Piyɛrì ci Yesù kpàà jaama, ɲɛynamoo rèè yè bà jàmààndzin fɛnɛ ì
2
1 Tà doùn, ye san bo ɲanbee kaatsià sapɛ ɲan, sànbè goo kaatsia sapɛ, duungoofiibeè, jaaɲininbeè ko mòdzìn tsòò bar'la. 2 A ci dzinyɛy kereuma yeu ì, ye sɔ̀ɔ̀n Ŋaablà re Goomaa nɔnɔn taki takìà kpɛyn, gè riì ni à to tɔ̀ baraka ɲan, ye dzi bɔɔ e tsià kamà. 3 È ɲɛn à tsɛ «Tsìfaà ɲanwùɔ nìi boò, ye tɔ̀ nèeŋ, y'a jà ci à wù».4 Ye kpɛrɛ Tsìfaà rà, kpàà jaamaa. Mòdzian yè e nɔun à re, ŋà Ŋaablà y'a bou e jaara, à kpà yè bà xɔ à re. 5 Ye sa bàu a ci kpàà jaama ì, ye yè ka gbà ji, Ŋaablà re Dzia rè gbà. Ye yè bà saaka goojaabobaa jàmàkùrù fɛnɛ, ye bà ni saaka ì bo Ŋaablà re nìi dzi à ra, Yesù Kirisà baraka rɔ̀n. 6 Tɔ̀ kamà, à sɛbɛɔ̀n Ŋaablà re Gooma doùn nèe tsuru ci: «À siin, mun kpàa tsuɔ Tsiyɔ̀n, gbàà nɔ̀nkɔ̀n kpaa, nìi ɲankɛrɛɔ̀, à kpà yè bà xɔ. Mòò o moò ye ɲɛn à ra, tɔ̀ fa seey jà waa.» 7 Tà doùn ye ɲɛynamoo rèè, à ye kù'ùn seun. Ŋà ɲɛyna bɛy reè rè, «Gbà ji reè kpàà riì maaŋ, tɔ̀ rii nàu sèè è bà gbàà kpàà jɔnaa, gbàà nɔ̀nkɔ̀n kpaa. 8 À bau sàn nà baan kpàà, kpàà riì mòò mɛɛ̀.» Yè san nà baan à ra, kàtsu yè e nɔɔn Ŋaablà re Goomaa shi jiɛ̀ mà. Tɔ̀ rii sa na latigɛ̀ tsùuŋnà è kàjaa tsɛ. 9 Ŋà ye, ye bàu kun ɲankɛrɛuma, màsà kpir'la rè saakagoojaabobaa ì, jàmààndzin fɛnɛ ì, Ŋaabla nìì reè bàu e raa yè bà ni à re goo blà bla fauma rèè dè, à nìì reè kiri bou tsitsiɛ̀ ɲàn, yè nà à re vyevyee kabagoomaa nà. 10 Ye nìì reè naà à re mòdzin dan waa, ŋà dòònun ye bàu à re mòdzin ì. Ye naà à ɲan màtsur'la tàraɔ̀ waa, ŋà dòònun y'a ɲan màtsur'la tàrau.
Piyɛrì ci ɲɛynamoo rèè yè e re jaamabee fa nìi tsuru ɲɛyna bɛy reè fi
11 N neema kɛniunma rèè, ye tɔnɔn dɔnbobaa ì dzɔ̀nxɔɔ̀ tsɛ. Tà doùn, m'a gaa e re, ye e yɛrɛ kun gɔɔ̀n kur'la goo ɲaan neè rà. È ɲɛn à tsɛ, twɛy kaa faa xɔɔn ka. 12 Ye e re jaamabee fa fau'n kuru wuu ra Ŋaabla tɔ bɛy reè fi. Tɔ̀ tsuru è kɛ̀sɛɛn ye ba doò wɔɔ̀ ye ra ci ye gooɲaan fabaa ì, è nà ye faadzii wuɔ kààwɔ, yè tsoo dzi ɲɛn Ŋaablà tsɛ tɔ̀ bo sii sèè è re. 13 Tsìfaà kamà, ye e majàà adamàdzin mòdzin neè rè fàan sapɛ ladzyèèmaa rè. Ye e majàà màsa kpir'là rè, kàtsu wò rii kùntsii blàa. 14 Tà ko ye e majàà jàmààntsi rèè rè, è ɲɛn à tsɛ twɛy màsà kpir'là rè kɛɛra ì rìì, yè gooɲaan fa reè koron, goowuu fa reè, yè twɛy saan. 15 È ɲɛn à tsɛ Ŋaablà saɔ rìì yɛ, goowùɔ fakɔɔn, tɔ̀ yeè mòdzin akiri bɛy ko goo jaa tɔ bɛy reè dziɛ̀ tsyee. 16 Ye xɔrɔnbee shi jiì, ŋà e maà ɲanbee mɛnɛn xɔrɔnbee dzuun waa. Ye e re jaamabee fa rii a ci Ŋaablà re jon ì. 17 Ye blà wɔ mòdzian sapɛ ɲan, ye neema reè kɛ̀n, ye shi Ŋaablà jɔɔn, ye blà wɔ màsà kpir'là ɲàn.
Piyɛr''lè làtsii rèè, è bè faagoofadzin neè ko byɛnbee kàjaa tsɛ
18 Faagoofadzin neè, ye e majàà e kuntsii rèè rè, è jɔɔn shiɲaanbee yè bà ni e ɲan. Nìì reè wù ko nìì reè vunun ma dzi, à na twɛy bàsɔùn waa, arì ɲee ɲan reè sa. 19 È ɲɛn à tsɛ mòdzin na wù byɛnbe riì ka, è ba tɔ̀ tsià e ma Ŋaablà kamà, tɔ Ŋaablà ɲanwùù rii kpàdèe. 20 Àwà yè ba ye byɛɛn kàtsu ye gooɲaan ni faɔ̀, ye kɛ̀sɛɛn ye ba tɔ̀ tsia e ma, ye re blàbe kɛn ni tɔ̀ ɲan ? Ŋà yè ba ye byɛɛn kàtsu ye goowùù rii faɔ̀, ye ye ba tɔ̀ tsia e ma, tɔ Ŋaablà ɲanwùù rii kpàdèe. 21 Àwà ye kiriu tɔ̀ rii kamà. È ɲɛn à tsɛ Kirisà sa byɛun ye kamà, è bà ni ye jaa kpàdè, ye yè jìì à sàn kɔɔ doùn. 22 À na gooɲaan fa, namara goòmà pɛn to na bo à dzu. 23 À ɲɛ̀nkɔɔn doùn, à na e tsiì sàrà ɲɛ̀yn ka. À byɛnkɔɔn doùn, à na e jaa xe bo mòò rà. È raa goò tou Ŋaablà suun, tɔ̀ riì kitsia kùnùn ter'na. 24 À yɛ̀r'la ɲe re gooɲaantsiɛ seun gbaàn gɔɔ̀ rà e gɔɔ̀n ɲàn, gè rii n'a to mùn saunmaà gooɲaan kàjaa tsɛ, mìn jaamabee fa terenbee kàjaa tsɛ. À màà ɲuun neè rìì saabu ɲan, ye cɛrɛmabeu. 25 Àwà ye na ni a ci sàà fìriuma ì. Ŋà dòònun, ye yè e kpɛyn sèeŋ e xɔn reè kpatsuubaà ko è kààwɔbaà mà.