Pɔlì ci Tsitè yè làtsii rìi sìn mòòbɔɔ rèè rà
2
1 Àwà Tsitè, nìi kpɛ̀yn wo, mòdzian kàràn, è kòrò kàràn takia ka. 2 À dè mòòbɔɔ rèè rà ci yè e kuun'n kuru tɔ, yè bà mòdzìn sɔbɛn ì, yè bà akiritsi, ɲɛyna taki yeè bà ni e ɲan, kɛ̀nbààbe taki ko mɔ̀ɲɔn taki. 3 À dè tàànbɔɔ reè rà, ci tɔ̀ soo tsuru, è sa yeè e re jaamabee fa, a ci mòdzìn fɛnɛ wù è re jaamabee fa nìi tsuru. È mà bà mòdzìn tsòòbarabaa ì waa, è mà bà dɔ̀ɔ̀kɔɔn ì waa, ŋà yè bà kàràn wùù sinbaa ì. 4 Yè tɔ̀ fa, gè riì ni à to tààn nìì reè na bɔrɔɔ waa, yè twɛy kàràn yè e re kpir'leè ko e dzin nèè kɛ̀n. 5 Yè bà akiritsi ì, nìì reè fyɛɔ, è shiɔ̀ e re gbà dòùn faagoo rà, wùu ni è ɲan, è majàaŋnà e re kpir'leè rè, moo mà nà to Ŋaablà re goomaa ɲanfyanbe waa.Pɔlì ci Tsitè yè bà jaakpadeera wùù
6 Tɔ̀ soo tsuru, dzunwɛyn neè sa maxɔ̀n, yè bà akiritsi ì. 7 Goò sapɛ doùn, wo yɛ̀r'la sa yeè bà jaakpadeera wùù faadzii wuɔ kajaa tsɛ. Sɔ̀bɛnbee ko blàbee yè jà kàr'nà doùn. 8 Gooma fyɛuma yè bà ni a dzu, mòò fa dzi nìi sɔ̀swɛy waa. Tà tsuru, ɲaàn mà nà goo sɔn pɛn ɲaan ja dè mùn tsɛ, ŋà à kùngɔ rìì yè sùùru.
Pɔ̀li ci Tsitè yè làtsii rìi sìn jòn nèè ko dzyee rèè rà
9 Nìi jòn nèè, à dè è ra ci goo sapɛ doùn, yè e majàà e kuntsii rèè rè. Yè e goo dzibe è ra, è mà è sɔ̀swɛy waa. 10 È mà gè sɔn pɛn shɔn è re, ŋà kudɛyn, yè bà vusootsi rìì è kpàdè ci mòo dzia ɲɛn è ra, gè riì ni à to goo sapɛ doùn, blàbe yeè ɲɛn mùn Tsibaa Ŋaablà re goò kàr'nà tsɛ. 11 È ɲɛn à tsɛ Ŋaablà yeè e ɲanwùɔ kpàdèu, adamàdzin mòdzian sapɛ tsià tɔ̀ niì baraka ɲan. 12 Tɔ̀ rii mùn kàr'na mìn sèè bo Ŋaablà jɔɔn shiɲaanbɛybeè kpɛyn, mìn nɔn nèe dziɲan ree kur'la goo ɲaan neè mà, mìn e re jaamabee fa nèe watsi ree ɲan akiri ka, terenbe ka, ko Ŋaablà jɔɔn shiɲaanbe tsɛ. 13 Mìn tɔ̀ fa, mùn si xɔ nìi tsɛ, mìn bà ni tɔ̀ goo blàa màshua rà, ko mùn Tsibaa Yesù Kirisà, mùn ne Ŋaablà blaa nɔɔrɔ nìi nà kpàdè. 14 È yɛrɛ siun mùn kamà, è bà ni mùn kùngɔ màbo gooɲaan sapɛ suun, tà ko è mùn fyɛ, mìn bà à tsoo ra modzìn ì, nìì reè ni goowuu faa ɲan tsuù ɲàn. 15 Tɔ̀ rii dè mòdzian nà, e màxɔ̀n, e sààben de è ra kùntsììbee fàan sapɛ ka. Mòò pɛn mà a ɲanfyanbe.