Pɔlì ci ɲɛynamoo kur'là kuru kun neè yè ba ni nìi tsuru
3
1 Àwà mòo dzia ɲɛn nèe gooma ree ra, nìi yɛ ci sɔn ye ba à gaa wò yeè ɲɛynamoo kur'là kuru kun, tɔ faagoo wùù gaa. 2 Ŋà, fɔ ɲɛynamoo kur'là kààwɔbaà yè bà mòdzin, jààma na ni nìi rà waa, è bà tààn dzìn sòòtsi, è bà e yɛrɛ kuàn, è bà akiritsi, à sɔ̀bɛ̀n modzìn, à tɔnɔnladɔnbaa, è bà dzia mòdzian kàràn. 3 À mà bà mììnfabaa waa, à to mà bà mòdzin vunun ɲan waa. Ŋà è bà mòdzin vununmadzi, kaa na dzi à ra waa, à to na ɲɛɛn kɛ̀niɔ̀n waa. 4 È bà dziɔ̀ e re yɛr'la rè tsun'nà nà, è re dziin nèè koron koroun'n kuru wuu ra, blàbe doùn. 5 È ɲɛn à tsɛ, mòò riì na dziɔ̀ e yɛr'la rè tsun'nà nà, tɔ nà dzi Ŋaablà re ɲɛynamoo kur'là ladɔn dzùrù ? 6 À mà bà mòdzin nìi tuubiɔ̀ yeu waa. Tɔ mà nà bà saabu è yɛrɛ blabe fɔ è bè geren, tɔ̀ yeè nà kitsi mɛɛy ka à tsɛ, a ci kitsi riì mɛrɔn sànwɔbaà tsɛ waa. 7 À wù sa, à tsoo dzi yeè bà ni ɲɛyna bɛy reè dzu, gè riì ni à to à mà nà bà ɲanfyɛnbee gè, tɔ̀ yeè nà bà saabu è mɛɛy sànwɔbaà rè yɔ̀ɔ̀ doùn waa.Pɔlì ci ɲɛynamoo kur'là goojaa bo reè yè bà ni nìi tsuru
8 Tɔ̀ soo tsuru, ɲɛynamoo kur'la goojaa bo reè sa wù yè bà mòdzìn sɔbɛn ì, è na gooma fii debaa ì waa, è na mììn faa waa, è to na tàrà faa namarama waa. 9 Yè ɲɛynaà gòndoo màrà ko kɛ̀sɛmà wùù ka. 10 È re jaamabee ɲan yeè siin ŋe, jààma ma ja è ra, yè kòmànà goojaaboo faagoò fa.
11 Tɔ̀ soo tsuru, tàan rèè, twɛy sa wù yè bà mòdzìn sɔbɛn ì. È na mòdzìn tsòòbarabaa ì waa, yè e yɛrɛ kuɔn, mòò to dzia ɲɛn è ra goo sapɛ doùn.
12 Ɲɛynamoo kur'là goojaa bo reè wù yè bà tààn dzìn sòòtsi ì, yè bà e dzin nèè koroun'n kuru wuu faɔ̀, yè dzi e yɛr'la rè tsun'nà nà. 13 È ɲɛn à tsɛ, nìi reè goojaaboo faagoò faa fau'n kuru wuu ra, twɛy jɔɔndzinbe tar'la, blàbe ni nìi doùn, tà ko yè akiri tsuu bla tarà ɲɛynaà doùn, tɔ̀ niì ni Yesù Kirisà ɲàn.
Ŋaablà jɔɔn shiɲaanbeè gòndoo
14 Mun nèe sɛbɛn nee sìan wo ra, min bà à kɛ̀sɛɛ̀ ci sani dɛyn mun nà bè wo re mɔn. 15 Tà tsuru mun kɛ̀sɛɛn ye cin, mòo wù è re goo shi jiì jììŋ'n kur'liì rà Ŋaablà jaamaa rè gbàà doùn, tɔ̀ niì y'à rè ɲɛynamoo kur'là, sààbeen tsindzian ko à sàngbanmaà, wo yè tɔ̀ tɔ̀. 16 Àwà Ŋaablà jɔɔn shiɲaanbee gòndoo, tɔ blà. Mòò pɛn na dzia tɔ̀ sɔ̀swɛy waa. Ŋaablà yeè e yɛrɛ kpadèu adamàdzin mòdzin niu'n kur'la. À re Dzia y'à kpàdè ci à tereòn. È yɛrɛ kpadè mɛ̀rɛ̀kɛ rèè rà. À waajibia ye fa kun neè mòdzin neè fi. Mòdzian yè ɲɛn à ra dziɲaan doùn. È sen fu dɔ̀n be jìran nɔ̀n, nɔɔrɔɔ̀ ɲàn.