3
1 Àyìwà, ye ba kpunaun ye bo saàn ɲàn ko Kirisà ka, ye jìrànxɔ rɔ̀n naa gè rèè rìì gaa sa, Kirisà tsùuŋnà min niì, Ŋaablà sirama si jaa rè. 2 Ye e kɛsɛ jìrànxɔ rɔ̀n naa gè rèè rìì là, e maà e kɛsɛ dzɔ̀nxɔɔ̀ tsɛ raa rèè rà waa. 3 È ɲɛn à tsɛ, ye saun, ye re jaamabee yè bà mɛnɛɔn Kirisà rè, Ŋaablà ɲan. 4 Ye re jaamabee Kirisà rìì. È na e yɛrɛ kpadè sii rìi sèè, ye sa nà kpàdè ko à ka, à nɔɔrɔɔ̀ ɲàn.Juu bɔrɔɔ ko juu yee
5 Tà doùn, dzɔ̀nxɔɔ̀ tsɛ raa juu riì ni e ɲan, ye tɔ̀ vu bo e ɲan nìi yɛ kɛ̀kɛ̀ɛ̀ybeè, noo, gɔɔ̀n dzibee goo, kur'la goo ɲaan, jaacɛnbɛybeè, tɔ̀ niì ko ɲɔ̀n kɔ sa soo. 6 Twɛy goo kaatsi rèè rìì bàa saabu, Ŋaablà re vununtaà yè wɔ mòdzin mabaunma rèè tsɛ. 7 Tɔ̀ rii na ye sa raa jaamabee dan, ye yè bà na jìɛ twɛy goo rèè ɲàn. 8 Àwà dòònun, ye san bo à sapɛ ɲan: vununta ò, ɲanacin ò, ɲanbe o, ɲɛ̀yn ò tà ko seey bɛy gooma nìì reè sapɛ boò e dzu. 9 E maà doò dè e si ra dɛ. È ɲɛn à tsɛ, ye yè e juu bɔrɔɔ ko à faadzii reè bou e ra, 10 ye yè yeo ji e ma. Ye tɔ̀ niì jiu e ma, tɔ bà beè yeu, è twɛ̀y dziitsyɛunma sìn ye ra è kòrò à ɲɛnbaà niu'n kur'la ka. 11 È ɲɛn tɔ̀ tsɛ, kun kpɛrɛ mòdzin na ni dɛ, Dzyèèsìbee mòdzin to na ni dɛ. Mòdzin shɛunma na ni dɛ, shɛn bɛy to na ni dɛ. Kun kpɛrɛ modzìn na ni dɛ, mòdzin jaadzii san bɛy to na ni dɛ. Jòn na ni dɛ, xɔrɔn to na ni dɛ. Kirisà rìì gè sapɛ sa, è bà ni mùn sapɛ ɲan. 12 Tà doùn, ye nìì reè Ŋaablà jaara bouma rèè, à re mòò rèè ko à re kɛ̀niunma rèè, y'a to màtsuru brisi yè bà ni e ɲan, wùù yeè bà ni e ɲan, màjaa yeè bà ni e ɲan, vununmacin yè bà ni e ɲan, ko mɔ̀ɲɔn. 13 Ye e si re goo mɔ̀ɲɔn. Sɔn to y'a jà ci sɔn dɔɔ̀n wò gàsin ɲan, ye e yɛrɛ to e si re. Tsìfaà yè e yɛrɛ tou ye re nìi tsuru, e sa yeè e yɛrɛ to e si re tà tsuru. 14 È geren tɔ̀ sapɛ tsɛ, ye kɛ̀nbààbee ji e ma, tɔ̀ niì ye shìù'n kuru wubee e si ra cɛyn. 15 Arì she Kirisà rè jaanciàn yè kùntsììbee sen e dusùkuan tsɛ, e kiriɔ tɔ̀ niì kamà, ye bà gɔnkungɔ soo. Ye bà goowuutɔbaa ì Ŋaablà kajaa tsɛ ! 16 Kirisà rè goomaa yè e tsuù e ɲan, è buu. Ye e si kàràn, ye e si lasɔnmin akiriblabeè sapɛ ka ko ye ì ka: zàbùrù ye ì, màkìrì ye ì ko Ŋaa blabe ye ì. Ye è cèè Ŋaablà re ko e dusùkuan sapɛ ka è kòrò à ɲanwùɔ ka. 17 E naà goo o goo dè e to nà goo o goo fa, y'a sapɛ fa Tsìfa Yesù tsoo ra, ye baraka sìn Fà Ŋaablà ra à baraka rɔ̀n.
Jaamabe yee fau'n kur'la mùn ko e si fi
18 Tàan rèè, ye e majàà e re kpir'leè rè a ci à dàaŋnà Tsìfaà ɲàn nìi tsuru. 19 Kpir'leè, ye e re tààn rèè kɛ̀n, e maà e vunu'un kɔn è ka waa. 20 Dziin nèè, goo sapɛ doùn, ye e ker'là gè rèè dzugoomaa blàbe, è ɲɛn à tsɛ, tɔ̀ rii dzi Tsìfaà rà. 21 Fà rèè, e maà e dzin nèè vunun ta, tɔ̀ yeè nà bà saabu è gɔn yè vu waa. 22 Jòn nèè, goo sapɛ doùn, ye e re mìin dzɔ̀nxɔɔ̀ tsɛ kùntsii rèè dzugoomaa blàbe. À mà bà è jaa ra goo bàsɔùn, a ci y'a faa ye yè dzibe mòdzin ì nà waa, ŋà y'a fa duun fyɛ ka, Tsìfaà jɔɔn shiɲaanbe tsɛ. 23 E goo o goo rìì faa, y'a fa ko e dusùkuan sapɛ ka, a ci ye y'à faa Tsìfaà rìì lè, ye na à faa mòdzin ì nè waa. 24 Ye b'a tɔ̀ ci ye nà sàrà tàrà Tsìfaà rè, nìi nà bà shɛn. Ye faagoò faa Tsìfa rìi rè, à Kirisà rìì. 25 Mòò riì terenbɛybe goo reè faa, tɔ nà sàrà è kòrò e re terenbɛybee rìì ka, è ɲɛn à tsɛ, Ŋaablà na mòò boò mòò ɲàn waa.