Piyɛrì ci kpir'leè ko tàan rèè wù yè e si kun nìi tsuru tsùɔ̀ doùn
3
1 Nìi ye tàan rèè sa, ye e majàà e re kpir'leè rè. Tà tsuru è swey ma ba e tsiiŋnà yè ɲɛn Ŋaablà re Goomaa nà, yè dzi tarà bà Ŋaablà raa e re tààn fau'n kuru wuɔ saabu ɲan, à mà bà gooma tsu ka waa. 2 È ɲɛn à tsɛ, è nà ye jìì saàn kààwɔ, y'à jà ci blàbe ni ye ɲan, ye duùn yè bà fyɛɔ. 3 E re màwɔɔ mà bà da rɔ̀n màwɔ waa, nìi yɛ kùngɔɔ̀ myɛ̀unma wùɔ, vurage sɛnuma reè ko vya kpàxɔù rèè. 4 Ŋà e re màwɔɔ yè bà duùn naa màwɔɔ rìì, nìi màwɔ mɛnɛunma. Tɔ̀ rii yɛ vununmadzibeè ko vununciàn. Tɔ màwɔ, nìi na bar'la waa, à kpà yè bà xɔ Ŋaablà re. 5 Dan dan, tààn fɛnɛ niì si reè si na xɔ Ŋaablà tsɛ, twɛy na e mawɔɔ̀ tɔ̀ rii tsuru. È mà na jàaŋnà e re kpir'leè rè. 6 A ci Sarà, à na e majàaŋnà Ibraximà rè, à y'à kir'la ci wò «tsìfaà». Ye baɔ̀ wò rii dzin taan ì, ye kpɛ̀ynto ye ba wùɔ faa, shiɲaan goo pɛn mà bà ye akiri fùa waa.7 Tɔ̀ soo tsuru, jaamabee dzyèè doùn, ye kpir'leè sa yeè e re tààn rèè kun akiritsifabe ka, ye bà à tɔ̀ ci tàànbee nìi tsuru gè, à fàan dzyɛ̀n. Ye è blàbe, è ɲɛn à tsɛ, jaamabe riì tàr'la Ŋaablà ɲanwùɔ baraka ɲan, ye tɔ̀ shɛɛ̀n seen esire. Ye tɔ̀ fa, gè riì ni à to goo sɔn pɛn mà e re Ŋaabla mafyɛyn nèè jɔɔn shu waa.
Piyɛrì ci ɲɛynamoo rèè yè e re jaamabee fa nìi tsuru
8 Àwà tà sapɛ shɔùn, e sapɛ yeè byɛ̀n soo ma, ye e taa to e si re, ye si kɛ̀n neemabe doùn, ye màtsuru e si ra, ye e màjàà e si re. 9 E maà ɲaan ka ɲaan sarà, e to mà ɲɛ̀yn ka ɲɛ̀yn sarà. Ŋà ye dzwɛ rìì ji, è ɲɛn à tsɛ ye kiriɔ tɔ̀ rii là, nìi yɛ ye yè dzwɛɛ̀ tàrà shɛn. 10 È ɲɛn à tsɛ, à sɛbɛɔ̀n nèe tsuru ci: «Mòò riì ci wò re jaamabee yè wùbe wò suun, è sì gbààn tarà, è nɛɛ̀n tààn ɲaan dee mà, è dziɛ̀ kààwɔ namara gooma dee rà. 11 È vwɛ̀ɛ̀y ɲaan jɔɔn, è wùɔ fa. È jaanciàn gaa, è gban à kpɛyn. 12 È ɲɛn à tsɛ, Tsìfaà jaa ni mòdzin tereonma rèè tsɛ, à toro yè bà wɔɔ è re màfyɛɛ̀n rè. Ŋà gooɲaan fa reè, è jaa ker'la twɛy kpɛyn.»
13 Tsì rii yɛ̀rɛ̀ to nà ɲaan fa ye ra, ye ye ba e shiɔ̀ goowuu faa rìì là ? 14 Àwà ye to kɛ̀sɛɛn ye byɛn, terenbee yè bà saabu, ye raa wùbeu. E maà shi è shia goo pɛn jɔɔn, e akiri to mà gbiiman. 15 Ŋà Kirisà rìi Tsìfaà, y'a to tɔ̀ yeè bà gè fɛnɛ e dusùkuan doùn. E si to xɔ nìi tsɛ, mòò ye e tey tɔ̀ mà, e mabyɛ̀n tsuuŋma yè bà ni kudɛyn, ye jaabi wuu sin à tsìfa ra. 16 Ŋà, y'a goò fa vununmacin ko blàbe doùn, akiri wùù yeè bà ni e ɲan. Tà tsuru, ye re jaamabee fau'n kuru wuɔ doùn Kirisà ɲàn, nìì reè y'à gaa ye yè ye tsoo bara y'à bà ci ye ɲaan faa, twɛy kùngɔ yè sùùru. 17 È ɲɛn à tsɛ, e bà byɛɛn goowuu faa kamà, tɔ̀ rii ye ba Ŋaablà saɔ, tɔ fyan e bà byɛɛn gooɲaan faa kamà.
Piyɛrì nìi dèu Kirisà saàn ko à re dzi tar'la tsɛ
18 Àwà Kirisà sa saun jaa soo pe gooɲaantsii reè kamà. Wò riì tereòn, à tɔ̀ fau teren bɛy reè tsɔ̀saan ɲàn, gè riì ni à to è ye wɔ Ŋaablà tsɛ. À saun gɔɔ̀n ɲàn, è sèè bà jaama Ŋaablà re Dzia baraka rɔ̀n. 19 Nìì reè xɔɔn ni kàsoò rà laxaran, à bèu tɔ̀ rii tsuru, è bè Kùnàgoo Dziɔ̀ dè twɛy rà. 20 Ɔ̀ɔn nìì reè ye mabaun dan, Ŋaablà yeè bà e mɔɲɔun è tɛyn Nuùn nè konkoron blaa lamɔnɔ̀n bwey, nìì doùn mòkun daman, ŋaalon pe tsi bou yuà fi. 21 Tɔ̀ na jaara foo tààmàshɛn ni, nìi ye tsià dòònun. À na gɔɔ̀n raa noo reè boò jaara foo waa, ŋà a ye a dzii rìì sìn Ŋaablà ra, akiri wùù ka. Jaara foo ye tsià Yesù Kirisà sèè kpunaunmaà nì baraka ɲan, è bo saàn ɲàn. 22 À tèyn bèu jìrànxɔɔ̀ doùn, è bà tsùuŋnà mɔn Ŋaablà sirama si jaa rè. Mɛ̀rɛ̀kɛ rèè ko kùntsii rèè, ko dzibaabe reè sapɛ koroòn à re.