Pɔlì ci nìi nà bà ni watsi latan neè ɲàn
3
1 Àyìwà Tsìmotè, e b'a tɔ̀ ci jisee latan neè ɲan, watsi xɔ ì nà bà ni. 2 Mòdzian taa fa bà ni mòò mà e yɛrɛ tɛy, è nà ɲɛɛn kɛ̀n, yè bà yɛ̀rɛ̀dèra ì, è blà e yɛr'le, è tsoobarafabaa ì, è na e ker'làgè blàbee, è goowuu tɔ bɛy ì, è màgoo na ni Ŋaabla ɲan. 3 Mòò ɲììɲii na e kuàn, è na matsur'la, è mòdzìn tsòònoobaa ì, è na dzia e yɛrɛ kun, è ɲimatààn, è na gaa goowùù rà, 4 è jàànfà moo ì, è goo fa beè e kun nè, è ɲantsyɛɔ̀n yɛ̀rɛ̀blàbeè rà, dziɲaan dzibee goo reè rìì dzi è ra, è geren Ŋaablà tsɛ. 5 Yè e yɛrɛ baà ci ye shia Ŋaablà jɔɔn, tɔ̀ to y'à tàrà è na e tsiiŋnà à ɲan dzibaabee rà waa. A dan gbànbe twɛy mòdzin neè rà. 6 È ɲan, swey dɔ̀n beè gba ì doùn, tàan nìì reè ŋɔn fyɛn, gooɲaan seen ni è kùùn, kur'la goo kaatsià sapɛ yeè bà ni è ɲan, yè twɛy kun e re yɔ̀ɔ̀ ka. 7 Kudɛyn twɛy taan rèè rìì ni kàr'nà, è to fa dzi sààbeen tɔ̀uma tàrà. 8 Àwà, Zhanɛsì ko Zhanbɛrɛsì yè e dzun wɔu Musà rà nìi tsuru dan, y'à sɔ̀swɛy, tɔ̀ soo tsuru, twɛy mòdzin neè sa yeè e dzun wɔɔ̀ sààbeen rà, y'à sɔ̀swɛy. È mòdzin akiri barauma ì, è to na gèsɔn wubee ɲɛynaà kàjaa tsɛ waa. 9 Ŋà, bèma na ni è ra jɔɔn dɛ. È re akiribɛybeè dzuun nà bo mòdzian sapɛ jaa ra, a ci nèe mòkun fii rèe raà tsuru.Pɔlì ci Tsìmotè nìi kàraun, à shìuma yè to tɔ̀ rà
10 Ŋà nìi wo, wo mun sàn siin kàjaa sapɛ tsɛ, wo y'à gban mun kpɛyn. Kàr'nà kàjaa tsɛ, jìì saàn kàjaa tsɛ, goo farama rèè kàjaa tsɛ, ɲɛynaà kàjaa tsɛ, mɔ̀ɲɔɔn kàjaa tsɛ, kɛ̀nbààbee kàjaa tsɛ, ɲànshia kàjaa tsɛ. 11 Goo xɔ xɔù nìì reè ko byɛnbe niì reè sapɛ mun tàrau Antsiyɔshì ko Ikoniyɔmùn ko Lisìrì wɔ̀ rèè ɲàn, twɛy yè bà à tɛ̀y. Tɔ̀ goo xɔù kɛ̀n ni ci mun na à tsi n ma ! Ŋà Tsìfaà mun tsi bou tɔ̀ sapɛ ɲan. 12 Àwà, nìì reè sapɛ sao ni yè e re jaamabee fa Ŋaablà jɔɔn shiɲaanbe tsɛ Yesù Kirisà ɲàn, byɛnbe nà ɲɛn twɛy sapɛ tsɛ. 13 Ŋà nìi mòdzìn ɲan reè, ko mòdzìn sànfir'lèe, twɛy nà bèe jɔɔn ɲaan faa rà, yè dzyee rèè sàn fìrì, è sa yeè bà mòdzin san fìriuma ì 14 Àwà, nìi wo, a nìi kàraun, e bà ɲɛɔ̀n à ra, tɔ̀ kun a si fii ka. È ɲɛn à tsɛ, nìì reè wo kàraun à ra, wo twɛy tɔ̀. 15 Fɔ wo dziin koomɛyniikɔɔn nà, wo Ŋaablà re Kìtaabuà tɔ̀. Tɔ̀ rii dzia wo bà akiritsi, wo yè bà ni tsi ɲɛynaà baraka rɔ̀n, Yesù Kirisà ɲàn. 16 Ŋaablà re Goomaa gè o ge, à sapɛ bou wò rii lè, à y'à wɔ e sɛbɛnbaa rèè dzu. Nàfà to ni à ɲan, è mòò kàràn, è mòò dzuun bo, è mòò teren, è mòò koron ji terenbee shia tsɛ, 17 gè riì ni à to, Ŋaablà re faagoofabaà yè bà mòdzin mɔunma, à dzii yè bà tsyɛɔ̀n faagoo wuu faa sapɛ dzyeèma kajaa tsɛ.