Jacques 5

Nàfor'la raa goò

1 Àyìwà ye gètsi rèè, dòònun, ye e toro wɔ n ne ! Gooɲaan niì nàa ye mà, ye gɛyn, ye màtsùrù vu bo tɔ̀ ra.

2 Ye re nàfor'la bàu gè fyeeŋma, daa rèè yè bà ye re vya rèè ɲɔun.

3 Kpɛ̀ɛkpɛɛ̀ ye re sɛn'na ko ɲɛɛn sa kuun. Tɔ̀ kpɛ̀ɛkpɛɛ̀ shɛɛrɛbe ye kamà, nìi y'à kpàdèe ci à nà ye sa ɲɔn tɔ̀ tsuru a ci sà. Ye nàforo ladzyèè tsùuŋ watsi latan nee ɲan e re.

4 Faagoofadzin niì reè ye re dzù rèè shìmaan gaaŋ, ye na twɛy sàr'là sìn è ra waa. Tɔ̀ sàr'là gɛyn boò ye kamà, shìmaan gaabaa rèè raa màànkàn vuà sa to jiu Jìrànxɔɔ̀ ko dzɔ̀nxɔɔ̀ sa Tsìfaà toro doùn.

5 Ye yè e re jaamabee fau dzɔ̀nxɔɔ̀ tsɛ, dziɔ̀ ko tswɛɛ tsɛ. Ye ceyn wɔu e yɛrɛ ɲan a ci dzwɛka ì, vuɛ jisee kamà.

6 Ye kitsi mɛrɔn mòdzin tereonmaà tsɛ y'a vu, à na dzi ye sɔ̀swɛy tsu waa.

Mɔ̀nɲɔɔn ko màfyɛɛ̀n

7 Tà doùn, n neema ì, ye mɔnɲɔn, fɔ Tsìfa Yesù sèè na jisee yè bè wɔ. Fɛɛfabaà siin nèe, è mɔnɲɔɔn dzɔ̀nxɔɔ̀ fɛɛ fa ge wùù reè màshua doùn, fɔ ŋaa jɔnaa, ko à lataan yè bè nà, è kòmànà shìmaan gaa.

8 Tɔ̀ soo tsuru, e sa yeè e mɔnɲɔn, ye san gban, kàtsu Tsìfaà nà watsi tsyɛnbeò nòn.

9 Ŋùnùnŋunun mà jà e ko e si fi waa, n neema ì. Tɔ mà fa, tɔ̀ yeè nà bà e kitsi saabu waa. Kitsikununbaà yɛ, à tsìiŋnà gbà dziɛ rà nòn.

10 Àwà, kɛɛra niì reè goomau Tsìfaà tsoo ra, ye taa to twɛy rè, n neema ì. È byɛun yè e mɔɲɔn nìi tsuru, e sa y'a fa tɔ̀ tsuru.

11 Àwà, nìì reè yè e mɔɲɔun, yè byɛnbee tsi e ma, mùn ci twɛy raa wùbeu. Yɔbù yè e mɔɲɔun nìi tsuru è byɛnbee tsi e ma, ye tɔ̀ goomaa myɛ̀un. Tsìfaà nàu nìi fa à re à latanma nɔ̀n, ye tɔ̀ sa tɔ. Tɔ fau, kàtsu wùù ni Tsìfaà ɲàn fɔ è bè geren, è bà màtsur'la.

12 N neema ì, n kpɛyn nìi dèe e ra, tɔ̀ rii yɛ, ci e maà e kɛɛ̀y waa. E maà e kɛɛ̀y Ŋaablaxɔɔ̀ rà, e maà e kɛɛ̀y dzɔ̀nxɔɔ̀ rà, e to mà e kɛɛ̀y kɛ̀rɔ̀n'n kuru pɛn na. E ye dzin ɔ̀ɔn, y'a to è bà ɔ̀ɔn. E to ye dzin ɔ̀ɔɔn, y'a to è bà ɔ̀ɔɔn. Ye tɔ̀ fa, sànko kitsia mà nà mɛɛy e tsɛ waa.

13 Mòo ni ye ɲan nìi byɛunà ɔ̀ ? À tsìfa yè Ŋaablà mafyɛ̀n. Mòo to ni nìi taama dziɔ ɔ ? À tsìfa yè Ŋaabla makiri ye ì cèè.

14 Mòo ni nìi na cɛrɛma ɔ ? À tsìfa yè Yesù rè kàràndzìn kur'là bɔɔ rèè kiri, yè Ŋaablà mafyɛ̀n à re, yè ɲinin ka à sààru Tsìfaà tsoo ra.

15 Àwà tɔ̀ màfyɛɛ̀n faumaà ko ɲɛynaà ka, tɔ nà ɲìnìnkɔɔn cɛrɛmabe, Tsìfaà y'à sèè fù. È ba na gooɲaan ì faɔ̀, tɔ̀ gooɲaantsiɛ sa nà mɛɛy bo à vu ra.

16 Tà doùn, ye e tsiì e re gooɲaan fauma rèè rà, y'a dè e si ra, ye Ŋaablà mafyɛ̀n e si kɔ̀, sànko ye cɛrɛmabe. Fàan ni mòdzin tereonmaà rè màfyɛɛ̀n ɲàn, fɔ è bè geren.

17 Àwà, Ŋaablà re kɛɛra Aliì sa na ɲe tsuru mòdzin ni. À màfyɛɛ̀n fau cɛyn, ci ŋaa mà nà waa. Ŋaa to na na waa, è bè tàrà fɔ jii zhiigi, ko kuu tsùnmɛn.

18 È sèè, è màfyɛɛ̀n fa kɔn, ci ŋaà yè nà. Ŋaà to yè nà tɔ̀un, dzɔ̀nxɔɔ̀ gè rèè yè dzin.

19 N neema ì, mòò ye firì e ɲan è dan gbànbe sààbeen shia rà, sɔn yeè sèè na à ka sààbeen shia tsɛ.

20 Ye bà à tɔ̀, ci mòò riì gooɲaanfabaa soo seè boò e re fìr'là shia tsɛ, tɔ̀ tsìfa tɔ̀ tsiu saàn rà, è gooɲaan giri sa dzii tsyee.