Jacques 1

Yàkubà

rè sɛbɛn faumaà

1 Mun Yàkubà, Ŋaablà ko Tsìfa Yesù Kirisà rè jòn kpir'là, nèe mun ne sɛbɛn, m'a ka Isirayɛli dzin neè kun teeŋ fiɛ̀ rè, è gè o ge jee jiɔ̀ dziɲantsiɛ doùn. N ne tswɛy ni è re.

Mìn byɛnbee tsi e ma

2 N neema ì, byɛnbee kaatsi gè o ge nà e tarà e ɲɛunmaà kamà Yesù rà, y'a sapɛ ba taamadzibe goo bla.

3 Ye bà à tɔ̀ ci ye sɔ̀n mà siinkɔɔn ɲɛynaà doùn, tɔ ye sàn gbaàn cɛyn.

4 Ye sàn gbaunmaà ɲɛynaà doùn, fɔ tɔ̀ yeè bà goo dzii tsyɛunma. Tɔ̀ ye fa, ye nà bà mòdzin dzii tsyɛunma ì, ye yè bà mòdzin mɔunma ì, goo sɔn pɛn fa bà ye fɔɔn waa.

5 Akiriblabeè to ye e sɔn fɔn, à y'à gaa Ŋaablà re. À nà à sìn à tsìfa ra. À nà tɔ̀ fa, kàtsu Ŋaabla kaarià è mòdzian sapɛ kɔ, à na a sɔn dèe waa.

6 È ba à gaa, à y'à gaa ko ɲɛyna ka, à mà e ciri waa. À mà e ciri waa, kàtsu mòò riì yè e cir'la, tɔ ni a ci kòòyua pàngòpangokɔɔn, fyɛɛn yè bà à ɲankwey fu bèe kàjaa sapɛ tsɛ.

7 Mòò riì ni tɔ̀ tsuru, tɔ mà e kɛsɛ ci wo nà gè tàrà Tsìfa Ŋaablà re waa.

8 Tɔ̀ fa fa waa, kàtsu à mòdzin akirifiitsi. À re goo gè o ge doùn, à akiri na ni soo tsɛ waa.

Gètsià ko gbakɔɔn sa soo

9 Neema riì gbakɔɔn tɔ̀ yeè e taamadzibe, kàtsu Ŋaablà y'a ɲanseòn.

10 Neema riì to gètsi tɔ̀ sa yeè e taamadzibe e majàaŋmaà doùn, kàtsu, à nà dɔ̀n bo vunkan tsuru.

11 Àwà, vuàn kaunmaà shɔ̀ùn, bwèè boò, tɔ̀ ŋɔ̀n taamaa y'à gɔ̀rɔ̀. Tɔ̀ faumaà shɔ̀ùn, kan nèe saa, wùbe niì na ni à ra, tɔ̀ yeè dò. Tɔ̀ fau'n kuru soo rà, gètsià sa na fɔ̀rɔ̀, fɔ è bè dò bo e re goo fakɔɔn reè fi.

Mìn yɛrɛ kaàwɔ kur'la goo ɲaan neè rà

12 Àwà, mòò riì byɛnbee tsià e ma e sɔn màsiinkɔɔn watsi rɔn, tɔ̀ tsìfa raà wùbeu. À raà wùbeu, kàtsu à sɔ̀n màsiin dòumaà shɔ̀ùn, Ŋaabla nìi làyiri seòn e kɛnbaa rèè rè, tɔ̀ yeè bà jaamabe dziù dò bɛɛ, à nà tɔ̀ tàrà.

13 Gooɲaan fa kuru y'a moo o moò kun, maà dzin ci Ŋaablà rii wo dzuun boò waa. Maà tɔ̀ dè waa, kàtsu Ŋaablà dzuun na dzia bo è ɲaan fa, à tsu to na mòò dzuun boò.

