Pɔlì ci goo nìì reè nà fa, sani Tsìfaà yè nà
2
1 Neema reè, nìi mùn Tsìfa Yesù Kirisà sèè na goo, ko mùn ladzyeè goo à ka, ɲe nìi gaa ye re, tɔ rii siin: 2 Goo sɔn pɛn mà e akiri tabe fu è shiɲaanbe ka e ra, ci Tsìfaà nà watsi wɔu nòn waa. Kɛɛrabe goòmà màà tɔ̀ fa, gooma kpɛrɛ mà tɔ̀ fa, à to mà bà ci à sɛbɛn daunma è bo ɲe re waa. 3 E maà à to mòò pɛn yè e san fìrì fau'n kuru pɛn na. È ɲɛn à tsɛ, sani tɔ̀ yee fa, mòdzian nà sèè bo Ŋaablà kpɛyn ŋe, mòdzìn ɲaan yè e kpadè, tɔ̀ niì bar'la dziàn. 4 Gè o ge kiriu ŋaablà, gè o ge to blàbè ge, ɲaàn nà fù è ji twɛy sapɛ kuùn, fɔ è wɔ è bè e tsuù Ŋaablà blabe gbaa doùn, ci wò rii Ŋaablà.5 Ye taa na ni à re ci è mun to ye re mɔn ŋe, mun na tɔ̀ dèe ye ra ɔ ? 6 Dòònun, gè riì y'à jɔɔn shuɔ̀ sani à yɛ̀rɛ̀ kpàdè bwey yè wɔ, ye tɔ̀ tɔ̀. 7 È ɲɛn à tsɛ, mòdzìn ɲaan faadzii mɛnɛunmaà goo rèè ni sààn nòn, ŋà nìi y'à jɔɔn shuɔ̀, fɔ̀ tɔ̀ yeè bo mɔ̀n ŋe. 8 Tɔ̀un mòdzìn ɲaan nà e kpadè, Tsìfa Yesù to nà e dzu ŋɔ̀ɔ̀n ka à bara bo mɔ̀n, à y'à bo mɔn peu e seè nakɔɔn kpàdèkɔɔn doùn. 9 Tɔ̀ mòdzìn ɲaan raa nàà nà fa ko Sùtan'naa dzibaabee ka, è dzibaabe goo kaatsià sapɛ, ko tàànmàshɛn kabagoomaa kaatsia sapɛ, ko doò kabagoo goo kaatsia sapɛ fa. 10 Nìì reè ni e bar'la shia tsɛ, à nà teren bɛy goo kaatsia sapɛ fa è bà ni twɛy sàn fìrì. È ɲɛn à tsɛ twɛy yè e nɔun sààbeen mà è na e tsiì y'à kɛ̀n waa, tɔ̀ niì na nà è tsi. 11 Tɔ̀ kamà Ŋaablà sa nàa sànfir'la goo ka è mà, yè bà ni ɲɛn doò rà. 12 Tà tsuru nìì reè sapɛ na ɲɛn sààbeen rà waa, è to yè teren bɛy goo rìì dzibe e ra, kitsia yè mɛɛy twɛy sapɛ tsɛ.
Pɔlì ci Ŋaablà Tesalonikika reè ɲankɛrɛun yè bà ni tsi
13 Neema reè, Tsìfaà ye nìì reè kɛ̀niɔn, nìi kpɛ̀yn ɲe, ɲe wù ɲe yè baraka sìan Ŋaablà ra kudɛyn ye kamà. È ɲɛn à tsɛ, à ye ɲankɛrɛun fɔ goo rèè dzun jɔn bwèy ye yè bà ni tsi à re Dzia baraka rɔ̀n, tɔ̀ niì fɛnɛbee sìan, tà ko ye ɲɛunmaà sààbeen rà. 14 , À ye kiriu ɲe re Kùnàgoo Dziɔ̀ baraka rɔ̀n tɔ̀ rii sa kamà, gè riì ni à to ye nìn yè jà mùn Tsìfa Yesù Kirisà nɔɔrɔɔ̀ ɲàn. 15 Tà doùn neema ì, e san gbaunma yè to. Mùn goo nìì reè kàraun e ra gooma doùn, tàmafa sɛbɛn kauma ka, ye twɛy kun gban gban.
Dzwɛɛ̀