Pɔlì ci nìi nàfa blà kɛɛrabe goòmaà ko kun kpɛrɛ gooma deè ɲàn
14
1 Ye kɛ̀nbààbee gaa gaaŋ'n kur'la sapɛ. Ye sɔ̀ɔ̀n Ŋaablà re Dzia rè goo rèè sa kpɛyn, kɛɛrabe goòmà rèè dèè raà yè bè geren. 2 Àwà, mòò riì kungoòmà kpɛrɛ dèe, tɔ̀ na goomaa mòdzin ì ka waa, ŋà à goomaa Ŋaablà rii ka. È ɲɛn à tsɛ, à nìi dèe mòò pɛn na tɔ̀ fàànmuan waa. Ŋaablà re Dzia baraka rɔn, à nìi sapɛ deè, à sapɛ gòndò goòmà ì. 3 Ŋà mòò riì kɛɛrabe goòmà rèè dèe, tɔ goomaà mòdzin ì nì ka. À fààn wɔɔ̀ è ɲan, è màxɔ̀n, è vununcin sìn è ra. 4 Mòò riì goomaa kungoòmà kpɛrɛ ì ɲàn, tɔ fààn wɔɔ̀ e yɛr'la rìì ɲàn, ŋà mòò riì kɛɛrabe goòmà ì dèe, tɔ fààn wɔɔ̀ ɲɛynamoo kur'la sapɛ ɲan. 5 Mun sàɔ rìì kpɛ̀yn yɛ, ye sapɛ yeè bà goomaa kun kpɛrɛ goòmà ì ɲàn, ŋà ye yè bà kɛɛrabe goomà ì dèe, mun gaa tɔ̀ ra kɔn, è geren. È ɲɛn à tsɛ, mòò riì kɛɛrabe goòmà rèè dèe, tɔ ni kun kpɛrɛ gooma debaà jɔɔn, fɔ kun kpɛrɛ gooma debaà ye ba à dzuun deè boshɔ̀ùn, è bà ni fààn wɔ ɲɛynmoo kur'là ɲàn. 6 Àwà neema ì, dòonen ɲan, min bè bo ye kpà, min gooma kun kpɛrɛ goòmà ì ɲàn. Mun ne goomaa ma goò sɔn kpadè ye ra, à mà twɛ̀y sin ye ra, à mà kɛɛrabe goòmà dè ye ra, à to mà kàràn sìn ye ra, mun nàfaà nà bà kɛ̀n ye ma ? 7 Arì beyn ge rèè, twɛy sa kajaa tsɛ, à tɔ̀ soo rìì. Gwɛ̀ɛn ko dàan tsuru, è vu rèè ma bo e si'un fyeu, mòo dzia à tɔ̀ dzùrù, ci nèe gwɛ̀yn fyɛkɔɔn, nèe yè bà dààn benkɔɔn ? 8 Vur'la fyɛ vuà to ma fyɛ, tsì rii dzia e mabyɛ̀n kaà kamà ? 9 Tɔ̀ soo tsuru, ye sa, gooma fyɛuma ma bo ye dzu fyeu, mòo dzia à tɔ̀ dzùrù ye nìi dèe ? À nà bà ni a ci ye goomaa fyɛn re. 10 Kun goòmà rèè kun giri dziɲaan doùn, ŋà è pɛn na dzuun bɛy. 11 Tà doùn, kun goòmàà sɔn ye ba dèe mun na nìi dzuun tɔ, à bàa jàci mun tɔnɔn à dèbaà rè, à sa yeè bà tɔnɔn mun ne. 12 Àwà, ye sɔ̀ɔn Ŋaablà re Dzia kɔ̀ì ge rèè kpɛyn nìi tsuru, nìi reè nà fààn wɔ ɲɛynamoo kur'là ɲàn, ye twɛy giri gaa. 13 Tɔ̀ kamà, mòò riì goomaa kun kpɛrɛ gooma ì ɲàn, è Ŋaablà mafyɛ̀n, è dzi sin à ra, è bà dzia à dzuun de. 14 Mun ye ba Ŋaablà