14 Mòdzian soo sookɔɔn sapɛ dzuun boò e kur'la goo ɲaan nì kpɛyn. Kur'la goo ɲaan nee y'à sɔ̀ɔn fɔ è bè dzi à dzuun.

15 Wo y'a tsiì kur'la goo ɲaan nà, tɔ gooɲaan nì ker'là. Gooɲaan to ye bɔɔ dzi, tɔ nàa san nì ka.

16 N neema ì, mun ye nìì reè kɛ̀niɔ̀n fɔ è bè geren, e maà e san fìrì waa.

17 Gè wùù niì reè sìan mùn na, ko kɔ̀ì ge dzii tsyɛunmaà sapɛ, à sapɛ daàn è bo jìran nɔ̀n. À sapɛ daàn è bo Ŋaablà re, tɔ̀ niì vyevyee kungɔ reè ɲɛnbaà. Ŋaablà na e lakere jaà, à to vyevyee rìì kudɛyn.

Mìn Ŋaablà re goomaa shi jiì

18 À bàu à sàò, è ɲe ɲɛn e re sààbèn goòmàà baraka rɔ̀n, gè riì ni à to, ɲe yè bà à re gè ɲɛunma rèè sapɛ ɲan kùngɔ̀ jɔna reè sɔn.

19 N neema ì, mun ye nìì reè kɛ̀niɔ̀n fɔ è bè geren, y'a tɔ̀, ci mòò o moò, à wù a toro wɔ yè bà dzi. À maà bà goomaa tabe waa, à vunun ta to mà bà dzi waa.

20 Vun'nà ta mà bà dzi waa, kàtsu vununtaà doùn, goo nìi tereòn Ŋaablà jaa ra, tɔ̀ na faa waa.

21 Tɔ̀ kamà, ye san bo goo nooŋmaà sapɛ ɲan, ye sèè bo ɲanbe goo dzyee reè sapɛ kpɛyn. Ŋaablà re gooma niì jiɔ̀ e duùn, ye e tsiì tɔ̀ ra ko vununmacin ka. Tɔ̀ rii dzia ye xɔɔn tsi.

22 E maà dàn gooma ree myɛ̀ɛ̀n bàsɔùn mà waa, ŋà ye bà à shi jiìbaa ì. Tà boshɔ̀ùn, ye e yɛrɛ maniɛ̀n,

23 kàtsu, mòò riì Ŋaablà re goomaa myɛ̀ɛn, à to na à shi jiɛ waa, tɔ ni a ci mòò riì yè è jaakɔrɔn siɛ̀n dzwàleyn na.

24 À re e yɛrɛ siin dòomaà shɔ̀ùn è dɔ̀n be, à na ni nìi tsuru, à taa yeè myɛ̀n bo tɔ̀ re mɔn.

25 Ŋà shi kpadèuma nìì reè dzii tsyɛɔ̀n yè bà mòò labaà, mòò riì jaa ni tsuù twɛy tsɛ, yè bà shì tsùuŋnà è ra, tɔ̀ tsìfa raà wùbeu e re goo fakɔɔn reè doùn. À raà wubeu, kàtsu à na à lamyɛɛ̀n è taa myɛn à re waa, ŋà à y'à shi jiɛ e re goo rèè doùn.

26 Mòdzian sɔn ye ba e yɛrɛ siɛ̀n Ŋaabla shi jiibaa, tɔ̀ to y'à tàrà à na dziɔ̀ e nɛɛ̀n dzuun waa, tɔ̀ tsìfa yè e yɛrɛ maniɛ̀n, à re Ŋaabla shi jiɛ to goo nàfa bɛy.

27 Ŋaabla shi nìi fɛnɛɔ̀ Fà Ŋaablà jaa dzuun, noo na ni à kàjaa pɛn tsɛ fyeu, tɔ̀ rii yɛ a taa to dzinsèè rèè ko fùnshɔ̀ùntaan rèè rè e re byɛnbee doùn, tà ko a yɛrɛ taàn dziɲa'un goo nooŋmaà sapɛ ma.