Hébreux 2

Goo giri y'à kpàdèu, ci Ŋaablà re goomaa sààben

1 Àyìwà tɔ̀ kamà, mùn twɛy goo nìì reè myɛ̀un fɔ mùn yeè è kun e sɔbɛn ka, sànko, mùn mà nà bè shi tsɛ, nìi nà bà mùn mà ɲaan waa.

2 Àwà, mɛ̀rɛ̀kɛ rèè nàu gooma niì dè ɲe fàbɔɔ rèè rà dan, tɔ bàu gooma nìi kpàdèu, ci à sààben. Nìì reè na à goomaa latsuù waa, yè bà e nɔun à mà, nìi na wù è twɛy tàrà, tɔ̀ yeè è tàrau.

3 Àyìwà, tɔ̀ ye ba fau tɔ̀ tsuru ɔ, nìi mùn tsià goomaa, mùn tɔ̀ niì myɛ̀un mùn ye tɔ̀ bo e si bònè, nìi na wù è mùn tarà mùn ni dzi e tsi tɔ̀ ra ɔ ? Tsìfaà yɛ̀r'la rìì jɔ̀na tɔ̀ goò gooma deu. Nìì reè y'à myɛ̀un, twɛy yè kòmànà à dè kpàdè mùn na ci à sààben.

4 Ŋaablà yɛr'la sa to yè nà à kpàdè, ci è re goomaa sààben. À tɔ̀ kpàdèu tàànmàshɛn kabagooma giri, ko kabagoo goo giri, ko dzibaabe goo giri ka, à nìì reè faa dzi siun e re mòdzin neè rà, è re Dzi Fɛnɛɛ jàà è tsɛ, a ci à y'à sàò nìi tsuru.

Gè sapɛ kuntsììbe ni Yesù suun

5 Àyìwà, mùn nìi sapɛ deu, tɔ ni dziɲan ye nakɔɔn nì tsɛ. Tɔ̀ dziɲan ye nakɔɔn, Ŋaablà na tɔ̀ kùntsììbe siɔ̀n mɛ̀rɛ̀kɛ rèè rà waa.

6 Ŋà, Ŋaablà re Goomaa kàjaa sɔn ɲan à deò rìì nèe tsuru ci:

«Ŋaablà, mòdzin fee rìì, wo yè bà ni à taa to à re ?

Adamàdzin mòdzin fee rìì, wo yè bà ni a magoo wɔ à ɲan ?

7 Wo y'à màjaaŋ mɛ̀rɛ̀kɛ rèè mà watsi dɛɛnin bàsɔùn doùn.

Wo blàbe siun à ra, wo yè blà wɔ à ɲan.

8 Wo gè sapɛ wɔu à sàn dzuun.»

Àwà, Yè dzin ci Ŋaabla gè sapɛ wɔu à sàn dzuun, tɔ̀ dzuɔn ci, gèsɔn pɛn na ni, nìi na ni à sàn dzuun waa. Mùn to na gè sapɛ wɔuma jàa à sàn dzuun ŋe waa.

9 Ŋà, m'a jàa, ci Ŋaabla Yesù màjàaŋ mɛ̀rɛ̀kɛ rèè mà, watsi dɛɛnin bàsɔùn doùn. À byɛn niì fau è san, Ŋaabla blàbe siun à ra, è blà wɔ à ɲan tɔ̀ kamà. Ŋaablà ɲanwùɔ doùn, fɔ è bà na saun mòdzian sapɛ kamà.

Yesù bàu mòdzin, è nà wɔ mòdzin neè rà

10 Àyìwà, Ŋaablà rii gè sapɛ ɲɛun, à sapɛ yeè bà ni à re ni ɲan. Tɔ̀ tsuru, à sàò na ni è mòò giri bà e dzin, è yè dɔ̀n à blàbee gàne rɔ̀n. Tɔ̀un, nìi na wù è tɔ̀ shia dzii san è re, yè tsi, fɔ Ŋaablà yeè bà na tɔ̀ bàu mòdzin dzii tsyɛunma à re byɛnbee baraka rɔ̀n.

11 Àwà, Yesù rìì mòdzian bo jia e si Ŋaablà re, gooɲaan tsiɛ yè bo è vu ra. À nìì reè bo jia e si Ŋaablà re, gooɲaan tsiɛ yè bo è vu ra, fà soo rii ni à ko twɛy sa re. Tɔ̀ rii kamà, è bà ni è kiri, ci wò neema reè, tɔ̀ seey na ni à ra waa.

12 Tà doùn, è dzin Ŋaablà ra ci:

«Wo Ŋaablà riì kuru, mun nà tɔ̀ gooma de n neema reè rà,

min tsoo dzi ɲɛn wo tsɛ è ladzyeeŋmaà kur'la fi.»

13 À ci kɔn ci:

«Mun naa si ɲɛnmaà sapɛ nà bà wo rìì Ŋaablà.»

È bà ci kɔn:

«Ŋaabla mòò niì reè sìun mun na, mun ko twɛy yɛ esire.»

14 Àwà, à mòò niì reè gooma deè tɔ̀ tsuru, gè soo rii ni twɛy sapɛ ɲan, nìi yè è baɔ̀ soo, tɔ̀ yeè bà tsìɛn ko shutswɛɛ. Tɔ̀ rii y'à to, Yesù nàu, twɛy gè rèè na ni à sa ɲan, è kpàdè, ci à sa è tsuru mòdzin. À tɔ̀ fau nì, sànko à saàn saabu rɔ̀n, saàn fààn niì ni Sùtana suun, è san ɲinan tɔ̀ tsɛ.

15 Nìì reè sapɛ to ni saàn shiɲaanbeè ɲàn e sià ko e kur'la sapɛ doùn a ci jòn, è twɛy sa tsi bo tɔ̀ ɲan.

16 Àwà, à fyɛɔ ci Yesù na na, è nà wɔ mɛ̀rɛ̀kɛ ì rà dɛ, ŋà, à nàu nì, è wɔ Ibraximà tsua dzin nèè rà.

17 Tɔ̀ rii kamà, à na wù, è bà e neema reè tsuru mòdzin kàjaa sapɛ tsɛ, sànko, è bà saaka jɔɔndzin, wùù ni nìi ɲàn, è bà vusootsi Ŋaablà re faagoò doùn. Tɔ̀ na wù è fa, sànko è mòdzian rè gooɲaan tsii reè bo è vu ra.

18 Àwà, nìi byɛnbee ko Sùtan'naa dzuunbweè, twɛy y'à sa tarà dɔ̀un nìi fa, nìi reè ni twɛy goo rèè gè doùn dòònun, à dzia wɔ twɛy sa ra.