Ŋaablà re Dzia rè kɔ̀ì ge rèè
12
1 Àyìwà neema reè, nìi Ŋaablà re Dzia rè goo rèè kàjaa tsɛ, mun sàò na ni ye to twɛy goo rèè tɔ̀ bɛy waa. 2 Y'a tɔ̀, ci watsi riì bwèy ye naà Ŋaablà tɔ waa, ye na shiɔ̀ ɲɔn ì nà, yè ye re jaamabee kuru kun, nìì reè na goomaa waa. 3 Tɔ̀ rii y'à to mun n'a re y'a tɔ̀ ci mòò pɛn na dzia dzin Ŋaablà re Dzia baraka ɲan, ci Yesù yè bà dangaɔ̀ waa. Mòò pɛn to na dzia dzin ci Yesù Tsìfa, à mà bà Ŋaablà re Dzi Fɛnɛɛ baraka rɔ̀n waa.» 4 Àwà Ŋaablà re kɔ̀ì ge rèè kun giri, ŋà à sapɛ Dzi soo pe rii. 5 Faagoo faramaà kun giri, ŋà à sapɛ faa Tsìfa soo rìì lè. 6 Faagoò fau'n kuru sa giri, ŋà Ŋaablà soo rìì y'à sapɛ faa mòdzian sapɛ ɲan. 7 Ŋaablà re Dzia rè faagoo fakɔɔn siɔ̀n mòò sɔn sɔɔn sapɛ ra rìì, mòdzian sapɛ yeè bà ni à nàfa tàrà. 8 Akiritsifabe goòmàà, Ŋaablà re Dzia tɔ̀ sìan sɔn na. Twɛ̀ɛ goomaa, è tɔ̀ sìn sɔn na tɔ̀ Dzi soo rìì baraka ɲan. 9 Tɔ̀ Dzi soo rìì ɲɛyna gban gban siàn sɔn na, tɔ̀ dzi soo yè ɲìn'nèè cɛrɛmabeè dzia sìn sɔn na. 10 À kabagoo goo reè faa dzia sìan sɔn na, è kɛɛrabe gooma rèè dèè dzia sìn sɔn na. À dzi siàn sɔn na e dzi dzi reè tɔ̀ bo e si ɲan, è dzi sin sɔn na, è bà dzia kungoòmà kpɛrɛkuru ì dè. È dzi sin sɔn na kɔn, tɔ̀ yeè bà dzia kungoòmà kpɛrɛkuru ì dzuun de. 11 Dzi soo rìì tɔ̀ sapɛ faa mòdzian ɲàn, è sa kɔ e raa kɔ̀ì ge ra, a ci à dzi à ra nìi tsuru.Pɔlì gɔɔ̀n ka jaa kpadei fau min niì kɔ̀ìge rèè tsɛ
12 Àwà mòdzian gɔɔ̀n gɔn soo pe rii, à gàne rèè yè bà giri. Gɔɔ̀n gàne rèè giribee ko e raà sa, à soo pe nìi tsuru, Kirisà sa tà tsuru. 13 À tɔ̀ tsuru, è ɲɛn à tsɛ, mùn sapɛ jaara fòoŋ tɔ̀ Dzi soo rìì baraka ɲan, mìn bà gɔnkungɔ soo. Dzyèèsìbee mòdzin sen ɲɛn kun kpɛrɛ tsɛ, jòn sen ɲɛn xɔrɔn tsɛ. Mùn sapɛ to yè e miun tɔ̀ Dzi soo rìì baraka ɲan. 14 Tɔ̀ tsuru, gɔɔ̀n na gàne soo basɔùn waa, ŋà à gàne rèè giri. 15 Sààn ye dzin ci mun na si nìi fa waa, tɔ̀ kamà mun na gɔɔ̀n gàne, tɔ̀ ni dzi à to à mà bà gɔɔ̀n gàne o ? 