mafyɛ̀ɛn kun kpɛrɛ goòmà ì ɲàn, mun xɔɔn kpɛ̀yn bàa ni màfyɛɛ̀n nà, ŋà mun akir'là, à nàfa pɛn na ni tɔ̀ mà waa. 15 Mun nà fee fa sa ? Mun nà Ŋaablà mafyɛ̀n n xɔɔn kàjaa tsɛ, mun y'à màfyɛ̀n n akir'là sa ka. Mun nà ye ceè mun yè tsoo dzi ɲɛn à tsɛ n xɔɔn kàjaa tsɛ, mun yè ye ceè m'a ka tsoo dzi ɲɛn à tsɛ n akir'là sa ka. 16 Àwà wo ye ba baraka sìan Ŋaablà ra a xɔɔn bàsɔùn ka, mòò riì tsuuŋnà dzyee rèè ka jamaà ɲàn, à na sɔn tɔ à jaa waa, tɔ dzia dzin dzùrù ci «Àmiinà» wo re baraka sìunma shɔ̀ùn, tɔ̀ to y'à tàrà à na à tɔ̀ wo nìi deò waa. 17 À kpɛ̀yn sààben, wo baraka wùù siun Ŋaablà ra, ŋà à na sɔn ba nèe fàan tɛ̀y do. 18 Mun baraka sìan Ŋaablà ra, è ɲɛn à tsɛ, mun goomaa kun goòmà kpɛrɛ ì ɲàn, è geren ye sapɛ tsɛ. 19 Ŋà ɲɛynnamoo kur'la fi, min goomadzin nun tsuru dè n akir'là ka, tɔ̀ yeè dzyee rèè kàràn, tɔ dzi mun na, è geren gooma bayirika deuma tsɛ kun kpɛrɛ goòmà ì ɲàn.20 N neema ì, akir'la kàjaa tsɛ, e maà bà dziin kòòmɛ̀yn ì waa. Gooɲaan kpɛ̀yn kàjaa tsɛ, ye bà dziin kòòmɛ̀yn ì, ŋà akir'la kàjaa tsɛ, ye bà jaaratsii ì. 21 Àwà à sɛbɛɔ̀n Sàrìyaa doùn ci: «Mun nà gooma nèe mòdzin nee reè ka è bo mòdzin ì dzu, nìì reè kun goòmà kpɛrɛ dèe. È bo mòdzin ì dzu, nìì reè tɔnɔn ì. Tɔ̀ ko e sa ra, è fa e toro wɔ mun ne waa. Tsìfaà ci tɔ̀ tsuru.» 22 Tà doùn, kun kpɛrɛ goòmà rèè na tàànmàshɛn ɲɛynamoo rèè jaa ra waa, ŋà è tàànmàshɛn ɲɛyna bɛy reè rìì jaa ra. Ŋà kɛɛrabe goòmàà tɔ̀ na tàànmàshɛn ɲɛyna bɛy reè jaa ra waa, ŋà à tàànmàshɛn ɲɛynamoo rèè jaa ra. 23 Àwà è ba jàci ɲɛynamoo kur'là sapɛ yeè bà e ladzyèeŋnà tsuru, è sapɛ yeè bà goomaa kun kpɛrɛ goòmà ì ɲàn, à jaa tɔ bɛy reè, tàmafa ɲɛyna bɛy reè yè nà dɔ̀n mɔn, twɛy fa à jà ci ye akiri fuɔ̀ fyeu ɔ ? 24 Ŋà è ba ni a ci ye sapɛ kɛɛrabe goòmà nì dèe, ɲɛyna bɛɛ sɔn, tàmafa à jaa tɔ bɛɛ sɔn ye nà dɔ̀n mɔn, à nà nìì myɛ̀n è bo ye sapɛ dzu, tɔ nà sɔn de à ra è kitsi kunùn à tsɛ. 25 À duungoo nà bo da, è kunun gban è kuu e jaà tsɛ, è Ŋaablà blabe, è dzin sààben na, Ŋaabla ni ye fi.
