Pɔlì wù nìi ka e re faagoò doùn, ko à raa faramaa nìi, à nìi dèu tɔ̀ tsɛ
9
1 Mun xɔrɔnama na ni gbɛ ? Mun na kɛɛradzin gbɛ ? Mun na Yesù, mùn Tsìfaà jà ɔ̀ ? Ye na mun ne faagoò fyɛ̀ Tsìfaà ɲàn ɔ̀n ? 2 Mun kɛ̀sɛɛn ma ba kɛɛradzin dzyee rèè rè, ye re kpɛyn, mun kɛɛradzin. È ɲɛn à tsɛ, ye rìì mun ne kɛɛradzinbee tàànmàshɛn tsuuŋma Tsìfaà ɲàn.3 Mun nà nìi ka n dzi dè n jaàkibaa rèè rà, tɔ̀ rii siin: 4 Ɲe yè bà ni ɲwɛyn ɲɔn ɲe yè mììn fa e re faagoò doùn, tɔ̀ shi na ni ɲe suun ɔn ? 5 Ɲe yè neema taan sɔn ba e re tààn ɲe yè b'a ka a ci kɛɛradzin dzyee reè, ko Tsìfaà tseyn nèè ko Piyɛr'laà tsuru, tɔ̀ shi na ni ɲe suun ɔn ? 6 Tà bwey à shi na ni mun ko Barinabasì bàsɔùn nì suun ɲe mà faagoo fa ɔ ? 7 Tsì rii dzia bà ni sùràshìbee rà, è sèè è yɛrɛ sar'la ? Tsì rii dzia gɔ̀ɔ̀ dzuà wɔ, è to à dziàn ɲɔn bɛy ? Tàmafa dzwɛka kplatsuubaa kɛ̀n ni dzia bà dzwɛkà rèè kpla tsuɔ, è to nɔnɔɔ mìn bɛy ? 8 Min ba twɛy goo rèè dèe è kòrò adamadzin mòdzin naa jàtsìkuan ka, Sàrìyaa sa na twɛy soo rìì dèra ɔ ? 9 Àwà à sɛbɛɔ̀n nàbi Musa re Sàrìyaa doùn ci: «Nìɛ̀ rè shìmàndzian faagoò fakɔɔn, maà à dziɛ̀ shì waa.» Tɔ̀ y'a kpàdèe ci nìì rèè raa goò rìì Ŋaablà vyɛrɔunà ɔ̀ ? 10 À na tɔ̀ goomaa dèe ɲe rìì kamà fyeu ɔ ? Taki kɛ, tɔ̀ goomaa sɛbɛun ɲe rìì kamà. È ɲɛn à tsɛ fɛɛfabaà wù è fɛɛ fa à si yè bà xɔ à tsɛ ci wo nà shìmàndzin gaa. Mòò riì shìmaan baan, à si wù è bà xɔ à tsɛ ci wo nà sɔn tarà. 11 Ɲe ye ba Ŋaablà re kɔ̀ì ge rèè shìmàndzian sìu ye fi, ɲe yè ye suun ge reè shìmaan gaa, tɔ blà geren o ? 12 À shi ye ba ni swey suun yè tɔ̀ goò shi jiì ye tsɛ, ɲe do, à shi na ni ɲe suun è geren twɛy tsɛ fyeu ɔ ? Tà ko e sa ra, ɲe na tɔ̀ shi jiiŋnà ye tsɛ waa, ŋà ɲe goò sapɛ rii tsiɔ e ma gè riì ni à to goo sɔn pɛn mà Kirisà rè Kùnàgoo Dziɔ̀ jɔɔn shu waa. 13 Ye na à tɔ̀ ci nìì reè faagoò faa Ŋaablà re gbà blàa doùn, twɛy dzii ra ɲwɛɛ̀n sa boò mɔn nì ɔ̀ ? Ci nìì reè saaka goo jaa boò saakabomaà tsɛ, è sa niàn ni twɛy saaka rèè ɲàn ɔ̀n ? 14 Tɔ̀ soo tsuru, nìì reè Kùnàgoo Dziɔ̀ dèe, Tsìfaà ci twɛy sa ɲwɛyn dzii ye bo Kùnàgoo Dziɔ̀ ɲàn. 15 Ŋà nìi mun, mun na twɛy goo rèè pɛn shi jiì m'a ka n dzi gaa waa, mun to na nèe sɛbɛn ne faa, m'a ka è tey fa waa. Min san, tɔ fyan, sani mòò yè tɔ̀ yɛ̀rɛ̀blàbè kuàn bo mun ɲan. 16 Àwà min Kùnagoo Dziɔ̀ dè, tɔ̀ na yɛ̀rɛ̀blàbè goo mun ne waa, ŋà à goo rìì, nìi mun mà fààn. Mun ma Kùnàgoo Dziɔ̀ dè fyeu, mun naà barau ! 17 Min ba na à faa n yɛr'la sàò tsɛ, mun na nà bà sàrà tàr'la à ɲan, ŋà è ba mun mà fààn ni, à faagoo, nìi kɛ̀ɛ̀yfaɔ̀ mun mà. 18 Mùn sàr'là kɛ̀nma ni tɔ̀un ? Tɔ̀ rii yɛ, mun Kùnàgoo Dziù rìi dèe min tɔ̀ dè maana, mun mà sɔ̀ɔ̀n à sàrà kpɛyn waa, à wù è tɔ̀ niì wɔ mun tsɛ.
