4
1 Kùntsii rèè, ye e re jòn nèè kun ko terenbe ka, e maà mɛɛy è tsɛ waa, ye b'a tɔ̀ ci kùntsii ni ye sa re jìrànxɔɔ̀ doùn.Pɔl'lè làtsìì goòmà rèè swey
2 E ɲanshìuma yè to màfyɛɛ̀n nà. Ye to e jaa ra tà doùn, ye bà barika sìan Ŋaablà ra. 3 Ye Ŋaabla mafyɛ̀n ɲe sa re è bà ni goomaa dziɛ̀ san min dzi Kirisà rè gòndoo goomaa dè, mun ni kàsoò rà tɔ̀ niì kamà. 4 Ɔ̀ɔn, min bà ni à dè fyɛ, a ci mun wù mun y'à dè nìi tsuru. 5 Nìì reè na ɲɛynamoo ì waa, ye e re jaamabee fa akiri ka twɛy kàjaa tsɛ. Ye watsia kùngɔ màbo. 6 Kudɛyn e dzugooma reè yè bà gooma dziu ì, kòo ni nìi ɲàn, ye bà ni mòdzian sapɛ jaabiu'n kuru wuu tɔ.
Tswɛ̀ɛ ko dzwɛɛ̀
7 Goo o goo ni mun ne goò ɲàn, nìi Tsishikì, mùn neema kpiri kɛniunmaà, Tsìfaà ɲàn faagoofabaa vusootsià ko mun faagoofasià, tɔ nà bè ye toro kɔ̀ à sapɛ ra. 8 Mun y'à kaà ye re tɔ̀ rii là, è bà ni ɲe kùnàgoo de ye ra, è ye màxɔ̀n. 9 Mun y'à kaà ko Onesimùn ka, mùn neema kpiri vusootsi kɛ̀niunmaà, è bà ye sɔn. Goo o goo ni mìin, è nà bè ye toro kɔ̀ à sapɛ ra. 10 Arisitarikì ye tswàa, tɔ̀ niì sa ni kàsoò rà mun ka. Marikì yè bà ye tswàa, Barinabasì neema kpir'la, tɔ̀ niì rè goo ì dèu ye ra. È be e re mɔn, y'a kuun'n kuru wuu fa. 11 Yesù rìi kir'là Yusitusì, tɔ̀ sa ye tswàa. Dzyèèsìbee modzin neè ɲàn, twɛy bàsɔùn nì mun faagoofasi Ŋaablà re màsàbee faagoò doùn. È mun màxɔ̀un cɛyn. 12 Epafarasì, Yesù Kirisà rè faagoofadzian, è bà ye sɔn, tɔ ye tswàa. À re Ŋaabla mafyɛyn nèè doùn kudɛyn, a ni kaà rà ye kamà, gè riì ni à to ye sàn gbaunma yè to, ye dzii yè bà tsyɛɔ̀n, ye yè bà mɔɔ̀n Ŋaablà saɔ sapɛ doùn. 13 Mun y'à shɛɛrɛ ci faagoò doùn, è yɛrɛ siɔ̀n è byɛnbe giri faa ye kamà, ye ko Lawodiseka reè, ko Iyerapolisika reè. 14 Lukì, mùn ne dɔ̀ɔ̀tɔ̀rɔ̀ kpiri kɛ̀niunmaà ye tswàa, Demasì sa yeè bà ye tswàa. 15 Ye mùn neema Lawodiseka reè tswà, ko Nɛnfasì, tà ko ɲɛynamoo kur'lìi yè e ladzyèe tɔ̀ re gbàà doùn. 16 Àwà ye na nèe sɛbɛn nee kàràn watsi riì bwèy, y'a to Lawodisè ɲɛynamoo kur'la sa y'a kàràn. Nìi sa to nà dan è bo Lawodisè, e sa yeè tɔ̀ kàràn. 17 Y'a dè Arishipù rà, ci faagoo rìi kɛ̀ɛ̀yfaunà à mà Tsìfaà ɲàn, ci à y'à kààwɔ, à y'à fa, à y'à dzii tsyɛn. 18 Mun Pɔlì, nèe mun yɛ̀r'la sià rè sɛbɛn ni, min tswɛ̀y sin ye ra. Ye taa to ci mun ni kàsoò rà. Arì she, Ŋaablà ɲanwùɔ yè bà ni e tsɛ !