Pɔlì nìi dèu Yerusalɛmùn ɲɛynamoo kur'là dzwɛ̀mà goo tsɛ
16
1 Àyìwà, nìi sitɛy goo raa kàjaa, tɔ̀ niì wù è bè sìn Ŋaa re mòdzìn neè rà è ka è dzwɛ̀ma, mun shi niì reè kpàdèu Galasi mar'la ɲɛynamoo kur'lèè rà tɔ̀ kàjaa tsɛ, e sa y'a shi jiì tɔ̀ tsuru. 2 Shikuan jisee jɔna sapɛ, e soo sookɔɔn sa yeè ɲɛɛn sɔn bo tsùù e taàkuùn e sa ko e bɛrɛ, gè riì ni à to min wɔ mɔn, ɲɛyn ladzyee goo mà jà à ɲan dɛ. 3 Min be wɔ mɔn watsi riì bwèy, ye ɲɛɔ̀n nìì reè rà, mun nà twɛy ka ko sɛbɛn ì ka, yè bè ye re kɔ̀ì ge rèè ka Yerusalɛmùn. 4 È be to ci mun yɛ̀r'la sa wù min bè, è dzia bè ko mun ka.Pɔl'lè goo farama kpɛrɛkuru ì
5 Mun nà dɔ̀n Maseduwani mar'la ɲàn, min wɔ ye re mɔn. È ɲɛn à tsɛ, mun nà Maseduwani mar'là fi shɛn dɔ̀n. 6 Gè sɔ̀n ge mun nà to ye ka mɔn min watsi dɛyn fa, arì mùnkɛɛ̀ watsia sapɛ, gè riì ni à to, ye mun dzwɛ̀ma n ne jìɛ̀ dzyee doùn min dzi wɔ n wɔmà. 7 Àwà, nèe sàn nèe ɲan, mun na ni à re mun dɔ̀n bokɔɔn basɔùn yè ye jà waa, mun ni à re sa min watsi dɛyn fa ye ka, Tsìfaà ye e tsiì à ra. 8 Ŋà mun nà to Efɛsì wɔ̀ rɔ̀n, fɔ Pantekɔtsi sɛr'la watsi yeè bè wɔ̀. 9 È ɲɛn à tsɛ dzii bla saɔ mun ne tɔ̀ gàneè ɲàn è kòrò ko mun ne faagoò ka, ɲan rèè sa to yè bà giri. 10 Tsìmotè ye wɔ mɔn, e maà à to goo sɔn pɛn y'à shi e fi mɔn waa, kàtsu à sa Tsìfaà rè faagoò faa a ci mun. 11 Mòò pɛn mà à ɲanfyɛnbe waa. Ye wɔ à ra y'a kèèse e re jìɛ̀ doùn è sèè wɔ n tsɛ xɛɛrɛ ra, kàtsu mun y'à ko neema dzyee reè sa mashuà. 12 Nìi Apolɔsì, mùn neema kpir'la, mun tɔ̀ màxɔun cɛyn, à ko neema reè yè bà ni be bo ye kpà, ŋà dòònun kpɛ̀yn, à sàò na n'a re è bè waa. È na watsi tarà, à nà bè.
13 Ye to e jaa ra, e san gbaunma yè to ɲɛynaà ɲàn. Ye bà kpiri ì, fààn ye bà ni e ɲan. 14 Ye goò sapɛ fa ko kɛ̀nbààbe ka e fi. 15 Àwà neema reè, y'a tɔ̀ ci Sitefanasì ko e re mòdzìnbee rìì bàu Akayi mar'la ɲɛynamoo jɔ̀na rèè, è to yè e shiu faagoò rà Ŋaa re mòdzin neè rè. Tà doùn mun nà nìi gaa ye re, tɔ̀ rii yɛ, 16 ci ye e majàà twɛy mòdzìn tsu rèè rè, ko nìì reè sapɛ faagoò faa ko è ka, yè bà ni tɔ̀ faagoo xɔù soo rà. 17 Sitefanasì, ko Fɔritunatusì, ko Akayikusì nàuma bo mun kpà, tɔ mun taama dzibeò fɔ è bè geren. È ɲɛn à tsɛ ye na ni niì fa waa, è tɔ̀ kɔ̀ɔ̀ tsyeeŋ mun ne. 18 Àwà è mun akiri tsùuŋ, yè ye sa akiri tsùù. Twɛy mòdzìn tsu rèè, ye è nàfaà tɔ̀.
Pɔl'lè tswɛ̀y làtaan
19 Azhi mar'la ɲɛynamoo kur'lèè ye tswàa. Akilasì ko Pirisiyè sa ye tswàa cɛyn Tsìfaà ɲàn ko ɲɛynamoo kur'lìi yè e ladzyèe è re tsii rɔ̀n. 20 Neema dzyee reè sapɛ ye tswàa. Ye e si tswà kɛ̀nbààbè tswɛy ka.