Pɔlì sɛbɛn jɔna niì kau
Tesalonikika reè rè
Sɛbɛɛn kaɔ nìì reè rè ko dzwɛɛ̀
1
1 Nèe mun Pɔlì, ko Silivɛ̀n, ko Tsìmotè rè sɛbɛn, è ka ye Tesalonikì wɔ̀ɔ̀ ɲɛynamoo kur'là rè, ye nìì reè ni Fà Ŋaablà ɲan, ye yè bà ni Tsìfa Yesù Kirisà ɲàn. Arì she, Ŋaablà ɲanwùɔ ko jaanciàn, twɛy yè sìn e ra !Pɔlì shɛɛrɛbe wuu riì bou Tesalonikika reè rè ɲɛynaà tsɛ
2 Kudɛyn ɲe baraka sìan Ŋaablà ra ye kamà, ɲe yè bà ye sapɛ gooma deè e re Ŋaabla mafyɛyn nèè doùn. 3 Ye re ɲɛynaà faagoò nìi boò, ko ye re kɛ̀nbààbee faagoò byɛnbee, ye si to xɔ nìi tsɛ, ye yè bà e shiɔ̀ à ra mùn Tsìfa Yesù Kirisà ɲàn, ɲe taa ni tɔ̀ mà kudɛyn mùn Fà Ŋaablà jaa ra. 4 Neema reè, Ŋaabla ye nìì reè kɛ̀niɔ̀n, ɲe y'à tɔ̀ ci à ye ɲankɛrɛn bou e jaa ra. 5 È ɲɛn à tsɛ, ɲe re Kùnàgoo Dziɔ̀ goomaa na dzi ye tsɛ gooma basɔùn ka waa, ŋà à dziu ko dzibaabe ka Ŋaablà re Dzi Fɛnɛɛ baraka rɔ̀n, sɔ̀swɛy na ni nìi ɲàn waa. Àwà ye wùbe kamà, ɲe yè e re jaamabee fau fau'n kur'liì rà ye fi, ye tɔ̀ tɔ̀. 6 Ye bàu ɲe shɔ̀ùnminabaa ì, ye yè bà Tsìfaà shɔ̀ùnminabaa ì. È ɲɛn à tsɛ byɛnbe xɔɔ̀ ko e raà sa, ye yè e tsiiŋ Ŋaablà re Goomaa nà ko taamadzibe ka, Ŋaablà re Dzi Fɛnɛɛ rè taamadzibe. 7 Tà tsuru, ye bàu jaakpadeira Maseduwanin mar'la ko Akayi mar'la ɲɛynamoo rèè sapɛ re. 8 È ɲɛn à tsɛ, Tsìfaà rè goomaa bou ye re mɔn è jee bè fɔ Maseduwanin mar'la ko Akayi mar'la ɲan. À na tɔ̀ basɔùn waa, ye ɲɛyna nìi faɔ̀ Ŋaablà ra, tɔ̀ goomaa wɔu min niì sapɛ, fɔ à na wɔɔ̀ ɲe yè sɔn de à tsɛ dɛ. 9 À bèu wɔ fɔ ɲe wɔumaà ye re mɔn, ye ɲe kuun kuun'n kur'liì rà, tà ko ye sèè bou ɲɔ̀n rèè kpɛyn nìi tsuru ye yè e yɛrɛ sin Ŋaablà jaama takia rà, ye yè e ba tɔ̀ re jòn, è tɔ̀ sapɛ lakɛ̀ɛ. 10 Ye tɔ̀ fau, ye yè bà ni à Dzin Kpir'la sèè naà màshu è bo jìrànxɔɔ̀ doùn, nìi Yesù, à tɔ̀ niì kpunan bou fùn nèè fi, è bà mùn tsià Ŋaablà re vununta nàkɔɔn nà.