11
1 Ye bà mun shɔ̀ùnminanbaa ì, a ci mun sa Kirisà shɔ̀ùnminanbaa nìi tsuru.Pɔlì nìi dèu kpir'la ko taàn raa goo tsɛ ɲɛynamoo kur'là ɲàn
2 Mun tsoo dzi ɲɛɛn ye tsɛ, è ɲɛn à tsɛ, goo gè o ge, ye taa ni mun mà, mun to kàr'nìi sìun ye ra, y'a màraɔ̀ a ci m'a sìun ye ra nìi tsuru. 3 Ŋà mun sào ni ye yè goo soo tɔ, nìi yɛ, ci Kirisà rìì kpir'la sapɛ kuntsii, taàn kùntsiɛ̀ kpir'la, Ŋaablà yeè bà Kirisà kùntsiɛ̀. 4 È ɲɛn tɔ̀ tsɛ, kpiri o kpiri Ŋaablà mafyɛ̀ɛn, tàmafa è bà kɛɛrabe faa e kungɔɔ̀ tsyee tsùuŋma ka, tɔ̀ yeè e kuntsiɛ̀ rìì kùngɔ sùùrua. 5 Tàan o tàan to Ŋaablà mafyɛ̀ɛn tàmafa è bà kɛɛrabe faa e kungɔɔ̀ dzii tsyee bɛy ka, tɔ̀ yeè e kuntsiɛ̀ rìì kùngɔ sùùrua. Àwà, à ni a ci è kungɔɔ̀ kpaa boo rìì. 6 Taàn kùngɔɔ̀ ye ba toò tsyee bɛy, à y'à kpaa bo. Ŋà taàn ye ba à jàa ci kùngɔ̀ tsɛ̀ tsyɛɛ tàmafa à kpaa boò seeyra goo, tà bwèy à y'à tsyee. 7 Nìi kpir'la, tɔ̀ na wù è kungɔɔ̀ tsyee waa, kàtsu, à Ŋaablà bosià ko à nɔɔrɔɔ̀ rìì. Taàn, tɔ̀ yeè bà kpir'la nɔɔrɔɔ̀. 8 È ɲɛn a tsɛ, kpir'la rìì na bo taàn ɲàn waa, ŋà taàn nì bou kpir'la ɲàn. 9 Kpir'la to na ɲɛn taàn kamà waa, ŋà taàn nì ɲɛun kpir'la kamà. 10 Tɔ̀ kamà, mɛ̀rɛ̀kɛ rèè kamà, à wù gè yè bà ni taàn kuùn, fàan tààmànshɛn. 11 Tà ko e raà sa, Tsìfaà ɲàn, taàn na ni kpir'la shɔ̀ùn waa, kpir'la tsu to na ni taàn shɔ̀ùn waa. 12 È ɲɛn a tsɛ, taàn bou kpir'la ɲàn nìi tsuru, kpir'la sa kere boò taàn ɲàn, è sapɛ yeè bà boo Ŋaablà ɲan. 13 Ye sa y'a kɛ̀sɛ siin. À dàaŋna taàn yè Ŋaablà mafyɛ̀n à kùngɔɔ̀ dzii mà bà tsyeeŋna ɔ ? 14 Goo rèè niu'n kur'la yɛ̀r'la na ye kàr'na ci kpir'la yè kùngwɛ̀yn gbaan to e kuùn, tɔ cèù boo goo ɔ ? 15 Tɔ̀ to y'à tàrà, kùngwɛ̀yn gbaan, tɔ nɔɔrɔ rìì ɲɛɛn taàn tsɛ, è ɲɛn a tsɛ kùngwɛ̀yn gbaan sìun à ra rii, è bà à kùùn tsyee gè. 16 Àwà sɔn ye ba e kɛsɛɛ̀ è tɔ̀ goò sɔ̀swɛɛy fa, ɲe na dɛ̀rɛɔ̀ tɔ̀ ra waa, Ŋaablà re ɲɛynamoo kur'lèè tsu to na dɛ̀rɛɔ̀ tɔ̀ ra waa.
