Pɔlì faagoo rìi fau Tesalonikì
2
1 Àyìwà neema reè, ye yɛ̀r'la y'à tɔ̀, ci ɲe wɔumaà ye re mɔn, tɔ̀ na ba goo maana waa. 2 Y'a tɔ̀ sa, ci ɲe byɛunmaà ko ɲe kuun'n kuru ɲaan faumaà shɔ̀ùn Fìlipù wɔ̀ rɔ̀n, Ŋaabla akiritsuu siun ɲe ra, ɲe yè dzi à re Kùnàgoo Dziɔ̀ dè ye ra, kaa gir'là ko e raà sa ɲe ka. 3 Àwà ɲe re waajibia gooma reè naà sànfìrì goòmà ì, è naà ŋɛ̀nɛ̀ɲàn ɲààn goòmà ì è to naà mòdzìn mànììn goòmà ì. 4 Ŋà Ŋaablà re à jàumaà ci Kùnàgoo Dziɔ̀ goomaa dzia kɛ̀ɛ̀yfa ɲe mà, ɲe na à dèe ci ɲe goo yè dzibe mòdzin ì nà dɛ, fɔ Ŋaablà, tɔ̀ riì mùn dùsùkun neè ɲansiɛ̀n. 5 Ye sa y'a tɔ̀ ci ɲe na gooma ì dè jà nìì reè mòdzìn mànììn goòmà ì, à ŋɛ̀nɛ̀ɲan to na ja jà ɲe ɲan, ɲe yè mòò ɲɔn. Ŋaabla ɲe shɛɛrɛ. 6 Ɲe na blàbe gaa è bo mòdzin ì nè. Ɲe na à gaa ye re, ɲe to na à gaa mòò kpɛrɛ ì rè. 7 Tà to y'à tàrà ɲe Kirisà re kɛɛradzin ì nìi fa, ɲe na dzia fààn ɲinan ye tsɛ. Ŋà ɲe yè e yɛrɛ bau dziinkòòmɛ̀yn ì tsuru ye fi. A ci na nìi yè e taa toò e dzin ì nè nìi tsuru, 8 ye goojaa na ni ɲe vunun tsɛ tà tsuru. À na ni niu'n kur'la, fɔ ɲe naà n'a re ɲe yè dàn Ŋaablà re Kùnàgoo Dziɔ̀ bàsɔùn dèè mà ye ra waa, ŋà ɲe yè e re jaamabee sìn sìun'n kur'la sapɛ ra ye kamà, kàtsu ɲe ye kɛ̀niun fɔ è be geren.9 Àwà neema reè, ye taa ni ɲe re faagoo xɔɔ̀ ko ɲe re byɛnbee rè. Ɲe faagoò fau feèn ko bwèè sa, ɲe mà nà bà ye sɔn ne seyn waa, ɲe yè Ŋaablà re Kùnàgoo Dziɔ̀ dè ye ra. 10 Ye ɲe shɛɛrɛ, Ŋaablà sa yeè bà ɲe shɛɛrɛ, ci ye ɲɛynamoo rèè kàjaa tsɛ, ɲe yè e re jaamabee fau fyɛu tsɛ, ɲe y'à fa terenbe tsɛ, jààma to naà ni ɲe ra. 11 Ye y'à tɔ̀ sa, ci ɲe na ni ye soo soo sapɛ ka, a ci fa ni e dzin ì ka nìi tsuru. 12 Ɲe ye màxɔun, ɲe yè fààn wɔ ye ɲan, ɲe y'à gaa ye re gaaŋ'n kur'la sapɛ, ci ye yè e re jaamabee fa a ci Ŋaablà ci è fa nìi tsuru, wò riì ye kir'là ye yè dɔ̀n à re màsàbee doùn, è nɔɔrɔɔ̀ sìn ye ra.
Pɔlì baraka sìan Ŋaablà ra kɔn Tesalonikika reè rè ɲɛynaà kamà
13 Tɔ̀ kamà, kudɛyn ɲe baraka sìan Ŋaablà ra sa, è ɲɛn à tsɛ ye y'à re gooma niì myɛ̀un ɲe re, ye na e tsiì à ra, ci à adamadzin mòdzin ì nè gooma waa, ŋà ci à Ŋaablà re gooma ni taki, nìi faagoò faa ye ɲɛynamoo rèè ɲàn. 14 Àwà neema reè, Ŋaablà re ɲɛynamoo kuru nìì reè ni Yesù Kirisà ɲàn Yude mar'lɔn, ye bàu twɛy shɔ̀ùnminabaa ì. È ɲɛn à tsɛ, ye yɛ̀r'la fàdzìnsi reè ye byɛun a ci Dzyèèsìbee mòdzin neè yè è sa byɛun nìi tsuru. 15 Ye rìì Tsìfa Yesù ko kɛɛra reè sa vuu, ye rìì to byɛnbe shiu ɲe sa ra. È goo na dzi Ŋaablà ra waa, è to mòdzian sapɛ ɲan ì. 16 È ɲe jɔɔn shuà ɲe mà nà to gooma kun kpɛrɛ mòdzin neè ka, yè bà ni tsi waa. Tɔ̀ tsuru, è sɔn ba bèe e re gooɲaantsiɛ tɛ̀y. Ŋà à lataan, Ŋaablà re vununtaà bàu ni è tsɛ.
Pɔli na à gaa wò yeè Tesalonikika reè jà kɔn
17 Nìi ɲe, neema reè, ɲe ko ye jaa kpɛ̀yn fɔun e si ra watsi dɛɛnin doùn, ŋà dùsùkuan ɲàn, mùn ni esire. Ɲe goò sapɛ ko e kuru fau ɲe yè bà ni ye jà kɔn, kàtsu tɔ̀ kuru na ni ɲe ra fɔ è bè geren. 18 È ɲɛn tɔ̀ tsɛ, ɲe sàò na ni ɲe yè bè bo ye kpà, mun Pɔlì yɛ̀r'la y'à jaa gaa jaa soo, fii tsuru fau, ŋà Sùtana ɲe jɔɔn shuu. 19 Àwà mùn Tsìfa Yesù nà sii sèè, ɲe si nà bà xɔ tsi ì rìì tsɛ, yè bà ɲe re taamadzibe ko ɲe yɛ̀rɛ̀ blàbè kun, nìi ɲe re dzi tar'la màsà baanfla à bììn ? À na ye o ? 20 Ɔ̀ɔn, ɲe nɔɔrɔɔ̀ ko ɲe re taamadzibeè, tɔ ye rìì.