Pɔl'lè faagoò fau'n kur'la mòdzian sapɛ kajaa tsɛ
19 Mun xɔrɔnama kɛsɛɛn ye ba ni mòdzian sapɛ kajaa tsɛ, min yɛrɛ bau è sapɛ re jòn, min bà ni è giri tàrà ba Kirisà raa 20 Dzyèèsìbee mòdzin neè ka, min bau a ci Dzyèèsìbee mòdzin, min bà ni è giri tàrà. Nìì reè ni Sàrìyaa dzuun, m'a bàu a ci mun sa ni à dzuun, tɔ̀ y'à tàrà mun na ni à dzuun waa, min bà ni Sàrìyaa dzuun dzin neè tàrà. 21 Tɔ̀ soo tsuru, sàrìyà bɛy reè ka, min bau a ci sàrìyà bɛy, min bà ni twɛy tàrà. Tɔ̀ to y'à tàrà mun na Ŋaablà raa Sàrìyaa bɛy waa, è ɲɛn à tsɛ mun ni Kirisà raa Sàrìyaa dzuun. 22 Nìì reè ŋɔn fyɛn, mun sa ye n bau a ci ŋɔ̀n fyɛn, min bà ni twɛy tàrà. Mun yè n bau gè sapɛ mòdzian sapɛ kamà, a ni dzi ba nìi tsuru fau'n kur'la sapɛ ra, min swey tsi. 23 Mun tɔ̀ sapɛ faa Kùnàgoo Dziɔ̀ rìì kamà, gè riì n'a to mun sa yeè bà ni n nin tàrà à ɲan dzyee rèè ka.
Pɔlì goo nìì ree ka faagoò fau'n kur'la shɔ̀ùn minan fau
24 Ye na à tɔ̀ ci nìì reè vwɛ̀ɛ vwɛ̀ɛ̀yfama nɔn, ci è sapɛ kpɛyn vwɛ̀ɛ, ŋà mòò sɔn nì blàbè geè tàr'la ɔ ? E sa yeè vwɛ̀ɛ̀y, ye bà ni tɔ̀ blàbè geè tàrà. 25 Nìì reè sapɛ si dan vwɛɛ̀ faa, è goo xɔù giri jia e yɛrɛ jɔɔn, y'à ka e mabyɛ̀n. Tɔ̀ to y'a tàrà è tɔ̀ faa màsà baanfla kpɛyn, nìi bar'la. Ŋà ɲe raà màsà baanfla, nìi na bar'la waa. 26 Tɔ̀ kamà min ba vwɛ̀ɛ, mun na vwɛɛ n kun nè waa, mun to ye ba sikuu maa faa, mun na tɔ̀ maa gànè xɔ ɲan waa. 27 Ŋà mun goo ɲɛɛn n gɔɔ̀n tsɛ, m'a jònbè kun, gè riì ni à to Kùnàgoo Dziɔ̀ dèumaà shɔ̀ùn dzyee rèè rà, mun yɛ̀r'la dzii yè bo waa.