Pɔlì nìi dèu Tsìfaà rè ɲwɛyn goo dèumaà tsɛ
17 È mun dzii to tɔ̀ shi kpadèkɔɔn reè rà, mun fa dzi ye tsoo dzi kiri waa. È ɲɛn à tsɛ, ye ye e ladzyèè, sani tɔ̀ yeè bà goowùù, tɔ bàa ɲaan ni. 18 Soore, mun y'à myɛ̀un ci ye ye e ladzyèè ɲɛynamoo kur'là rè làdzyee ko'ùn, ye fi bàa vyɛɔ̀. Kàjaa sɔn tsɛ, mun dzia ɲɛn tɔ̀ ra. 19 Fɔ ye vu to yè tar'li, ɲɛynamoo dzii tsyɛunma rèè yè bà ni kpadè ye fi. 20 Tà doùn, ye ye e ladzyèè, à na baà Tsìfaà rè ɲwɛyn goo dèumaà ɲɔnkɔɔn dɛ waa. 21 È ɲɛn à tsɛ, ɲwɛɛ̀n watsi ye wɔ min niì, ye soo soo sapɛ tabee ye yè e raa ɲwɛyn nèè ɲɔn. Tɔ̀ tsuru swey dzukɔɔn bàa ni, swey to yè e min cɛɔn. 22 Tsii na ni ye re ye yè bà ni ɲwɛyn ɲɔn ye yè mììn fa mɔn gbɛ ? Tàà ye Ŋaablà re ɲɛynamoo kur'la rìì ɲanfyɛnbee, ye yè seey ka gè bɛy reè rà gbɛ ? Mun wù min fee rìì dè ye ra ? Min ye tsoo dzi kir'lì gbɛ ? Tɔ̀ kàjaa tsɛ mun fa ye tsoo dzi kiri waa.
23 Àwà mun nìi tàrau è bo Tsìfaà rè, min bà à ladziu ye tsɛ, tɔ̀ rii siin: Tsìfa Yesù, à ci e ye wɔ suun fen nìi ɲàn, à buru seun. 24 À re baraka sìunma shɔ̀ùn Ŋaablà ra, à y'à kɛɛy kɛɛy, è dzin ci: «Nèe mun gɔɔ̀n rìì yɛ, nìi ye raa. Ye tɔ̀ faa, y'a ka e taa to mun ne.» 25 Tɔ̀ soo tsuru ɲwɛɛ̀n shɔ̀ùn, è yukuɔn sen, è dzin ci: «Nèe yukuun nee Dzyèèsìbè yee rìì, mun tsìɛn ɲàn. Ye tɔ̀ fa à mìn sapɛ, y'a ka e taa to mun ne. 26 È ɲɛn à tsɛ, ye ye nèe bur'le ɲɔn watsi o watsi, ye yè nèe yukuun nee mììn fa, ye Tsìfaà saàn rìì gooma deè, è bè suu fɔ à nàà dzu. 27 Tɔ̀ kamà, mòò riì nà bur'la ɲɔn, è Tsìfaà rè yukuɔn mììn fa dààbɛ̀yma, tɔ jààki gaaŋ e yɛrɛ kɔ, è ɲɛn Tsìfaà gɔɔ̀n ko a tsìɛn tsɛ. 28 Tà doùn, mòò sɔn sɔɔn sapɛ yeè siin fa e yɛrɛ ɲan, è kòmànà bur'lee ɲɔn, è yukuun nee mììn fa. 29 È ɲɛn à tsɛ, mòò riì bur'la ɲɔɔ̀n è mìɛn fa, à to na Tsìfaà gɔɔ̀n goo rèè tɔ̀ boo e si ɲan waa, tɔ kitsi mɛɛ̀ e yɛrɛ tsɛ ɲwɛyn nèe ko mììn nee yè bà saabu. 30 Tɔ̀ rii kamà ɲìnìnkɔɔn ko fààn bɛɛ giri ye fi, mòò giri sa to yè san. 31 Mìn ba na e yɛrɛ ɲansiɛ̀n, kitsi fa ni kunun mùn tsɛ waa. 32 Ŋà Tsìfaà kitsia kùn'na mùn tsɛ rìì, è mùn koron, kitsia mà nà mɛɛy mùn tsɛ ko dziɲaan ka waa. 33 Tà doùn n neema ì, e ye e ladzyèè ye bà nà ɲwɛɛ̀n ɲɔn, ye e si màshu. 34 Dzu ye ba ni mòò rà, è ɲwɛyn ɲɔn e re tsii, gè riì ni à to e ma nà e ladzyèè ye kitsi mɛɛy e yɛrɛ tsɛ waa. Nìi goo dzyee reè, min na wɔ mɔn, mun nà twɛy jaa bo.