Pɔlì ci wo sikuan faa nìì reè kamà, ko à fa kuàn
2
1 Àwà mun sào ni y'a tɔ̀, mun ni sikun brisi rìi rà ye kamà, ye ko Lawodiseka reè, ko nìì reè sapɛ jaa na ɲɛn mun jaakɔrɔɔ̀n mà ŋe waa. 2 Mun tɔ̀ faa, gè riì ni à to è vunun yè cin, è shìuma yè to e si ra kɛ̀nbààbee doùn, tà ko yè dzi akiritsifabe brisi dziitsyɛunma tàrà, yè Ŋaablà re gòndoo tɔ̀, nìi Kirisà, 3 akiriblabee ko twɛ̀ɛ nàfor'la sapɛ mɛnɛn tsùuŋnà tɔ̀ niì ɲàn. 4 Mun tɔ̀ dèe gè riì ni à to mòò pɛn mà dzi ye sàn fìrì ko dzugooma dziù ì ka waa. 5 Àwà mun kɛ̀sɛɛn ma ba ni ye ka mɔn gɔɔ̀n kàjaa tsɛ, akir'la ɲàn, mun ni ye ka. Mun taama to dzi, m'a jà ci goò sapɛ beu'n kuru wù ye ko e si fi, ye sàn to gbaɔn ɲɛynaà doùn, Kirisà ɲàn.Pɔlì ci jaamabe dziitsyɛunmaà tàr'la Kirisà rìì ɲàn
6 Tà doùn, a ci ye yè e tsiiŋ Tsìfa Yesù Kirisà rà nìi tsuru, ye jìì à yè e to à ɲan. 7 E jiɛ̀ gbaunma yè bà ni à ɲan, e re jaamabee gbàkur'la yè bà fuɔ̀ à tsɛ. E san gbaunma yè to ɲɛynaà ɲàn a ci à kàraun e ra nìi tsuru, ye baraka giri sìn Ŋaablà ra.
8 Ye e yɛrɛ kaàwɔ, mòò pɛn mà nà e kun dziɲaan akiri goòmà rèè myɛ̀ɛ̀n ka waa, yè e san fìrì gooma ì ka sàn gbanma na ni nìì reè rà waa, yè bà ni mòdzian rè làndà goo reè ko dziɲaan goo rèè tsɛ, nìi ko Kirisà raa goò na ni e si kpà waa. 9 È ɲɛn à tsɛ, Ŋaablà re ŋaablabee dziitsyɛunmaà sapɛ ni wò raa gɔɔ̀n rìì ɲàn. 10 Ye dziitsyɛunma ni à ɲan, wò riì kùntsii rèè ko fààntsi rèè sapɛ kuntsiɛ̀.
11 Wò rii ɲàn sa, ye shɛun, ŋà nìi na mòdzin si ka shimaangoo fauma waa. À Kirisà rè shimaangoo rii, nìi yɛ, è ye gɔn nɔ̀n gooɲaan bo ye ɲan. 12 È ɲɛn jaara foo tsɛ, ye fun wɔu ko à ka, ye to yè sèè kpunan ko à ka, ye yè bo saàn ɲàn. Tɔ fau kàtsu ye ɲɛun Ŋaablà re dzibaabee rà, à tɔ̀ niì ka à kpunan bou saàn ɲàn.
13 Àwà ye nìì reè na saɔn è ɲɛn ye re fìrìgoo rèè ko ye re shimaangoo fabɛybeè tsɛ, à ye sèè bau jaama ko e ka. À mùn ne fìrìgoo rèè sapɛ mɛɛy bou mùn mà. 14 Sɛbɛn niì na faɔ̀ mùn kamà è bà mùn jààkia è kòrò à doùn sàriya reè ka, à tɔ̀ tsùsa bou mɔn, à y'à gban gɔɔ̀ rà, è mɛɛy. 15 À tsitsiɛ̀ kùntsii rèè ko fààntsi rèè sa bou e raa kùntsììbe reè ko fààn reè ɲàn, à yè è bà jirangoo ge jàmaà rè, à yè e re dzi tar'la kpàdè è tsɛ. 16 È ɲɛn tɔ̀ tsɛ, e maà à to mòò pɛn yè e jaaki ɲwɛyn goo tàmafa mììngè goo ra. E to mà à to mòò pɛn yè e jaaki jaaravi goo ì rà, kuu dzin ye goo tàmafa ɲànwɔ̀ jisee ì goo ra waa. 17 Tɔ̀ sapɛ na goo nànàma rèè ɲɛɛ̀n nì. Ŋà à taki takià, tɔ Kirisà rìì. 18 E maà à to mòò pɛn yè e bo e re sàrà tàr'làmaà tsɛ, ci wo majàaŋnà, tàmafa ci wo mɛ̀rɛ̀kɛ rèè rìì jàa wò yeè è blàbe waa. Nìì reè ni tɔ̀ tsɛ, yɛ̀rɛ̀blàbe ni è ɲan, è kɛ̀sɛmàà yè bà adamàdzin mòdzin kɛsɛmà. 19 Kirisà, tɔ̀ niì kùngɔɔ̀, è na e shiɔ̀ tɔ̀ ra waa. Tɔ̀ to y'à tàrà, wò rii gɔɔ̀n sapɛ kuɔn e si ra soo xɔtsuma rèè ko fɛ̀r'lèè ka, è bà à dzii ra gaa è bɔɔ Ŋaablà re bɔɔ ɲan.
20 Ye saunmaà shɔ̀ùn ko Kirisà ka ye sàn yè bo dziɲaan goo rèè ɲàn, fèe bèe à to ye yè e san ji sàrìya ì ɲàn kɔn, a ci ye re jaamabee ni dziɲaan nì suun ? 21 Twɛy sàrìya reè na goo kpɛrɛ fɔ «M'a nèe sen, m'a nèe nìè, a to mà a dzyɛn nèe ra.» 22 Tɔ̀ sapɛ gè bar'lama ì, è ka faagoò faumaà shɔ̀ùn. È adamadzin mòdzin dzugooma tsuuŋma ì nì ko è re kàran ì 23 A kpɛyn nà dzin ci akiriblabe ni à goo rèè ɲàn, nìi yɛ e tɔ̀ blàbè kaatsià fa, a yɛrɛ majàà, e byɛnbe ɲɛn a gɔɔ̀n tsɛ. Ŋà, nàfa na ni tɔ̀ pɛn ɲan e gɔɔ̀n sàɔ fa boshɔ̀ùn.