Pɔlì sɛbɛn niì kau
Tsitè rè
Pɔl'lè faagoò, à sɛbɛɛn kaɔ mòò riì rè, ko dzwɛɛ̀
1
1 7Mun Pɔlì, Ŋaablà re jòn kpir'là ko Yesù Kirisà rè kɛɛradzian, Ŋaablà mun kaɔ, mun y'à jaara moo rèè wɔ ɲɛynaà tsɛ, tà ko yè sààbeen tɔ̀ è kòrò Ŋaablà jɔɔn shiɲaanbeè ka. 2 Tà tsuru Ŋaablà riì na doò dèe waa, tɔ jaamabe dziù dòbɛy riì làyiri seòn fɔ dziɲan na ɲɛn ŋe, yè bà ni e si xɔbe tɔ̀ tsɛ. 3 Tà doùn è kòrò à watsi wuu ka, è re goomaa kpàdèu wajibia baraka ɲan, à tɔ̀ niì kɛ̀ɛ̀yfau mun mà, è kòrò à re dèumaà ka, wò riì mùn Tsibaa Ŋaablà. 4 Nèe mun ne sɛbɛn è sìn wo Tsitè rà, wo rìi mun dzin kpiri taki takì ɲɛynaà baraka ɲan, mùn dzyèeŋnà tɔ̀ niì mà. Arì she, Ŋaablà ɲanwùɔ, ko jaanciàn, Fà Ŋaablà ko mùn Tsibaa Yesù Kirisà yè twɛy sìn a ra.Pɔlì ci Tsitè yè faagoo rìi fa Kɛrɛtsì
5 Mun wo tou Kɛrɛtsì gàne rɔ̀n, gè riì ni à to goo nìì reè too màbyɛ̀nàma mɔn, w'e twɛy sɔ̀n byɛ̀ùn'n kuru wube, w'e bɔɔ ì tsùù tsùù be wɔ̀ɔ̀ soo soo sapɛ doùn ɲɛynamoo kur'lèè jɔɔn, a ci mun y'à dèu wo ra nìi tsuru. 6 Twɛy bɔɔ rèè wù yè bà mòdzin ì, jààma na ni nìì reè rà waa, è tààn dzìn sòòtsi ì, è dzin nèè ɲɛynamoo ì, jààma na ni è ra kɛ̀kɛ̀ɛ̀y goo kajaa tsɛ, è to na mòdzin mabaunma ì waa. 7 Àwa ɲɛynamoo kur'là kààwɔbaà wù è bà mòdzin, jààma na ni nìi rà waa, è ɲɛn à tsɛ, wò rii Ŋaablà re gbàà goojaabobaa. À mà bà mòdzin nìi blà e yɛr'le waa, nìi vunùn ɲan waa, nìi mììnfabaa waa, nìi kaafabaa waa, nìi to na tàrà faa namarama waa. 8 Ŋà è bà mòdzin, nìi tɔnɔnladɔnbaa, goowùɔ dzi à ra, à akiritsi, à tereòn, à fɛnɛ, è bà dziɔ̀ e yɛr'la. 9 È bà e shiɔ̀ Ŋaablà re goomaa nà mòò ɲɛɛn tɔ̀ niì nà, a ci à kàraun à ra nìi tsuru, è bà ni dzi mòdzian kàràn kàràn takia ka è màxɔ̀n, è sɔ̀swɛ̀y fa reè dzuun bo.
Pɔlì ci Kɛrɛtsika reè ni nìi tsuru
10 Awà mòò giri ni, è sapɛ mòdzin mabaunma ì, gooma dɔntsɔ̀bɛy reè ko mòdzìn sànfìrì goòma rèè rìì ni è dzu. À fàan sapɛ dzyèèsìbee mòdzin bauma ɲɛynamoo rèè. 11 Twɛy mòdzin neè dzii rèè tsyee. È tsun'nèè swey ko e kuru kunàn baan ko goo ì ka, nìì na wù è kàràn mòò rà waa, yè namara ge tsi. 12 È ɲan mòò sɔn, kɛrɛtsikaa sɔn, tɔ̀ niì è yɛ̀r'la rè kɛɛra, tɔ dziun nèè tsuru ci: «Kɛrɛtsika reè na sààben de jàa, è kparan ɲan ì, yè bà nùnwɛ̀yn ɲan saànma ì.» 13 Tɔ shɛɛrɛbe, nìi sààben. È ɲɛn tɔ̀ tsɛ, vu xɔù dè è ra, yè bà ni ɲɛyna takia fa. 14 Ci è mà e shi Dzyèèsìbee mòdzin neè rè sina cee goòmà ì nà waa, è to mà e gban mòdzin maana ì nè sàrìya ì kpɛyn waa, twɛy nìì reè yè e bon wɔɔ sààbeen rà.
15 Àwà nìì reè fyɛɔ, goo sapɛ fyɛɔ twɛy rè. Ŋà nìì reè nooŋnà è to na ɲɛɔ̀n Ŋaablà ra, goo sɔn pɛn na fyɛɔ twɛy rè waa. È kɛ̀sɛmàà ko è akir'là sa nooŋnà. 16 È dziàn ci ye Ŋaablà tɔ, tɔ̀ to y'à tàrà è faadziɛ y'à kpàdèe ci è na à tɔ̀ waa. È mòdzin kinin bouma ì, mòdzin mabaunma ì, è na dzia goowùù soo fa.