Yesù Kirisà kpunan goo è bo saàn ɲàn
15
1 Àwà neema reè, mun ye toro kɔ̀u Kùnàgoo Dziù rìi rà, ye yè bà e tsiiŋ à ra ye to yè bà e shiɔ̀ à ra, mun ye taa toò tɔ̀ rii lè. 2 Tɔ̀ rii baraka sa ɲan ye tsià, e kpɛynto ye to à tsɛ a ci mun y'à dèu ye ra nìi tsuru. Tà boshɔ̀ùn, kùn fa bà ni e re ɲɛynaà nà waa. 3 Mun yɛ̀r'la kàràn nìi tàrau, mun tɔ̀ jɔna deu ye ra, nìi yɛ, ci Kirisà saun ɲe re gooɲaan tsii reè kamà, a ci à sɛbɛɔ̀n Ŋaablà re Goomaa doùn nìi tsuru. 4 À fun wɔu, à bwèy zhììgìraa sii sèè è sèè kpunan bo saàn ɲàn, a ci à sɛbɛɔ̀n Ŋaablà re Goomaa doùn nìi tsuru. 5 È yɛrɛ kpadèu Piyɛr'là, tà shɔ̀ùn è yɛrɛ kpadè kɛɛradzin teeŋ fiɛ̀ rà. 6 Tà shɔ̀ùn kɔn, è yɛrɛ kpadè neema reè càànmoò nùn ko e bonè rà. Twɛy giri jaama ni ŋe, swey yè bà saɔn. 7 Tà shɔ̀ùn kɔn è yɛrɛ kpadè Yàkubà rà, tà ko è yɛrɛ kpadè kɛɛradzin neè sapɛ ra. 8 À sapɛ latanma nɔ̀n, è yɛrɛ kpadè mun sa ra, mun nìi ni a ci dziin nìi kere gbaɔ̀ e jisee ma. 9 È ɲɛn à tsɛ, mun nì kɛɛradzin neè sapɛ ɲan kiɲaaniàn. Mun yɛ̀rɛ̀ na wù min kiri kɛɛradzin tsu waa, kàtsu, mun Ŋaablà re ɲɛynamoo kur'là byɛun. 10 Ŋà, mun nìi she, mun bàu tɔ̀, Ŋaablà ɲanwùɔ rìì baraka ɲan. À ɲanwùɔ to na ba goo maana mun kàjaa tsɛ waa, è ɲɛn à tsɛ, mun faagoò fau è geren è sapɛ tsɛ. À to na mun yɛ̀r'la waa, fɔ Ŋaablà ɲanwùù riì ni mun ka. 11 Tɔ̀ doùn, nìi mun ò, nìi ye ò, ɲe nìi gbango faa, ye to yè bà ɲɛun à ra, tɔ̀ rii yɛ.12 Àwà mìn ba waajibia faa ci Kirisà sèè kpunan bou fùn nèè fi, fee bèe à to swey ye jà ye ɲan, twɛy yè bà dziàn ci fùn nèè fa sèè kpunan ? 13 Tà doùn, fùn nèè ma ba sèè kpunaàn, Kirisà tsu na seè kpunan kɛ̀. 14 Kirisà to ma ba sèè kpunaun, tɔ̀ y'a kpàdèe ci mùn waajibi riì faa tɔ maana, ye re ɲɛynaà sa ye bà maana. 15 Tɔ̀ y'a kpàdèe sa ci ɲe shɛɛrɛ doodebaa ì Ŋaablà kajaa tsɛ. È ɲɛn à tsɛ, ɲe y'a shɛɛrɛbee faa ci Ŋaabla Kirisà sèè kpunaun è bo fùn nèè fi, tɔ̀ to y'à tàrà à na à sèè kpunan waa, è ba sààben n dzi, ci fùn nèè na seè kpunaàn waa. 16 Àwà fùn nèè ma ba sèè kpunaàn, tɔ̀ y'a kpàdèe ci Kirisà tsu na see kpunan waa. 17 Kirisà to ma ba sèè kpunaun, tɔ y'a kpàdèe ci nàfa na ni ye re ɲɛynaà ɲàn waa, ye to ni e re gooɲaan ɲàn arì she. 18 Tà doùn, arì nìì reè saun è to Kirisà ɲàn, twɛy sa bàu mòdzin firiuma ì. 19 Ɲe si ye ba xɔ Kirisà tsɛ mìin naa jaamabee bàsɔùn nì kamà, ɲe tsuru màtsùrùkɔɔn na ni mòdzian sapɛ ɲan waa.
