa ci ye nooŋ. 8 Àwà ɲwɛyn nì fa mùn kpɛ̀rɛ̀ Ŋaablà ra waa. Mùn y'a ɲɔun o tɔ̀ fa gè bà mùn tɛ̀y, mùn to na à ɲɔn ò tɔ̀ fa gè bo mùn na. 9 Ŋà ye e yɛrɛ kaawɔ, ye xɔrɔnbeu nìi fa, tɔ mà nà bà fààn bɛy reè mɛɛ̀ saabu waa. 10 È ɲɛn à tsɛ, twɛ̀ɛ ni wo rìi ɲàn, mòò riì akir'là fàan dzyɛ̀n, tɔ̀ ye wo tsùuŋma jà ɲɔ̀n gba doùn ɲwɛyn na, tɔ̀ fa bà saabu tɔ̀ kùùn yè xɔbe ɲɔ̀n sààkà shù ɲɔɔn nà ɔ̀ ? 11 Tà tsuru, Kirisà saun tɔ̀ neema faàn bɛy riì kamà, wo raa twɛ̀ɛ nà tɔ̀ bara. 12 Ye tɔ̀ gooɲaan niì faa e neema reè rà y'a ka è akiri fààn bɛɛ mɛ̀ɲɛ̀, ye gooɲaan nee faa Kirisà rìì là. 13 Tɔ̀ kamà, sani ɲwɛyn yè bà mun neemaa mɛɛ̀ saabu, min shu ɲɔɔn jà m'a to mɔn peu, mun mà nà n neemaa mɛɛy waa.