Pɔlì ci goo rèè shi yeè jìì nìi tsuru ɲɛynamoo kur'là fi
26 Tà doùn n neema ì, fee rìì wù è fa ? Ye ye e ladzyèè, sɔn dzia ye ceè, sɔn yeè mòò kàràn tàmafa è goò sɔn kpadè. Sɔn yeè gooma kun kpɛrɛ goòmà ì ɲàn, tàmafa à y'à dzuun de. Goò sapɛ yeè fa rii, è ka fààn wɔ mòdzian sapɛ ɲan. 27 Mòò ye ba goomaa kun kpɛrɛ goòmà ì ɲàn, è mà geren fii ko zhììgi tsɛ waa. Yè gooma bo e si jɔɔn, mòò to yè jà nìi nà à dzuun de. 28 À dzuun debaa ma ba ni, à dèbaà yè e mɛshɛn ɲɛynamoo kur'là fi. È gooma e yɛr'la ko Ŋaablà ka. 29 Nìì reè to kɛɛrabee faa, mòkun fii, zhììgi tsuru yè tɔ̀ kɛɛrabe goòmà rèè dè, dzyee rèè y'à ɲansiin. 30 Ŋaablà to ye goò sɔn kpadè tsùùbaà kpɛr'la, jɔ̀naà yè e mɛshɛ̀n. 31 Ye sapɛ dzia kɛɛrabe goòmà rèè dè, ŋà y'a dè bo e si jɔɔn soo soo, gè riì ni à to mòdzian sapɛ yeè kàràn, è sapɛ ma yè xɔ̀n. 32 Kɛɛrabee dzi riì ni kɛɛra reè ɲàn, tɔ koroòn kɛɛra reè rè. 33 È ɲɛn à tsɛ Ŋaablà na goo gbiimaunma rèè Ŋaablà waa, à jaanciàn Ŋaablà rii, a ci à ni nìi tsuru Ŋaablà re mòdzìn neè rè, ɲɛynamoo kur'lèè sapɛ fi. 34 Tàan rèè yè e mɛshɛ̀n ɲɛynamoo kur'lèè fi. À shi na ni è suun yè gooma waa. À wù yè e majàà, a ci Sàrìyaa ci nìi tsuru. 35 Yè ba ni à re yè goò sɔn jaa tɔ̀, yè e re kpir'leè tey tsii rɔ̀n. È ɲɛn à tsɛ tàan rèè yè bà ni gooma ɲɛynamoo kur'lèè fi, tɔ kùngɔ̀ suuru. 36 Ŋaablà re goomaa daun è bo ye rìì lè gbɛ ? Tàà ye bàsɔùn nì y'à tàrau ? 37 Àwa sɔn ye ba à kɛ̀sɛɛ̀ ci wo Ŋaablà re kɛɛra, tàmafa Ŋaablà re Dzia yè bà goo ì kpàdèe wò ra, à y'à tɔ̀ ci mun yɛ nìi sɛbɛn kaɔ ye re, ci à Tsìfaà dzugooma xɔù rìì. 38 Mòò riì ma tɔ̀ goò tɔ̀, tɔ̀ tsu fa tɔ̀ waa. 39 Tà doùn, n neema ì, ye sɔ̀ɔ̀n kɛɛrabee kpɛyn, ŋà kun kpɛrɛ gooma dee, e maà mòò jɔɔn shu tɔ̀ tsu tsɛ waa. 40 Ŋà goò sapɛ dzyeema yeè fa rii fau'n kuru wuu ra, gbiiman mà jà à pɛn ɲan.