20 Ŋà sààben ci yè e de, Kirisà kpunaun è bo fùn nèè fi. Wò rii bàu fùn nèè kùngɔ̀ jɔna kpunaunmaà. 21 Àwà, mòò sɔn nì saabu ɲan, saàn nàu. Tɔ̀ soo tsuru, mòò sɔn saabu ɲan, fùn nèè sèè kpunaàn sa nàu. 22 Mòdzian sapɛ saàn nìi tsuru Adamà yè bà saabu, tɔ̀ soo tsuru mòdzian sapɛ nà jaamabee tàrà, Kirisà yè bà saabu. 23 Ŋà à yè sa ko e tsiìma nì. Kirisà, tɔ bàu kùngɔ̀ jɔnaa. Tà shɔ̀ùn nìì reè y'à raa, à nà sii sèè. 24 Tɔ̀ rii shɔ̀ùn, lataan watsi nà wɔ, tɔ̀ y'a tàrà à kùntsììbee sapɛ baraɔ̀, è fàan sapɛ bara, ko dzibaabee sapɛ, è màsàbee wɔ Fà Ŋaablà suun. 25 È ɲɛn à tsɛ fɔ Kirisà yè tsùù màsàbee tsɛ, fɔ Ŋaablà yeè bè à ɲan rèè sapɛ wɔ dò à sàn dzuun. 26 Ɲan latan niì nà bara, tɔ saàn rìì. 27 Àwà, a ci Ŋaablà re Goomaa y'à deò nìi tsuru, Ŋaabla gè sapɛ wɔu à sàn dzuun. Ŋà à ye dzin «gè sapɛ koroon à re», à fyɛɔ ci nìi gè sapɛ koroòn à re, tɔ̀ dzii na ni waa. 28 Àwà gè sapɛ ye na koron do à re watsi riì bwèy, mòò riì gè sapɛ koroun à re, Dzin Kpirimaa sa nà e majàà tɔ̀ re, gè riì ni à to Ŋaablà yeè bà gè sapɛ, è sapɛ ɲan.
29 À ma ba na tɔ̀ tsuru, nìì reè jaara fòo mòdzin saunma rèè kamà, twɛy na nà fee fa ? Fùn nèè to ma ba sèè kpunaàn, fèe yè è jaara foò kun è kamà ? 30 Ɲe yɛ̀r'leè do, feera ɲe yè bà e yɛrɛ siàn fàràtsia rà kudɛyn ? 31 Neema reè, màan ji o ji seron, mun ni tsuù saàn dzii dzuun. Tɔ̀ dzii tsyɛɔ̀n a ci ye mun yɛ̀rɛ̀blàbè kun nìi tsuru Yesù Kirisà ɲàn, mùn Tsìfaà. 32 À goò yè bà ni adamadzin mòdzin naa jàmaà basɔùn nì tsɛ, à na fee wùbee mun mà, min kaa fa kparan ɲan reè ka Efɛsì wɔ̀ɔ̀ doùn ? Fùn nèè ma ba sèè kpunaàn, tà doùn mìn ɲwɛyn ɲɔn, mìn min a ci à deò nìi tsuru, kàtsu gbee mùn nà san. 33 E maà e san fìrì waa, dzyèèsi ɲaan neè dɛ̀ɛ̀y goo wùù reè bar'la. 34 Ye akiri tàrà cɛyn, ye ɲaan dzii bà. È ɲɛn à tsɛ swey ni ye ɲan, twɛy na Ŋaablà tɔ ŋe waa. Mun tɔ̀ dèe ye re seey rìì kamà. 35 Ŋà sɔn dzia tey fa ci: «Fùn nèè sèè kpunaàn dzùrù ? È sèè naà gɔn kɛ̀n ka ?» 36 Mòdzin akiri bɛy, wo gèdzin niì sìa, tɔ saàn rìì ŋe, è kòmànà xe. 37 Àwà wo nìi sìa, à na à gèkùràmaa dɛ, ŋà à y'à shìmàndzin maanaa nì, mwɛ̀ynmà ge, tàmafa shìmàndzin kpɛrɛ. 38 Tà shɔ̀ùn Ŋaablà yeè kòmànà à xe gè, nìi y'à yɛ̀r'la sàò. À to gèè kuan soo soo sapɛ rii xeè, a ci à wù nìi tsuru. 39 Ŋaablà re jaama ge ɲɛunma rèè pɛn gɔn na soo. Modzin neè raà yè e si, dzwɛkà rèè raà yè e si, kɛ̀yn neè raà yè e si, ji rèè raà yè bà e si. 40 Ge ì ni jìrànxɔ rɔ̀n, ge ì yè bà ni dzɔ̀nxɔɔ̀ tsɛ. Ŋà jìrànxɔ rɔ̀n naa rèè ni e si, dzɔ̀nxɔɔ̀ tsɛ raa rèè yè bà ni e si, è den deun'n kur'la na soo waa. 41 Bwèè den deun'n kur'la ni e si, kuɔ̀ raà ni e si, swɛyn nèè raà yè bà ni e si. Arì swɛyn nèè ko e si fi, twɛy tsu den deun'n kur'la na soo waa.
