Pɔlì ci watsi wuu sen ɲɛn watsi ɲaan tsɛ, Tsìmotè yè Ŋaablà re Goomaa dè
4
1 Àyìwà mun y'à dè màxɔbe wo ra Ŋaablà ko Yesù Kirisà jaa ra, tɔ̀ niì nà kitsia kùnùn jaama reè ko fùn nèè sa tsɛ, mun y'à dè màxɔbe à nà jisee ko à re màsàbee tsoo ra, 2 ci watsi wuu sen ɲɛn watsi ɲaan tsɛ, e Ŋaablà re Goomaa dè, a tsi à tsɛ. Doò dzuun bo, mòdzian sɔ̀ɔ̀n dè, e màxɔ̀n. Mɔ̀ɲɔn brisi doùn, yè kàràn. 3 È ɲɛn à tsɛ, watsi nàa, nìi doùn mòdzian na naà gaa kàràn takia rà dɛ, ŋà è kòrò è yɛ̀r'la dzibee goo reè ka, nìi dzi è tor'là rà, è nà twɛy dèbaa kààmoo reè kuru brisi gaa e yɛrɛ kɔ. 4 È nà e toro bo sààbeen goomaa ɲàn, yè toro wɔ sina cee goòmà rèè rè. 5 Ŋà nìi wo, goò sapɛ doùn, bà mòdzin, nìi akiri ni e yɛr'le. Byɛnbee ku a ɲan, e Kùnàgoo Dziɔ̀ dè. A re faagoò fa, a dzii tsyɛn.Pɔlì ci wo kaa wùɔ fau, wò ye vwɛ̀ɛ̀ fa wɔ e da'ùn
6 Nìi kpɛ̀yn mun, mun bàu a ci mììngè saaka, nìi koon nòn saakabomaà tsɛ. Mun bè bwey to wɔu. 7 Mun kaa wùɔ fau, min vwɛ̀ɛ̀ fa wɔ e da'ùn, min ɲɛynaà màrà. 8 Àwà è sen dòònun, terenbee màsà baanflaa màrà tsùuŋnà mun ne. Tsìfaà, kitsikununbaa tereunmaà nà à sìn mun na jisee lataan sii sèè. À fa bà mun bàsɔùn waa, nìì reè sapɛ nà à nà jisee kɛ̀n, à nà à sìn twɛy sa ra.
Pɔlì ci Tsìmotè yè nà wò kpà
9 A maxɔbe e nà n kpa mìin tabe. 10 È ɲɛn à tsɛ Demasì nèe dziɲan ree goo rèè kɛ̀niɔ̀n nìi fa, tɔ̀ ye e nɔun mun ne è geren Tesalonikì. Keresɛnsì, tɔ dɔ̀n beu Galasi mar'la ɲan, Tsitè yè bè Dalamasì màr'lɔ̀n. 11 Lukì soo rii ni mun ka mìin. E ba nàa, e nà ko Marikì ka, kàtsu à màgoo blà mun ne faagoò doùn. 12 Tsishikì, mun tɔ̀ ka bèu Efɛsì. 13 E ba nàa, mun mɛ̀yɛ bla cincin'nìi tou Karipɔsì rè, Torowasì wɔ̀ rɔ̀n, e nà tɔ̀ ka a suun. E nà sɛbɛn neè sa ka, tsùn sɛbɛ̀n nèè raà si yè tsi.
14 Kwèy kpiri Alɛkisandziri gooɲaan giri fau mun na, Tsìfaà rìì nà à sàrà è kòrò ko à faadziɛ ka. 15 A sa y'a yɛrɛ kaàwɔ à ra, katsu è dzun wɔu ɲe re gooma reè rà kɔsɔbɛ.
16 Mun ne kitsi jɔnaa sàn nè, min bà ni n dzi dè, mòò pɛn na wɔ mun na waa, è sapɛ yeè e nɔ̀un mun ne. Ŋaabla mà tɔ̀ dan è kùùn waa. 17 Ŋà, Tsìfaà wɔu mun na. À fààn wɔu mun ɲan, gè riì ni à to mun baraka ɲan, Kùnàgoo Dziɔ̀ waajibia yè fa à dzii yè tsyɛn, kun neè sapɛ y'a myɛ̀n. Mun tsiu jɛ̀r'la dziɛ̀ rà. 18 Tsìfaà nà mun tsi bo gooɲaan sapɛ ɲan, è mun dɔ̀n e re jìrànxɔɔ̀ màsàbee doùn. Arì she, nɔɔrɔɔ̀ sapɛ dzyeèma yeè ɲɛn à tsɛ, watsi sen ɲɛn watsi tsɛ. Àmiinà !
Tswɛ̀ɛ ko dzwɛɛ̀
19 Tswɛ̀y sin Pirisiye ko Akilasì rà, e tswɛ̀y sin Onesifɔr'lè tsiidzin neè sa ra. 20 Erasitsì tou Korɛntsì. Min Torofimùn to Milɛtsì, kàtsu à naà cɛrɛma waa. 21 A maxɔbe e nà mùnkɛɛ̀ watsia jɔɔn. Ebulì, ko Pudɛnsì, ko Linusì, ko Klodiya, ko neema dzyee reè sapɛ wo tswàa. 22 Arì she Tsìfaà ye to a ka, Ŋaablà ɲanwùɔ yè bà ni e tsɛ !