Mìn goo jaawuen fa e re jaamabee doùn
13
1 Àwà, e re neemabee doùn, y'a to kɛ̀nbààbee yè bà ni e ko e si fi kudɛyn.
2 Tɔnɔn ye na jàà e re, y'a kuun'n kuru wuu fa. E maà e taa myɛn jà tɔ̀ re waa, kàtsu, mɛ̀rɛ̀kɛ ì jàà jàu swey rè, yè è kuun'n kuru wube, è na à tɔ̀, ci à mɛ̀rɛ̀kɛ ì waa.
3 Ye e taa to kàsòdzin neè rè, a ci ye sa yeè è sɔn ni. Nìì reè to kuun'n kuru ɲaan faɔ̀, ye e taa to twɛy sa re, kàtsu, tɔ̀ gɔn soo rìì ni ye sa re, à dzia nìi sa tarà.
4 Mòdzian sapɛ yeè blà wɔ fur'la ɲàn. Kpir'la ko taàn pɛn na wù yè ɲànmɔ̀ɔ̀be fa waa, kàtsu, Ŋaabla nà kitsia kunun kɛ̀kɛ̀ɛ̀ra reè ko ɲànmɔ̀ɔ̀bè fa reè tsɛ.
5 E maà ɲɛɛn kɛ̀n, fɔ tɔ̀ yeè bè bà e re jaamabee kùngɔ waa. Nìi ni e suun, y'a to tɔ̀ yeè e jaa cɛn, kàtsu, Ŋaablà yɛr'la dziun ci: «Mun fa n si bo jà wo dzuun kuraa. Fyeu, n fa n bon wɔ jà wo ra waa.»
6 Tà doùn, ɲe akiri tsùuŋma dzia à dè nèe tsuru ci:
«Mun Dzwɛ̀mabaà rìì Tsìfa Ŋaablà,
mun fa shi gèsɔn pɛn jɔɔn waa.
Adamà dzin mòdzin nà dzi fee rìì fa mun na.»
Ye e toro wɔ e jɔɔndzin neè rè
7 E jɔɔndzin bɔrɔɔ niì reè yè è toro kɔ̀ dɔ̀un Ŋaablà re goomaa nà, ye e taa to twɛy rè. È re jaamabee lataun nìi tsuru, ye tɔ̀ siin, e sa yeè ɲɛn Ŋaablà ra è raà tsuru.
8 Ŋaablà Jaara Moo Yesù na ni nìi tsuru kuru, à ni tɔ̀ rii tsuru she, à to nà to tsùù tɔ̀ rii tsuru kudɛyn.
9 E maà à to mòò pɛn yè e san fìrì ko kàràn kpɛrɛ ì ka, e na nìi tɔ̀ waa. Àwà, à wùɔ rìì yɛ, Ŋaablà ɲanwùɔ yè fààn wɔ mùn ɲan, sani ɲwɛyn goo shi yeè tɔ̀ fa. Nìì reè gbaɔn ɲwɛyn goo shià raa goo rèè kpɛyn, tɔ̀ na gèsɔn pɛn wùbee twɛy mà waa.
10 Saaka goojaabobaa nìì reè faagoò faa Ŋaablà re bùù gba vyamaa doùn, saakaboma ni ɲe re, nìi ɲwɛɛ̀n na dàaŋnà twɛy mà waa.
11 Àwà, dzwɛkà nìì reè vua, yè bà saaka, gooɲaantsiɛ mɛɛ̀ raa, saaka jɔɔndzin blaa dɔ̀ɔn twɛy tsìɛn ka bùù gba vyamaa gàne fɛnɛ fɛnɛɛ doùn. Shuà, tɔ̀ yeè bè dzu kpaan da rɔ̀n, bùɔ̀ bònè.
12 Tɔ̀ kamà, Yesù sa yeè bè byɛn è san wɔ̀ɔ̀ bònè, sànko, à yɛ̀r'la tsìɛ̀n baraka rɔ̀n mòdzian yè fɛnɛbe.
13 Tà doùn, mùn sa yeè bo b'a ra mɔn wɔ̀ɔ̀ bònè, seey rìi y'à tàrau, tɔ̀ yeè mùn sa tarà.
14 Mìin dzɔ̀xɔɔ̀ tsɛ, wɔ̀ na ni ɲe re, nìi nà bà ni tsuù kudɛyn waa. Ɲe wɔ̀ nìi gaa, tɔ̀ rii yɛ, gbee raa wɔ̀ nàkɔɔn.
15 Yesù baraka rɔ̀n, mùn yeè tsoo dzi ɲɛɛn Ŋaablà tsɛ kudɛyn, tɔ̀ yeè bà mùn ne saaka bokɔɔn à re. Tɔ̀ dzuɔn, Ŋaablà tsoo yè bà ni mùn dzu watsi sapɛ.
16 E maà e taa myɛn goowuu faa rè waa, ye bà e si dzwɛ̀maa, kàtsu, tɔ̀ tsuru saaka rèè rìì dzi Ŋaablà ra.
17 Ye e toro wɔ e jɔɔndzin neè rè, ye e ma jàà è re, kàtsu, ye rìì ye kààwɔɔ̀ kudɛyn. È taa n'a mà, ci sii sɔn see, ye nà e re faagoò kpunan bo Ŋaablà re. Ye ye tɔ̀ fa, tɔ̀ rii nà à to, yè e re faagoò fa taamadzibe ka, à fa bà taamaŋununbe ka waa. Tà boshɔ̀ùn, è fa taamaŋununbe ka, ye re mɛɛy rìì ni tɔ̀ ɲan.
Tswɛ̀ɛ
18 Ye Ŋaablà mafyɛ̀ɛn mùn ne, kàtsu, ɲe ɲɛɔ̀n à ra, ci ɲe na jàaŋnà e yɛr'la kàjaa pɛn tsɛ waa. Ɲe kpɛ̀yn nìi gaa, tɔ̀ rii yɛ, goo o goo, ɲe jìì saàn yè bà tereòn.
19 M'a gaa sa, ye Ŋaablà mafyɛ̀n n ne, sànko, min bà ni n kpɛyn tabe seè e re.
20 Ŋaablà, tɔ̀ niì jaanciàn sìnbaà, tɔ mùn Tsìfa Yesù kpunan bou saàn ɲàn, è bo fùn nèè fi. À y'à bàu e re sàà rèè kplatsuubaa blà, à tsìɛn kounmaà baraka rɔ̀n, è bà saaka tɔ̀ niì dzyèèsìbe dobɛy dɔun Ŋaablà ko mòdzin neè fi.
21 Ŋaa yè fààn sin mùn na, mìn dzi wùɔ fa, fau'n kur'la sapɛ ra, m'a sàɔ bo e shi tsɛ. Arì she, nìi dzi Ŋaablà ra, à yè tɔ̀ fa mùn ɲan e Jaara Moo Yesù baraka rɔ̀n, blàbee tɔ̀ niì raa, watsi sen ɲɛn watsi tsɛ. Ŋaa y'à bà tɔ̀ tsuru.
22 N neema ì, mun yɛ nèe gooma niì reè sɛbɛn kaɔ ye re, m'a ka ye màxɔ̀n, m'a gaa e re, ye e toro wɔ à re, y'a ku e ɲan. À to yɛ̀rɛ̀ na baɔ̀ gooma gbaan tsu waa.
23 Àyìwà, ye bà à tɔ̀, ci è mùn neema kpiri Tsìmotè bàjiu. À ye dzi mun tsɛ tabe, à ko mun nà bè ye kpà, mìn bè ye siin.