Tsìmotè faa raà ɲɛynamoo rèè sapɛ kajaa tsɛ
5
1 Àwà maà a vu màxɔbe mòòbɔɔ̀ ka waa, ŋà à mà nì xɔ̀n a ci a fa. Dzunwwɛyn neè, e twɛy màxɔ̀n a ci a tseyn ì. 2 Tàànbɔɔ reè màxɔn a ci a na ì, nìì reè to na bɔrɔɔ waa e twɛy màxɔ̀n a ci a tsyen taan ì, duunfyɛ ka.Pɔlì nìi dèu Tsìmotè rà fùnshɔ̀ùntaan rèè kàjaa tsɛ
3 Fùnshɔ̀ùntaan taki reè, a magoo wɔ twɛy ɲàn. 4 Ŋà, dzin ì ko mɔ̀nmɔ̀ndzin ì ye ba ni fùnshɔ̀ùntaan nìi rè, twɛy wù yè Ŋaablà jɔɔn shiɲaanbeè kàràn e yɛr'la rè fɔɔn doùn ŋe, nìi yɛ yè e sen ker'la gè rèè ɲàn, yè è re fa dɔunmaà tsìì sàrà. Tɔ̀ rii dzi Ŋaablà ra. 5 Fùnshɔ̀ùntaan takia, nìi too e soone, tɔ̀ yeè e sixɔbeò Ŋaablà tsɛ è bà à màfyɛ̀ɛn fyɛ̀ùn'n kur'la sapɛ, feèn ko bwèè sa. 6 Ŋà fùnshɔ̀ùntaan nìi ni dziɲaan ɲàn raa dzibee goo reè rìì fyɛ̀'ùn, tɔ̀ kɛ̀sɛɛn ye ba jaama, à bàa saɔn rìì. 7 Twɛy rìì dè màxɔbe è ra, gè riì ni à to jààma mà jà è ra waa. 8 Mòò riì na e taa too e re mòò rèè rè waa, à re gbàdòùndzin neè raà yè geren, tɔ̀ tsìfa yè e nɔun ɲɛynaà mà, ɲɛyna bɛy sa yeè bà fyan à mà.
9 Fùnshɔ̀ùntaàn nìi tsoo dzia sɛbɛn fùnshɔ̀ùntaan rèè ka, tɔ̀ rii yɛ nìi sìà na gbaɔ̀ jii mueyn ma waa, è bà baɔ̀ kpiri soo re tààn. 10 À wù faadzii wuɔ shɛɛrɛbe yeè bà ni à tsɛ. È bà e dzin nèè ladɔun'n kuru wuu fau, è bà bàu tɔnɔn ladɔnbaa, è bà Ŋaablà re mòdzin neè sàn nèè fòoŋ, è bà wɔu byɛnkɔɔn reè rà, è bà goowùɔ kaatsia sapɛ fau.
11 Ŋà fùnshɔ̀ùntaan nìì reè na bɔrɔɔ waa, twɛy to mɔn. È ɲɛn à tsɛ, gɔɔ̀n kur'laa ye na fààn tarà è tsɛ, è geren Kirisà tsɛ, y'à gaa ye furu seè fa. 12 Tà tsuru, è làyir'lìi jɔ̀na seun, tɔ̀ kùnuunmaà kamà, è kitsi mɛɛ̀ e yɛrɛ tsɛ. 13 È ɲɛn tɔ̀ tsɛ, faadzii na ni è ra nìi fa, yè e tsuɔ rìì yè tsyeere beè fɔɔn reè ko e si fi. È bà faadziibɛybee tɛ̀y, è re goomaa na gè gìrìbè san, è dziɛ̀ to ni goo sapɛ ɲan. Nìi na dèràma, è dzii ni tɔ̀ sapɛ ra. 14 Tà doùn, fùnshɔ̀ùntaan nìì reè na bɔrɔɔ waa, maà gaa yè furu fa, yè dzin ì kere, yè e magoo wɔ e re tsun'nà ɲàn, gè riì ni à to ɲaàn mà nà dɔ̀n ma jà, è mùn tsoo bara waa. 15 È ɲɛn à tsɛ, fùnshɔ̀ùntaan rèè swey shia bàjiu nòn, yè e gban Sùtana kpɛyn. 16 Àwà fùnshɔ̀ùntaàn i ye ba ni ɲɛynamoo taàn sɔn ne, à yè wɔ è ra, tɔ̀ seen mà bà ɲɛynamoo kur'là raa waa. Tà tsuru, nìi reè fùnshɔ̀ùntaan taki reè, è dzi wɔ twɛy rà.
Pɔlì nìi dèu, è ɲɛn ɲɛynamoo kur'là bɔɔ rèè kuun'n kur'la tsɛ
17 Ɲɛynamoo kur'la bɔɔ nìì reè ɲɛynamoo kur'la kuru kuun'n kuru wuu faa, twɛy wù blàbe ka shiɲaan jaa fii, gooma na ni nìì reè yè e yɛrɛ siɔ̀n waajibi faa ko mòdzìn kar'na faagoò rà waa. 18 È ɲɛn à tsɛ, à deò Ŋaablà re goomaa doùn nèe tsuru ci: «È nìɛ̀ to shìmaan faagoò rà, maa à dziɛ̀ shì waa» È bà deò sa ci: «Faagoofadzian wù e sar'là ka.» 19 Mòò ye jààki mɛɛy ɲɛynamoo kur'là bɔɔ̀ sɔn tsɛ, a ma shɛɛrɛ fii tàmafa zhììgi vu myɛ̀n, ma a tsiì tɔ̀ ra. 20 Sɔn ye gooɲaan fa, à dè à ra mòdzian sapɛ jaa ra, gè riì n'a to dzyee rèè sa ye shi 21 Maà gaa wo re gaaŋ'n kur'la sapɛ, Ŋaablà ko Yesù Kirisà ko mɛ̀rɛ̀kɛ ɲankɛrɛunma rèè jaa ra, e nèe goo rèe rèè shi jiì, a maà mɛɛy mòò tsɛ, a to mà mòò bo mòò ɲàn. 22 Maà a si tabe tsuù mòò pɛn tsɛ e faagoo kɛ̀ɛ̀yfa à mà Ŋaa re gbàà doùn. Maà a ba mòò pɛn tɛ̀y e re gooɲaan doùn. À to e bà fyɛɔ.
23 Maà dàn yuà bàsɔùn mà waa, a fur'là ko a re ɲìnìn myɛyn myɛyn neè kamà, dùvɛɛ̀n dɛyn dɛyn sa miàn. 24 Swey raa gooɲaan tɔ̀ boò suu sani à kitsi yeè kùnun. Ŋà swey raa fauma shɔ̀ùn, à watsi faa è kòmànà tɔ̀. 25 Tɔ̀ fau'n kuru soo rà faadzii wuu reè sa tɔ̀ɔ tabe. Nìì reè to na tɔ ŋe, twɛy tsu mɛnɛunma fa to waa.