Pɔlì y'à gaaŋ Tesalonikika reè rè, yè Ŋaablà mafyɛ̀n ye re
3
1 Dòònun neema ì, arì she, ye Ŋaablà mafyɛ̀n mùn ne, gè riì ni à to, Tsìfaà rè goomaa yè bè jɔɔn tabe, blàbe yeè ɲɛn à tsɛ, a ci à faa ye re nìi tsuru. 2 Ye Ŋaablà mafyɛ̀n sa, è bà ni mùn tsi mòdzìn ɲan teren bɛy reè rà, katsù mòdzian sapɛ na ɲɛyna faɔ̀ waa. 3 Ŋa Tsìfaà vusootsi. À nà fààn wɔ ye ɲan, è ye tààn ɲaan mà. 4 Tsìfaà ɲàn, ɲe ɲɛɔ̀n à ra ye kàjaa tsɛ ci ɲe nìi dèe ye ra, ye tɔ̀ faa, ye to nà bè jɔɔn, y'a fa. 5 Arì she Tsìfaà yè e dusùkuan jaa ji Ŋaablà re kɛ̀nbààbee ko Kirisà rè mɔ̀ɲɔɔn nà.Pɔlì ci faagoò yè fa
6 Neema reè, mùn nìi dè wɔɔ e suun mùn Tsìfa Yesù Kirisà tsoo ra, tɔ̀ rii yɛ ci neema ge o ge pìrìpàrà modzìn, à to na jiɛ ɲe re kàràn sìunmaà tsɛ waa, ye e mabo tɔ̀ ra. 7 Ye wù ye yè ɲe shɔ̀ùn mìnàn nìi tsuru, ye yɛ̀r'leè y'à tɔ̀. È ɲɛn à tsɛ, è ɲe to ye fi, ɲe na e re jaamabee fa pìrìpàrà waa. 8 Ɲe na mòò pɛn ne ɲwɛyn ɲɔn maana. Ŋà faagoò ko byɛnbee, ɲe tɔ̀ rii fau feèn ko bwèè sa, ɲe mà nà bà ye pɛn ne seyn. 9 À na ni a ci à shi naà ni ɲe suun dɛ, ɲe tɔ̀ fau nì ɲe yè bà ni ba jaakpadeira, ye yè ɲe shɔ̀ùn mìnàn. 10 È ɲɛn à tsɛ, è ɲe to ye re mɔn, ɲe na dzian ye ra ci: «Mòò riì sàò na ni è faagoo fa, à mà ɲwɛyn tsu ɲɔn waa.»
11 Tɔ̀ to y'à tàrà ɲe y'à myɛ̀ɛn ci mòdzin ì ni ye fi mɔn, nìì reè yè e re jaamabee faa pìrìkìpàràkà. È na faagoo faa, è dziɛ̀ to ni goo sapɛ ɲan. 12 Àwà nìì reè ni tɔ̀ tsuru, mùn nìi dè màxɔbee è ra, mìn màxɔ̀n mùn Tsìfa Yesù Kirisà tsoo ra, tɔ̀ rii yɛ ci yè faagoo fa akiri tsuu ka, yè e yɛrɛ dziira gaa.
13 Nìi kpɛ̀yn ye, neema reè, e maà byɛn ja goowuu faa rà waa. 14 Tà doùn, ɲe yɛ gooma niì dèe ye ra sɛbɛn nee doùn, mòò riì ma tɔ̀ latsuù, ye tɔ̀ tsìfa kààwɔ e maà dzyèè à ka goo sɔn pɛn doùn dɛ, è bà ni seey. 15 Ŋà, e maà à bà e ɲan waa, y'a latsi rii a ci neemaa sɔn.
Tswɛ̀ɛ ko dzwɛɛ̀
16 Arì she, jaanciàn Tsìfaà yɛ̀r'la yè jaanciàn sìn e ra watsi sapɛ ko fau'n kur'la sapɛ ra. Arì she Tsìfaà yè to e ka. 17 Nèe ye re tswɛ̀ì, mun Pɔlì yɛ̀r'la nìi faunà n si ka. Tɔ mun sifyɛ̀ɛ̀ rìì n ne sɛbɛn neè sapɛ kajaa tsɛ. Mun sɛbɛɛn faa tɔ̀ rii tsuru. 18 Arì she, mùn Tsìfa Yesù Kirisà ɲanwùɔ yè bà ni e sapɛ tsɛ !