Pɔlì jaa kpadei rìì fau Isirayɛdzin neè raa goò ka jènjàà kor'nà doùn
10
1 Àwà neema ree, mun sàò na ni ye yè to nèe goo rèe tɔ̀ bɛy waa. Ŋaamun'na bàu ni ɲe fàbɔɔ rèè sapɛ tsɛ è boumaà doùn Misiran jamaan doùn, è sapɛ to kòòyu xeo fuuŋ. 2 Musà ka, è sapɛ jaara fòoŋ ŋaamun'na ko kòòyua ɲàn. 3 È sapɛ ɲwɛyn soo ɲɔun, nìi na Ŋaablà re ɲwɛyn. 4 È sapɛ yeè mììnge soo min, nìi na Ŋaablà re mììnge, è ɲɛn à tsɛ è na yuà mìan jèn kpaa ra, nìi na gbaɔn è kpɛyn. Tɔ̀ jèn kpaa to na Kirisà rìì. 5 Àwà twɛy mòdzin neè fàan pɛn goo na dzibe Ŋaablà ra waa, è ɲɛn à tsɛ, è fun bo jiu min niì sapɛ jènjàà kor'na doùn. 6 Twɛy goo rèè fau nì, yè bà ni mùn jaa kpàdè gè riì ni à to mùn mà e jaan bo kur'la goo ɲaan neè rè, a ci è jaàn bou à re nìi tsuru waa. 7 E maà bà ɲɔ̀nkɔbaa a ci è swey na ni nìi tsuru waa. È kòrò Ŋaablà re Goomaa ka, à sɛbɛɔ̀n nèe tsuru ci: «Jàmaà yè tsuuŋ yè ɲwɛɛn ɲɔn yè mìɛn fa, yè fù yè ɲuun fa.» 8 Mùn mà bà kɛ̀kɛ̀ɛ̀y gòòfabaa ì a ci è swey y'à fau nìi tsuru waa, fɔ è bè wɔ è mòkun gbaa mòo zhììgi ye san bwèy sɔn doùn. 9 Mùn mà Kirisà dzuun bo a ci swey y'à fau è ɲan nìi tsuru waa, fɔ è bè wɔ myɛn ì yè nà è cin vu. 10 E to mà ŋùnùnŋunun fa a ci swey y'à fau è ɲan nìi tsuru waa, fɔ è bè wɔ xɔnbobaà yè è vu. 11 Twɛy goo rèè sapɛ yeè è tàrau, yè ka jaa kpadei fa, tà ko yè sɛbɛn, yè bà ni mùn kàràn, mùn nìì reè wɔɔ watsi lataan tsɛ. 12 Tà doùn, mòò riì y'à jàa ci wo ni e san tsɛ, tɔ̀ yeè e yɛrɛ kun, à mà nà mɛɛy waa. 13 Àwa dzuunboi pɛn na na ye ma, nìi na adamàdzin mòdzin tar'la waa. Ŋà Ŋaabla vusootsi. À fa à to dzuunboi yè ye tàrà nìi nà geren ye fàan bɛ̀r'la tsɛ waa. Dzuunbweè ye na, à nà boma dzii sin ye ra, ye yè bà ni dzi à ku.Pɔlì ci dzyèè na ni è ko kwey rèè fi waa
14 Tɔ̀ kamà mun ne kɛ̀niunma rèè, ye vwɛ̀ɛ̀y ɲɔ̀n kɔɔ jɔɔn. 15 Mun goomaa ye ka a ci mòdzin akirima ì, e sa yeè mun ne goomaa doùn gaa siin. 16 Àwà mùn baraka sìan Ŋaablà ra è ɲɛn dzwɛɛ̀ yukuun niì tsɛ, tɔ̀ na à kpàdèe ci mùn ko Kirisà gè soo à tsìɛn baraka rɔ̀n ɔ̀n ? Mùn to bur'liì tan'nà e si ra, tɔ̀ na à kpàdèe ci mùn gè soo Kirisà gɔɔ̀n baraka rɔ̀n ɔ̀n ? 