Pɔlì nìi dèu fùn nèè sèè kpuaàn kàjaa tsɛ
42 Fùn nèè sèè kpunaàn kàjaa tsɛ, à tɔ̀ goo soo rìì. Gɔɔ̀n fyeeràma bèe wɔ dzù rɔ̀n, è nà sèè kpunan bo à na fyeè dɛ. 43 À ɲanfyɛnbeuma bèe wɔ, à ko blàbe ye bo. À fààn bɛy ye bè wɔ, à ko fààn ye bo. 44 À wɔɔ̀ gɔɔ̀n kàjaa tsɛ, è sèè kpunan xɔɔn kàjaa tsɛ. Gɔɔ̀n ye ba ni, à fyɛɔ ci xɔɔn sa ni. 45 Tɔ̀ rii y'à to è bà sɛbɛɔ̀n Ŋaablà re Goomaa doùn nèe tsuru ci: «Mòdzìn jɔna niì bàu Adama jɔ̀naà, tɔ bàu gɔɔ̀n mòdzin, jaamabe ni nìi ɲàn». Ŋà nìi Adamà lataan, tɔ xɔɔn mòdzin, nìi jaamabee sìan. 46 Ŋà nìi gɔnmaa, tɔ̀ rii nàa jɔ̀na, à na xɔnmaa waa. Xɔnmaa nàa tà shɔ̀ùn nì. 47 Mòdzìn jɔnaa, tɔ bou dzɔ̀nxɔɔ̀ kpankpaàn ɲàn. Fiiraa, tɔ bou jìrànxɔ rɔ̀n. 48 Nìi boo dzɔ̀nxɔɔ̀ ɲàn, dzɔ̀nxɔɔ̀ tsɛ raa rèè sa tɔ̀ tsuru. Nìi to boo jìrànxɔ rɔ̀n, jìrànxɔ rɔ̀n naa rèè sa tɔ̀ tsuru. 49 Àwà, mùn bàu dzɔ̀nxɔɔ̀ mòdzian bosi nìi tsuru, mùn nà bà jìrànxɔɔ̀ mòdzian sa bosi tɔ̀ tsuru. 50 Neema reè, mun nìi dèe, tɔ̀ rii siin: shutswɛɛ ko tsìɛn na dzia Ŋaablà re màsàbee tàrà shɛn waa, fyeekɔɔnbeè to na dzia fyeebɛybeè tàrà shɛn waa. 51 Àwà mun na gòndò goo sɔn de ye ra nìi yɛ ci mùn sapɛ fa san waa, ŋà mùn sapɛ la nà kere. 52 Tɔ nà fa bo mɔn jaadzii tsyeè ko saàn fi, gàne soo ɲàn, vuru lataan fyɛ sii sèè. È ɲɛn à tsɛ, vur'la nà fyɛ, fùn nèè yè sèè kpunan bo saàn ɲan twɛy fa fyee dɛ, ɲe, ɲe la ye kere. 53 Àwà, nìi fyeè fɔ tɔ̀ yeè fyeebɛybee wɔ e ma, nìi to saàn, fɔ tɔ̀ ye sanbɛybee wɔ e ma. 54 Tà doùn, nìi fyee, tɔ̀ ye na fyeebɛybeè wɔ e ma watsi riì bwèy, nìi to saàn tɔ̀ yeè sanbɛybeè wɔ e ma, tɔ̀un Ŋaablà re Goomaa doùn gooma sɛbɛunma sɔn nà bo e shi tsɛ nìi yɛ ci: «Dzi tàrau saàn tsɛ è nìn bo mɔn peu.» 55 «Saàn, wo re dzia ni min ? Saàn, wo re vwɛ̀ɛ̀y faa shɔɔ̀ ni min ?» 56 Saàn raa vwɛ̀ɛ̀y faa shɔɔ̀, tɔ gooɲaan nì, gooɲaan raa dzia yè bà Sàrìyaa. 57 Ŋa, mìn baraka sìn Ŋaablà ra, tɔ̀ niì baraka ɲan mùn dzi tar'la mùn Tsìfa Yesù Kirisà baraka rɔ̀n. 58 Tà doùn, mun neema kɛniunma rèè, e san gbaunma yè to cɛyn, e maà yuuyuu bo e shɔùn waa. Ye bè jɔɔn kudɛyn Tsìfaà rè faagoò doùn, ye bà à tɔ̀ ci ye re faagoò na maana Tsìfaà ɲàn waa.