Piyɛr'lè
sɛbɛn jɔna faumaà
Sɛbɛɛn kaɔ nìì reè rè ko dzwɛɛ̀
1
1 Mun Piyɛrì, Yesù Kirisà rè kɛɛradzian, nèe mun ne sɛbɛn, è sìn Ŋaablà jaara moo rèè rà, twɛy nìì reè jee jiɔ̀ yè bà ni tɔnɔnbee rà Pɔn mar'la, ko Galatsi mar'la, ko Kapadɔsi mar'la, ko Azhi mar'la, ko Bitsini mar'la ɲàn. 2 Fà Ŋaabla na ye nìì reè bo tsùuŋnà bɔrɔɔ e jaara è kòrò à ɲan twɛ̀ɛ ka, è bà ye fɛnɛbeu ye yè bà à raa à re Dzia baraka rɔ̀n, ye yè bà ni Yesù Kirisà vu kun tà ko tɔ̀ tsìɛn kounmaà yè ye fòò fyɛ, arì she, à ɲanwùɔ ko jaanciàn, è twɛy sìn e ra giri !Piyɛrì ɲɛynamoo rèè latsiu nìi ka
3 Ari she, tsoo dzi yeè ɲɛn mùn Tsìfa Yesù Kirisà Fà Ŋaablà tsɛ ! È ɲɛn à tsɛ, à ɲan màtsuru brisià kamà, à mùn kereu yeu Yesù Kirisà sèè kpunaunmaà baraka ɲan è bo fùn nèè fi, mìn bà ni siɲɛnma tàrà, nìi jaama. 4 È bà shɛn, nìi lamɔ̀nɔ̀n tsùuŋnà, à na fyeerà, à na noora, à na fɔr'la, è bà màrà tsùuŋnà ye re jìrànxɔɔ̀ doùn. 5 Ɔ̀ɔn ye nìì reè màraɔ̀ Ŋaablà re dzibaabee baraka ɲan è ɲɛn ɲɛynaà tsɛ ye tsià kamà, tɔ̀ niì nà e kpadè watsi lataan ɲàn.
6 Tɔ̀ kamà ye taama dzi, ye to kɛ̀sɛɛn ye ba ni byɛnbee kaatsi giri gè doùn doònun, tɔ̀ ye bà naɔ̀ taamaŋununbe ka ye mà watsi dɛɛnin bàsɔùn doùn. 7 Àwà sɛn'na bar'la gè rìì, ŋà tà ko e sa ra, à jia sà kɔɔ rè a noo yè bo. Tɔ̀ soo tsuru, ye re ɲɛyna nìi nàfa blà sɛn'na mà, twɛy byɛnbe reè sa ye tàr'la rìì, gè riì ni à to à ɲan ye siin, à wùbee yè tɔ̀, è dzi na tsoo dzi, ko nɔɔrɔ ko blàbe ka ye mà Yesù Kirisà kpàdè sii sèè. 8 Yesù rìi, ye jaa na ɲɛn à mà ŋe waa, ye to y'à kɛ̀niɔ̀n. Ye jaa na ni à ra dòònun waa, ye to ɲɛyna faɔ̀ à ra, ye ɲan ye bà tsyɛɔ̀n taamadzibe ra nìi jaa na dzia dè tsu, nɔɔrɔ yè bà ni à ɲan. 9 È ɲɛn à tsɛ, ye nìi tàraɔ̀ e re ɲɛynaà tɔ̀nɔ̀n, tɔ̀ rii yɛ ye xɔɔn tsiumaà.