17 Àwà bur'la buru kunun soo nìi fa, ɲe ko e giribee sa, ɲe gɔn soo rii. È ɲɛn à tsɛ, ɲe sapɛ tɔ̀ buru kunun soo rìì tan'nà e si ra. 18 Ye siin fa Isirayɛlidzin neè kàjaa tsɛ siin. Nìì reè saakabomaà tsɛ saaka shuà ɲɔɔ̀n, tɔ̀ na twɛy ko saakabomaà bàa gè soo ɔ ? 19 Mun n'a re min fee dè tɔ̀un ? Ci saaka rìi boo ɲɔ̀ɔ̀n rè, tɔ̀ shuà, tàmafa ɲɔ̀ɔ̀n yɛ̀r'la, ci nàfa ni twɛy ɲàn gbɛ ? 20 Àyi dɛrɛ ! Ŋà mun nìi dèe, tɔ̀ rii yɛ, ci è tɔ̀ saaka rìi boò, y'à boò kwey rèè rìì lè, à na Ŋaablà waa. Mun to na à gaa ye ko kwey rèè yè bà gè soo do. 21 Ye fa dzi mìɛn fa Tsìfaà rè yukuɔn nà, y'a fa kwey rèè raà sa ra waa. Ye to fa dzi ɲwɛɛ̀n ɲɔn Tsìfaà rè tàbàr'la rà, y'a ɲɔn kwey rèè raà sa ra waa. 22 Tàà mùn sào ni min jaaɲininbe rìì ɲan fu ji Tsìfaà ɲàn gbɛ ? Fàan ni ɲe ɲan à mà ɔ̀n ?
Pɔlì ci mùn ne goo fakɔɔn sapɛ yeè nɔɔrɔ ɲɛn Ŋaablà tsɛ
23 Goò sapɛ dàaŋnà, tɔ sààben, ŋà nàfa na ni goò sapɛ ɲan waa. Ɔ̀ɔn, goò sapɛ dàaŋnà, ŋà goò sapɛ na fààn siàn waa. 24 Mòò pɛn mà e yɛrɛ nafa gaa waa fɔ e modzìnsia raà. 25 Gè o ge gɔɔ̀ shu sii rɔn, y'a ɲɔn e maà tey fa waa, e akir'là mà nà e jaàki. 26 È ɲɛn à tsɛ, dzɔ̀nxɔɔ̀ ko e tsɛ gè rèè sapɛ Tsifaà rìì laa. 27 Ɲɛyna bɛɛ sɔn ye e kiri ɲwɛyn na, e ye e tsiì ye bè, è gè o ge sìn e ra, y'a ɲɔn e maà tey fa waa, e akir'là mà nà e jaàki. 28 Ŋà mòò ye dzin e ra ci «à ɲɔ̀n sààkà shu», mòò riì tɔ̀ dèu, è ɲɛn akir'là raa goò tsɛ, tɔ̀ tsìfa kamà, e maà à ɲɔn waa. 29 À na ye raa akir'là gooma dekɔɔn mìin waa, ŋà à y'à tsìfa raà rìì, kàtsu fèe bèe à to mòò kpɛrɛ akiri yè mun xɔrɔnbeumaà jààki ? 30 Mun baraka sìan Ŋaablà ra min ɲwɛyn nìi ɲɔn, fee bèe bà mun tsoo bara kun tɔ̀ ɲwɛɛ̀n kamà, mun to baraka siɔ̀n Ŋaablà ra ? 31 Tà doùn, e ɲwɛyn nì ɲɔɔ̀n ò, e to yè miàn nì ò, e goo o goo rìì faa, y'a fa, y'a ka nɔɔrɔ ɲɛn Ŋaablà tsɛ. 32 E maà bà mòò pɛn sàn nà baan kpàà. A ci à Dzyèèsìbee mòdzin o, à kun kpɛrɛ mòdzin o, à to Ŋaablà re ɲɛynamoo kur'là rìì ò, e maà bà mòò pɛn sàn nà baan kpàà. 33 Mun sa tɔ̀ rii faa, nìì yɛ goò sapɛ doùn, min dzibe mòdzian sapɛ ra. Mun na n yɛrɛ nafa gaa waa, fɔ mòò giri nàfa, gè riì ni à to yè tsi.