Piyɛrì ci ɲɛynamoo bɔɔ rèè yè nìi fa
5
1 Àwà bɔɔ nìì reè ni ye fi, min vu boò twɛy rìì là dòònun, min màxɔ̀n. Mun sa yeè è tsuru bɔɔ, nìi Kirisà rè byɛnbe goo reè shɛɛrɛ. Nɔɔrɔ nìi nà nà e kpadè, mun sa nin ni tɔ̀ ɲan. 2 Ŋaablà re sààkur'lìi kɛ̀ɛ̀yfaɔ̀ e ma, ye tɔ̀ kɔ̀ ɲwɛyn, y'a kààwɔ. E maà à fa a ci à yè e ma fààn waa, ŋà y'a fa rii ci à dzi ye ra, a ci Ŋaablà ci è fa nìi tsuru. E maà à bà tɔ̀nɔ̀n gàà shi namara ni nìi ɲàn waa, ŋà y'a bà e dusùkùn nà goo. 3 Twɛy nìì reè kɛ̀ɛ̀yfaɔ̀ ye mà, e maà e faan ɲinan è tsɛ waa, ŋà ye bà sààkur'là jaakpadebaa ì rìì. 4 Tà tsuru, sàà kplàtsuu reè kùntsiɛ ye na sii rìi sèè, ye nà màsà baanfla nɔɔrɔmaa tarà, nìi na bar'la waa.Piyɛrì ci ɲɛynamoo dzunwɛyn neè yè nìi fa ko làtsii kpɛrɛkuru ì
5 Tɔ̀ soo tsuru, ye dzunwɛyn neè sa yeè e majàà bɔɔ rèè rè. E re goo rèè doùn e ko e si fi, e sapɛ yeè e majàà e si re, è ɲɛn à tsɛ à deò Ŋaablà re Goomaa doùn ci: «Nìì reè blà e yɛr'le, Ŋaablà kaa faa twɛy ka, è bà e ɲanwùɔ kpàdèe mòdzin majàaŋma rèè rà.» 6 Tà doùn, ye majàà Ŋaablà si barakamaa dzuun, gè riì ni à to à yè e ɲansen e watsi ɲan. 7 Ye e vyɛɛ̀yràgoo sapɛ to à suun, kàtsu wò rii tsìiŋnà ye re goo sapɛ ka.
8 Ye e akiri to e yɛr'le, e maà cìi waa. È ɲɛn à tsɛ, ye ɲan Sànwɔbaà yè e gurugur'la a ci jɛ̀r'liì gɛɛy boò, è bà mòò kunàma gaa à y'à tàà. 9 Ye dzun wɔ à ra, e san gbaunma yè to ɲɛynaà doùn. Ye b'a tɔ̀ ci byɛnbe riì ni ye tsɛ, tɔ̀ soo rìì ni ye neema dzyee reè sa tsɛ dziɲantsiɛ doùn. 10 Àwà ye byɛunmaà shɔ̀ùn watsi dɛɛnin doùn, Ŋaablà riì wùɔ sapɛ Tsifaà è bà ye kiriu Yesù Kirisà ɲàn e nɔɔrɔ dòbɛɛ doùn, tɔ nà ye màbyɛ̀n, è ye sàn gban, è fààn wɔ ye ɲan, à y'à fa gèsɔn pɛn na dzia ye yuuyuu bo e shɔùn waa.
11 Arì she, dzibaabee yè bà a raa, watsi sen watsi tsɛ ! Àmiinà !
Piyɛr'lè goomaa lataan, ko tswɛ̀ɛ ko dzwɛɛ̀
12 Àwà Silivɛ̀n, mun tɔ̀ nìi jàtsikuàn mùn neema è bà vusootsi, mun nèe dzii jaa fii sɛbɛn nee fau tɔ̀ rii ka, min bà ni ye màxɔ̀n, tà ko m'a dè ye ra, ci ye yè shiɔ̀ nìi rà, tɔ̀ rii Ŋaablà ɲanwùɔ takia. 13 Ŋaabla nìì reè boo e jaa ra a ci ye, yè bà ni Babilɔnìn, twɛy ye tswàa, mun dzin kpiri Marikì sa yeè bà ye tswàa. 14 Ye e si tswà kɛ̀nbààbè tswɛy doùn. E ge o ge ni Kirisà ɲàn, arì she jaancin yè bà ni e sapɛ tsɛ !