Pɔlì ci Tsìmotè yè bà Yesù Kirisà rè kaadzin wuu
2
1 Tà doùn, n dzin kpiri, Ŋaablà ɲanwùù riì ni Yesù Kirisà ɲàn, fààn tarà bo tɔ̀ ɲan. 2 Wo nìi myɛ̀un mun dzu shɛɛrɛ giri jaa ra, tɔ̀ kɛ̀ɛ̀yfa mòdzin ì mà a ɲɛɔ̀n nìì reè rà, è sa yeè bà dzia à kàràn mòò kpɛrɛ ì rà. 3 A nin byɛnbee fa, a ci Yesù Kirisà rè kaadzin wuu. 4 Kaadzin niì y'à gaa wò goo yè dzibe e kuntsiɛ̀ rà, tɔ̀ na jaamaabee goo kpɛrɛ ì ka e vyɛɛ waa. 5 Tɔ̀ soo tsuru, si dan vwɛɛ̀ doùn, vwɛ̀ɛ̀yfabaà na dzia jɛ̀r'la tàrà tàràu'n kuru pɛn na, à mà bà vwɛ̀ɛ̀ sàrìya reè latsuuŋnà waa. 6 Fɛɛfabaa rìi byɛɛn è fɛɛ fa, tɔ̀ rii jɔ̀na wù è nin tarà shìmaan ɲàn. 7 N nìi dèe, à jàtsi kun. È ɲɛn à tsɛ Tsìfaà nà wo kɔ̀ akiri, wo y'à sapɛ faànmun.8 A taa to Yesù Kirisà rè, màsà kpiri Dawudà tsua dziàn, tɔ̀ niì kpunan bou fùn nèè fi, a ci mun yɛ Kùnàgoo Dziù rìi dèe. 9 Tɔ̀ Kùnàgoo Dziɔ̀ kamà, mun byɛɛn, fɔ min bè shì jɔ̀rɔ̀kɔ ra a ci gookoronfabaa. Ŋà Ŋaablà re goomaa na shiɔ̀ waa. 10 Tɔ̀ rii y'à to mun goo sapɛ ladzyèèmaa tsià n ma, Ŋaablà jaara moo rèè kamà, gè riì ni à to Yesù Kirisà baraka ɲan, twɛy sa yeè tsiuma tàrà, yè nɔɔrɔ dòbɛɛ tàrà. 11 Nèe gooma, mòò dzia ɲɛn nìi rà: «Mìn ba saun ko à ka, mùn nà jaamabee fa ko à ka. 12 Mùn sàn gbaunma ye to à kpɛyn, mùn nà màsàbee fa ko à ka. Mùn to ye e dzii ra tsɛ à ra, à sa nà e dzii ra tsɛ mùn nà. 13 Ɲe ma ba vusootsi, à vuusootsi, kàtsu, à na dzia e dzii ra tsɛ e yɛr'la waa»
Pɔlì ci Tsìmotè yè bà faagoofadzin wuu
14 Mòdzian taa to twɛy goo rèè rè, a dè màxɔbe è ra Ŋaablà jaa ra, ci è mà gooma ì kùùn si sɔswɛy gir'la fa waa. È ɲɛn à tsɛ à yè e lamyɛ̀nbaa rèè màgoo bara boshɔ̀ùn, à na gèsɔn wùbee waa. 15 A maxɔbe, a yɛrɛ kpadè faagoofadzin wuu Ŋaablà ra, nìi fa seey tàrà waa, è bà sààbeen goomaa dèe e shi tsɛ. 16 Gooma nafà bɛy niì reè ko Ŋaabla goòmàà nà byɛɛ̀n waa, twɛy jɔɔn bo. Nìì reè ni è fyɛ̀'un, twɛy bèe jɔɔn Ŋaablà jɔɔn shiɲaanbɛybeè ɲàn. 17 È dzugooma reè ni a ci ɲuun ɲaùn jee ji be kɔɔn. Imɛnɛ ko Filetɔsì sa twɛy mòdzin neè sɔn ni. 18 Twɛy sààbeen shia bàjiu è dzinkɔɔn doùn ci fùn nèè sèè kpunaun nòn. È ɲɛn tɔ̀ tsɛ, è swey rè ɲɛyna bar'la.
Pɔlì ci Ŋaabla dzunbama nìi tsùuŋnà, tɔ̀ na dzia bo e shɔùn waa
19 Tɔ̀ ko e sa ra Ŋaabla dzunbama nìi tsùuŋnà, tɔ ni e shɔùn kpan, nèe gooma ree rèè yè bà sɛbɛɔ̀n à tsɛ tàànmàshɛn, nìi yɛ ci: «Tsìfaà yè e raa rèè tɔ̀.» Tà ko «Mòò o moò Tsìfaà tsoo kir'là, è dan gbànbe terenbɛybee rà.» 20 Gbà blàa doùn, tànge sɛnuma ì ko warifyɛma ì bàsɔùn na ni waa. Swey gɔ̀ɔ̀mà ì, swey yè bà dzùma ì. Swey jisee bla blaa faagoo faara ì, swey yè bà jisee maana reè faagoo faara ì. 21 Tà doùn, mòò riì nà e foò fyɛ bo twɛy goo rèè sapɛ ɲan, tɔ nà bà jisee bla blaa faagoo faa tànge, nìi fɛnɛɔ̀, è tsifaà màgòò wubee, à mà yè bà byɛ̀n tsuuŋnà faagoo wuu faa sapɛ kamà.
22 Vwɛ̀ɛ̀y dzunwɛynbeè kur'la goo reè jɔɔn. Nìì reè yè e vu boò Tsìfaà rà ko duun fyɛ ka, e terenbee, ko ɲɛynaà, ko kɛ̀nbààbee, ko jaanciàn gaa twɛy ka. 23 Sɔ̀swɛy gɔ̀rɔ̀, akiri bɛy goòmà rèè jɔɔn bo. W'a tɔ̀, ci twɛy nàa kaà rìì ka. 24 Tɔ̀ to y'à tàrà, Tsìfaa rè faagoofadzian na wù è bà kaafabaa waa, ŋà è bà mòdzin, nìi vununmadzi mòdzian sapɛ ka, à dzia kàràn sian nà, è bà dzia goo ku e ɲan. 25 Sɔ̀swɛ̀y fa reè, è twɛy kàràn ko vununmacin ka. Gè sɔ̀n ge Ŋaabla dzia cinan è mà, yè e re jaamabee lakere, yè sààbeen tɔ̀. 26 Tà tsuru è akir'là sèeŋmaà è mà, è nà tsi bo sànwɔbaa rè yɔ̀ɔ̀ dzu tɔ̀ niì na è kuɔn, yè bà à sàɔ faa.