Pɔlì nìi dèu mòdzìn sànfìrì kar'neè tsɛ
4
1 Ŋaablà re Dzia y'à dè fyɛɛ̀ ci watsi latan neè ɲan, swey nà sèè bo ɲɛynaà kpɛyn yè gban mòdzìn sànfir'leè, ko kwey kar'nèè kpɛyn. 2 Doodebaa duungoofiitsi rèè nà è sàn fìrì, twɛy nìì reè kɛ̀sɛmaà ni a ci myɛ̀ɛ̀n xe ka gè riì fyɛ̀ jiɔ̀. 3 Twɛy rìì dziàn ci furu mà fa waa, ci ɲwɛyn nèè swey to mà ɲɔn waa. Tɔ̀ to y'à tàrà Ŋaablà twɛy gè rèè sapɛ ɲɛun, gè riì n'a to ɲɛynamoo rèè yè bà ni à ɲɔn baraka sin doùn Ŋaablà ra, twɛy nìì reè sààbeen tɔ̀. 4 Àwà, Ŋaabla gè o ge ɲɛun, à sapɛ wù. À pɛn na maarama waa. À dààn yɛ mìn ba à ɲɔɔ̀n, mìn baraka sìn Ŋaablà ra. 5 È ɲɛn à tsɛ, Ŋaablà re goomaa ko màfyɛɛn baraka rɔ̀n, à fɛnɛbeè.Yesu Kirisà rè faagoofadzin wuɔ
6 Àwà wo ye neema reè kàràn tɔ̀ ra, wo nà bà Yesù Kirisà rè faagoofadzin wuu, ɲɛynaà gooma reè ko kàràn wùɔ baɔ̀ wo xɔɔn ɲwɛyndzii, wo y'à gbaɔn twɛ̀y nìì ree kpɛyn. 7 Tàànbɔ̀ɔ̀rìì sina niì reè ko Ŋaabla goòmàà na byɛɛ̀n waa, twɛy jà e to mɔn, a yɛrɛ karàn Ŋaablà jɔɔn shiɲaanbeè rìì là. 8 E a gɔɔ̀n dɛ̀ɛ̀y ɲuun fa ra, tɔ̀ nàfaà dzyɛ̀n, ŋà nàfa ni nìi ɲàn è geren, tɔ̀ rii Ŋaablà jɔɔn shiɲaanbeè, è ɲɛn à tsɛ jaamabee làyir'là seòn tɔ̀ rii ɲàn she ko gbee sa. 9 Nèe gooma, mòo dzia ɲɛn nìi rà, è tsiì à sapɛ ra. 10 Tɔ̀ rii y'à to ɲe ni faagoo xɔɔ̀ rà ko sikuan. È ɲɛn à tsɛ, ɲe yè e si ɲɛɔ̀n Ŋaablà jaamaa tsɛ, tɔ̀ niì mòdzian sapɛ Tsibaa, gooma na ni ɲɛynamoo rèè ma waa. 11 Twɛy goo rèè dè modzian nà, a kàràn è ra.
Pɔlì ci Tsìmote yè bà ɲɛynamoo rèè jaa kpadee mòdzin
12 Maà à to mòò pɛn y'à dzyɛnbe ci a dziin kòòmɛ̀yn waa. Ŋà bà jaakpadeira rìì ɲɛynamoo rèè rè, goomaa kàjaa tsɛ, jaamabee fau'n kur'la kàjaa tsɛ, kɛ̀nbààbee kàjaa tsɛ, ɲɛynaà kàjaa tsɛ, ko duunfyɛɛ̀ kàjaa tsɛ. 13 Sani min wɔ mɔn, a shi Ŋaablà re gooma kàr'nà nà mòdzian rè, e màxɔ̀ɔn, ta ko e kàr'na. 14 Ŋaablà ɲanwùɔ kɔ̀ìge rìi sìun a ra, è ɲɛn kɛɛrabe goòmà tsɛ, ko ɲɛynamoo kur'là bɔɔ rèè si tsùuŋmaà a tsɛ, m'a tɔ̀ bo a si bònè waa. 15 A ɲanshì twɛy goo rèè rà, e kun a sii fii ka, gè riì ni à to è sapɛ y'a jà ci a beè jɔɔn. 16 A taa to a yɛr'le, a taa to a re kàr'nà rè. A ɲanshì tɔ̀ ra, è ɲɛn à tsɛ à fakɔɔn tɔ̀ tsuru, tɔ nà wo yɛ̀r'la tsi, è wo lamyɛnbaa rèè sa tsi.