Pɔlì nìi dèu jòn nèè ko e kuntsii rèè, ko ɲɛɛn kɛ̀n gereonmaà tsɛ
6
1 Àyìwà, nìì reè sapɛ ni jònbee gè doùn, è sapɛ yeè dan e kuntsii rèè ɲàn, yè è blàbe, gè riì ni à to Ŋaablà tsoo mà bara waa, ko kàr'nà. 2 Nìì reè kùntsii ɲɛynamoo ì, twɛy mà to e kuntsii rèè blàbe bɛy kàtsu yè e si neema ì waa. Ŋà, yè sɔn ni bà e re faagoò tɛ̀y fau'n kuru wuu ra è re, è ɲɛn à tsɛ, è ɲɛynamoo ì rìì ko neema kɛniunma ì, nìì reè yè è re faagoò nàfa tàr'la. A naà goo nìì reè kàràn mòdzian nà e màxɔ̀n à ra, twɛy rìì yɛ. 3 Mòò riì kàràn kpɛrɛ sìan, nìi yè e si mùn Tsìfa Yesù Kirisà rè gooma taki reè rà, à ko Ŋaablà jɔɔn shiɲaanbee goomaa to na soo waa, 4 tɔ mòdzin, nìi tsyɛɔ̀n yɛ̀rɛ̀blàbeè rà, à na gèsɔn pɛn tɔ̀. Sɔ̀swɛɛy gɔ̀r'la ko gooma ì kùùn kaa, twɛy rìì ɲinin ni à ra. Twɛy rìì nàa jaaɲininbeè, ko kaà, ko tsoo bar'la, ko ŋɛ̀nɛ̀ɲàn ɲaan, 5 ko sɔ̀swɛy xɔù dò bɛy mòdzin akiri barauma ì ko e si fi, sààbeen na ni è ɲan waa, è to yè bà Ŋaablà jɔɔn shiɲaanbeè jàa tɔ̀nɔ̀n tàrà shi. 6 À sààben, Ŋaablà jɔɔn shiɲaanbeè tɔ̀nɔ̀n tàrà shi blà, ŋà fɔ a suun naà yè bà a jaa cɛɛ̀n. 7 È ɲɛn à tsɛ, mùn na na gèsɔn pɛn ka dziɲaan doùn, mùn to na naà sèè gèsɔn pɛn ka. 8 Tà doùn, dzii ra ɲwɛɛ̀n ko vya wɔrama ye ba ni nòn, tɔ boi faa. 9 Àwà nìì reè sapɛ y'a gaa ye yè bà gètsi, dzuunbweè twɛy sapɛ tar'la. È kur'la goo ɲaan ɲaùn gir'lèè yɔ̀ɔ̀ yè e kuàn, twɛy nìì reè mòdzian bar'la, yè è kùngɔ fìrì peu. 10 È ɲɛn à tsɛ, ɲɛɛn kɛ̀nbààbee rìì gooɲaan sapɛ jiɛ̀. À saabu ɲan, mòò giri yè e dan gbànbeu ɲɛynaà nà, yè byɛnbe giri ji e yɛrɛ tsɛ.Pɔlì ci Tsìmotè yè nìi fa
11 Ŋà nìi wo, Ŋaablà re mòdzian, vwɛ̀ɛ̀y twɛy goo rèè jɔɔn. A gban nìì reè kpɛyn, tɔ̀ rii yɛ terenbee, ko Ŋaablà jɔɔn shiɲaanbee, ko ɲɛynaà, ko kɛ̀nbààbee, ko mɔ̀ɲɔɔn, ko vununmadzibeè. 12 Ɲɛynaà kaa wùɔ fa, e jaamabe dziù dòbɛɛ kun gban gban, Ŋaablà wo kiriu tɔ̀ riì kamà, wo yè bà à shɛɛrɛbe wuu bou shɛɛrɛ giri jaa ra. 13 Ŋaablà riì jaamabee sìan gè sapɛ ra, ko Yesù Kirisà rìi shɛɛrɛbe wuu bou Pɔnsi Pilatsì jaaterema, twɛy jaa ra, mun nìi jia wo jɔɔn, tɔ̀ rii siin: 14 Ŋaablà dzugooma xɔɔ̀ màrà, fyɛ mà ji à ra, jààma to mà jà a ra, fɔ è bè suu mùn Tsìfa Yesù Kirisà nà e yɛrɛ kpadè jisee riì. 15 Dzwɛɛ̀ Tsìfa Ŋaablà, Dzitsi soo pee, tɔ̀ rii nà à kpàdè e watsi wuu ɲan, wò riì màsa reè raa Màsaa, è bà tsìfa rèè raa Tsìfaà. 16 Wò rii soo pe na saàn waa, è bà ni vyeevyee ɲan, mòo na dzia e kpɛrɛ nìi rà. Mòò pɛn na à jà jà ŋe, mòò to na dzia à jà. Arì she, blàbee ko dzibaabe dobɛɛ yè bà à raa ! Àmiinà !
Pɔlì ci Tsìmotè yè gètsi rèè latsi nìi ka
17 Nèe dziɲan ree gètsi rèè, à dè màxɔbe twɛy rà, ci è mà e yɛrɛ blabe waa, è mà e si ɲɛn gè dòràmaà tsɛ waa. Ŋà yè e si ɲɛn Ŋaablà rii tsɛ, tɔ̀ riì gè sapɛ siàn mùn na giri, m'a dzibe bo. 18 À dè è ra, ci yè goowùɔ rìì fa, yè bà gètsi faadzii wuɔ kàjaa tsɛ. È si yè bà forouna, è sɔ̀n yè bà byɛɔ̀n yè mòò kɔ̀. 19 Tà tsuru è nà nàforo ladzyèè tsùù gàne gban gban ɲan e jɔɔn gbee, yè bà ni jaamabe takia tàrà.
Pɔlì Tsìmotè latsiu nìi ka kɔn ko dzwɛɛ̀