10 Ŋaablà ɲanwùù riì na ye nìn, kɛɛra niì reè tɔ̀ gooma deu, twɛy tɔ̀ tsiɛ̀ goo rèè ɲan gaaŋ cɛyn, y'à ɲan siin. 11 Àwà Kirisà nà byɛn byɛun'n kur'liì rà, tà shɔ̀ùn nɔɔrɔ yè ɲɛn à tsɛ, Kirisà rè Dzi riì ni è ɲan, tɔ̀ na tɔ̀ gooma de tsùuŋnà è ra nòn. Twɛy goo rèè nà fa watsi riì tà ko è nà fa fau'n kur'liì rà, è na tɔ̀ ɲan gaa cɛyn, y'à tɔ̀. 12 À kpàdèu è ra ci è na ni tɔ̀ faagoo rìi rà, à naà è yɛ̀r'leè raa waa, ŋà è na tɔ̀ faa ye rìì lè. Ŋaablà re Dzi Fɛnɛɛ baraka ɲan, tɔ̀ riì kau è bo jìrànxɔ rɔ̀n, Kùnàgòò Dzìù de reè tɔ̀ goò rìì gooma deu ye ra dòònun, mɛ̀rɛ̀kɛ rèè sa yeè bà n'a re, ye jaa yè ɲɛn à mà. 13 Tɔ̀ kamà ye e ɲanshì, e akiri yè bà ni e yɛr'le. Ye e si ko e kuru xɔbe Ŋaablà ɲanwùɔ tsɛ e naà tɔ̀ niì tàrà è bo Ŋaablà re, Yesù Kirisà kpàdè sii sèè. 14 Ye Ŋaablà vu kun a ci dzin gooma myɛnbaa ì. E na ni kur'la goo ɲaan niì reè fyɛ̀'ùn tɔ̀bɛ̀ybeè watsi rɔn, e maà e re jaamabee fa twɛy tsɛ dɛ. 15 Ŋà ye bà mòdzìn fɛnɛ ì e re jaamabee ko e kuru doùn, a ci Ŋaablà riì ye kiriɔ, tɔ̀ sa fɛnɛɔ̀ nìi tsuru. 16 È ɲɛn à tsɛ à sɛbɛɔ̀n Ŋaablà re Goomaa doùn ci: «Ye bà fɛnɛ ì, kàtsu mun fɛnɛɔ̀.»
17 Tà doùn, ye ba Ŋaablà kir'la ci e fa, tɔ̀ niì kitsia kùn'na mòdzian soo sookɔn sapɛ tsɛ è kòrò è faadziɛ ka à na mɛɛ̀ mòò tsɛ, ye shi tɔ̀ jɔɔn e re bwèy fii tɔnɔnbe doùn jaamabe fakɔɔn nà dzɔ̀xɔɔ̀ tsɛ. 18 Y'a tɔ̀ ci ye jaamabee fau'n kuru nafà bɛy riì seun shɛn e fa rèè rè, ye kùngɔ mà na bo tɔ suun gè bar'lama ì ka nìi yɛ war'là ko sɛn'na waa. 19 Ŋà Kirisà tsììn niì kpaxɔ, ye kùngɔ mabou tɔ̀ rii ka, tɔ̀ riì bàu a ci sààtòmòìrii, noo ko fyɛ̀ na ni nìi rà waa. 20 Sani dziɲaan yè ɲɛn, à goò na tɔ̀ tsùuŋnà nòn. È kòmànà kpàdè nèe watsi latan nee ɲan, ye kamà. 21 Wò rii baraka ɲan, ye ɲɛɔ̀n Ŋaablà ra, wò riì y'à kpunan bou saàn ɲàn è nɔɔrɔɔ̀ sìn à ra, ye yè bà ni ɲɛn Ŋaablà ra, ye si yè bà xɔ à tsɛ.
22 Àwà ye tsìiŋmaà sààbeen rà, tɔ ye dùsùkuan fyɛu, ye bà ni neema reè kɛ̀n ko duunfyɛ ka. Tà doùn, ye e si kɛ̀n ko e dusùkuan sapɛ ka. 23 Ye kereu yeu, ŋà tɔ̀ na fa shìmàn tsu baraka ɲan, nìi bar'la waa fɔ bara bɛy, tɔ̀ niì Ŋaablà re gooma jaamaa, dò na ni à mà waa. 24 È ɲɛn à tsɛ, à sɛbɛɔ̀n Ŋaablà re Goomaa doùn ci: «Mòdzian sapɛ ni a ci vun, è nɔɔrɔɔ̀ yè bà ni a ci vun kan. Vuàn gɔ̀r'la, à kaàn yè saa, 25 Ŋà Tsìfaà rè Goomaa, tɔ ni tsuù kudɛyn.» Tɔ̀ Goomaa nì Kùnàgoo Dziɔ̀ goomaa, nìi dèu ye ra.