16 Tor'là to ye dzin ci mun na jaadzin nìì fa waa, tɔ̀ kamà mun na gɔɔ̀n gàne, tɔ ni dzi à to à mà bà gɔɔ̀n gàne o ? 17 Gɔɔ̀n sapɛ ladzyèèmaa yè bà na jaadzin, toro mà bà ni waa, à na nà myɛ̀yn fa dzùrù ? À sapɛ ladzyèèmaa to yè bà na toro, xɔn mà bà ni waa, à na nà kinin myɛ̀n dzùrù ? 18 Ŋà, Ŋaabla gɔɔ̀n gàneè soo soo sapɛ tsuuŋ nì, a ci à dzibeu à ra nìi tsuru. 19 À sapɛ ye ba na gàne soo rii, gɔɔ̀n na nà bà ni min ? 20 Tà doùn, gɔɔ̀n gàne rèè giri, ŋà à gɔnkungɔ soo rìì. 21 È ɲɛn tɔ̀ tsɛ, jaadzian na dzia dzin sià rà ci: «Mun màgoo na ni wo ɲan waa.» Kùngɔɔ̀ tsu to na dzia dzin sàn nèè rà ci: «Mun màgoo na ni ye ɲan waa». 22 È geren tɔ̀ sapɛ tsɛ, arì gàne nìì reè ni ci è ŋɔn fyɛn, twɛy sa magòò wubee ni. 23 Mùn y'a kɛ̀sɛɛ̀ blà bɛrɛ na wù e wɔ gɔɔ̀n gàne nìì reè ɲàn, mùn twɛy rìì blàbee cɛyn. Mùn to nìì reè jàa seeyma gane, mìn magoo wɔɔ̀ twɛy rìì ɲàn cɛyn. 24 Nìì reè na seeyma gane, twɛy màgoo na ni tɔ̀ ra waa. Ŋà blàbe gbaɔ̀ nìì reè mà, Ŋaabla gɔɔ̀n lamɔnɔun, è blà wɔ twɛy ɲàn cɛyn. 25 À tɔ̀ fau, gè riì ni à to dànboi mà jà gɔɔ̀n gàne rèè ko e si fi waa, ŋà yè dzyèè, yè e taa to e si re. 26 Tà tsuru, gɔɔ̀n gànee sɔn ye ba byɛɛn, dzyee rèè sapɛ rii byɛɛn ko a ka. Nɔɔrɔ ye ɲɛn sɔn tsɛ, dzyee rèè sapɛ rii taama dzibee ko à ka. 27 Àwà, ye rìì Kirisà gɔɔ̀n, ye soo sookɔɔn sapɛ yeè bà gɔn nèe gàneè sɔn. 28 Tà tsuru, Ŋaabla mòdzin ì bou è tsùù ɲɛynamoo kur'là jɔɔn nìì reè yɛ: jɔ̀naà, tɔ kɛɛradzin neè, fiiraa, tɔ kɛɛra reè, zhììgiraa, tɔ kàrànfa rèè. Tà shɔ̀ùn, nìì reè kabagoo goo reè faa, ko ɲìn'nèè cɛrɛmabeè dzia siɔ̀n nìì reè rà, dzwɛ̀mà faa dzia, kurukuin faa dzia, ko kungooma kpɛrɛ dee dzia. 29 È sapɛ rii kɛɛradzin gbɛ ? È sapɛ rii kɛɛra ɔ ? È sapɛ rii kàrànfa ɔ ? È sapɛ rii kabagoo goo reè fara ɔ ? 30 Ɲìn'nèè cɛrɛmabeè dzia ni è sapɛ rii lè ò ? È sapɛ rii kungoòmà kpɛrɛkuru ì dèra ɔ ? È sapɛ rii kungoòmà kpɛrɛkuru ì dzuun derà ɔ̀ ? 31 Ŋaablà re kɔ̀ì ge rèè sapɛ ɲan, nìì reè fyan è sapɛ ma, ye sɔ̀ɔ̀n twɛy rìì kpɛyn. Àwà, à shi niì wù dzyee rèè sapɛ ma, mun nà tɔ̀ kpàdè ye ra.