Piyɛrì nìi dèu jaamabe bɔrɔɔ ko jaamabe yee tsɛ
4
1 Àwà, a ci Kirisà byɛun gɔɔ̀n ɲàn nìi tsuru, e sa yeè fààn wɔ e ɲan tɔ̀ kɛ̀sɛmà soo ka. È ɲɛn à tsɛ, mòò riì byɛun gɔɔ̀n ɲàn, tɔ dzi tarau gooɲaan tsɛ. 2 Tà tsuru à mà nà e re jaamabee fa adamadzin mòdzin neè raa kur'la goo reè tsɛ dɛ waa, ŋà à y'à fa Ŋaablà raa sàɔ tsɛ, e re watsi dzyee faramaà doùn dzɔ̀nxɔɔ̀ tsɛ. 3 Àwà dan, ye nìi fau Ŋaabla tɔ bɛy reè raa sàɔ doùn, tɔ boi fau. Tɔ̀ riì yɛ: seebɛybeè, kur'la goo ɲaan neè, dɔ̀ɔ̀kɔ̀ɔ̀nbeè, ɲwɛɛ̀n ɲɔn gereunmaà, mìɛn fa gereunmaà, ko ɲɔ̀n rèè kɔ̀ɔ̀, tɔ̀ niì cɛn. 4 È jà ci ye na vwɛɛ twɛy seebɛy goo kaatsi rèè kpɛyn ye ka dɛ, tɔ jiɔ̀ è dzii tsɛ. Tɔ̀ tsuru, è ye tsoo bar'la. 5 Ŋà, Ŋaablà riì sɔn byɛɔ̀n è jaama reè ko fùn nèè sa kitsi, è nà nà kùn dei fa tɔ̀ ra. 6 È ɲɛn tɔ̀ tsɛ, Kùnàgoo Dziɔ̀ bèu dè fùn nèè sa ra, gè riì ni à to è kitsiumaà shɔ̀ùn gɔɔ̀n ɲàn adamadzin dzyee reè tsuru, yè jaamabee fa Ŋaablà re Dzia baraka rɔ̀n.Piyɛrì nìi dèu kɔ̀ìge rèè faagoò fau'n kur'la tsɛ
7 Goò sapɛ do watsi tsyɛnbeò. Tà doùn, ye akir'là tsùù soo tsɛ, ye e taa to e yɛr'le, ye bà ni dzi màfyɛɛ̀n fa. 8 Goò sapɛ jɔɔn, ye e si kɛ̀n cɛ̀yn. È ɲɛn à tsɛ, kɛ̀nbààbee saabu ɲan, gooɲaantsii gir'lì mɛɛ̀. 9 Ye e si ladɔn, ŋùnùnŋunun mà jà à ɲan waa. 10 E sa kɔ̀ìge rìi tàraɔ̀ Ŋaablà re, y'a ka faagoò fa e si re. Tà tsuru, Ŋaablà re kɔ̀ìgeè kaatsi gir'là, e naà bà tɔ̀ goojaabobaa wùu ì. 11 Mòò riì waajibia faa, tɔ̀ y'a fa è kòrò Ŋaablà re goomaa ka. Mòò riì faagoò faa dzyee rèè rè, tɔ̀ y'a fa è kòrò Ŋaablà re fààn siunma ka à ra. Tɔ̀ tsuru goò sapɛ doùn, nɔɔrɔ yè bà ni ɲɛn Ŋaablà tsɛ Yesù Kirisà baraka ɲan, nɔɔrɔɔ̀ ko dzibaabee tɔ̀ niì raa, watsi sen ɲɛn watsi tsɛ. Àmiinà !
Piyɛrì ci e byɛn Kirisà kamà, tɔ taamadzibe
12 N ne kɛ̀niunma reè, dzuunboi xɔù rìi ni ye tsɛ dòònun, a ci ye ni sà rìì ɲàn, tɔ mà ji e dzii tsɛ è bà jàci à ye tor'na goo waa. 13 Ŋà ye yè e nin jà nìi faɔ̀ Kirisà rè byɛnbee ɲàn, ye e taama rìì dzibe. Ye tɔ̀ fa, gè riì ni à to à nɔɔrɔɔ̀ nà e kpadè sii riì seè, tɔ̀ sa ye bà e re taamadzibe brìsi. 14 Yè ba ye ɲɛ̀ɛn Kirisà tsoò kamà, ye raà wùbeu. È ɲɛn à tsɛ, nìi nɔɔrɔɔ̀ Dzia, Ŋaablà re Dzia, tɔ ni ye tsɛ. 15 E sɔn mà byɛn ni ci e vuifabaa, tàmafa shɔn, tàmafa gooɲaanfabaa, tàmafa ci e ye e dzii jiɔ̀ mòò rèè goo ɲan waa. 16 Ŋà à tsìfa ye ba byɛɛn rìì ci à ɲɛynamoo, tɔ mà bà à seè goo waa. È nɔɔrɔ rìì ɲɛn Ŋaablà tsɛ, tɔ̀ tsoò kamà. 17 Àwà kitsia dziikun bwèy wɔu, à to jɔ̀ɔn Ŋaablà re gbà dòùn dzin neè rìì tsɛ. À to ye ba jɔ̀ɔn ɲe rìì tsɛ, nìì reè na e tsiiŋnà yè ɲɛn Ŋaablà re Kùnàgoo Dziɔ̀ goomaa nà, twɛy raà nà e latan dzùrù ? 18 A ci à sɛbɛɔ̀n Ŋaablà re Goomaa doùn nìi tsuru ci «Mòdzin tereonmaà tsi ye ɲanbe, mòò riì na shia Ŋaablà jɔɔn waa ko gooɲaanfabaà, twɛy raà nà kun dzùrù ?» 19 Tà tsuru, nìì reè byɛɛn è kòrò Ŋaablà saɔ ka, twɛy yè e kɛɛ̀yfa Ɲɛnbaà mà, tɔ̀ niì vuusootsi, yè geren goowuu faa rè.