Hébreux 12

Mìn byɛnbee tsi e ma

1 Àyìwà, twɛy shɛɛrɛ kuru brisià sapɛ mùn laguruɔ̀. Tɔ̀ gàneè doùn, nìi ɲe sa, goo o goo mùn kààn seyn, mìn tɔ̀ sapɛ bo tsùù. Mìn gooɲaan dzii bà, tɔ̀ niì firika na ŋunun mùn ɲan waa. Vwɛ̀ɛ̀y nìi dzii kpàdeò mùn na, mìn e maxɔbe, mìn tɔ̀ vwɛ̀ɛ̀ fa, fɔ e da'ùn.

2 Àwà Yesù, mùn jaà gban tsùuŋma yè to tɔ̀ rii là, kàtsu mìn bà ɲɛɔ̀n Ŋaablà ra, wò rii tɔ̀ shia dzii saun, è bà à dziitsyɛnbaa. À yè e tsiiŋ, y'à gban gɔɔ̀ rà, y'à vu. Tɔ̀ yeè fa, tɔ̀ na ba à seè goo waa, kàtsu à taa na ni taamadzibe mà, Ŋaabla nìi lamɔnɔ̀n tsùuŋnà à re. Dòònun, à tsùuŋnà Ŋaablà sirama si jaa rè.

3 Ye e kɛsɛ Yesù rà. Mòò riì byɛun cɛyn gooɲaan fa reè suun, à to yè byɛnbe ree tsi e ma, tɔ wò rii. Tɔ̀ gàneè doùn, e maà e gɔn vu waa.

4 Ye ni sikun niì nà ko gooɲaan ka, ye na tɔ̀ sikuan fa, è bè suu fɔ saàn dzu ŋe waa.

5 Ŋaabla ye latsiu gooma niì ka, è tɔ̀ ka ye màxɔ̀n, a ci mòo dzin kpiri ì latsia nìi tsuru, ye taamyɛ̀un tɔ̀ re. À ci:

N dzin kpiri, Tsìfa Ŋaablà ye ba a kor'na,

maà tɔ̀ ɲanfyɛnbe waa.

À to ye ba e ɲinìn ma dèe a ra,

tɔ mà a gɔn vu waa,

6 kàtsu Tsìfa Ŋaabla mòò riì kɛ̀niɔ̀n, à tɔ̀ rii kor'na.

À nìì reè sapɛ tɔ e dzin, à si wɔɔ̀ twɛy rìì tsɛ.

7 Byɛnbe riì ni e tsɛ, y'a tsi e ma, kàtsu, à ye kor'na goo rìì. A y'a jà, ye kuàn tɔ̀ tsuru, Ŋaabla ye baɔ̀ e dzin nì. Dzin kɛ̀n ni ni, ci à fà naà kor'na ?

8 À ma ye sa koron, a ci è dzin kpiri dzyee reè sapɛ kor'na nìi tsuru, tɔ̀ y'a kpàdèe, ci ye na à yɛ̀r'là dzin ì waa, ŋà, ye dà dzin ì nì.

9 Mùn fà nìì reè ni dzɔ̀nxɔɔ̀ tsɛ, n ci twɛy mùn kor'na, mìn bà è blàbee ? Mìn ba tɔ̀ faa, mùn Fà nìi ni jìrànxɔ rɔ̀n, à wù mìn majàà tɔ̀ re kɔn, è geren. Tɔ̀ ye fa, mùn nà to xɛɛrɛ ra.

10 Mùn fà rèè, twɛy na mùn kor'na watsi dɛɛnin bàsɔùn doùn, a ci à dzi è ra nìi tsuru ɔ ? Ŋà Ŋaablà, a jà tɔ mùn kor'na, à sào ni mìn wùbe rii, mìn bà gè fɛnɛ, a ci à yɛ̀r'la sa fɛnɛɔ̀ nìi tsuru.

11 Àwà, yè ba mùn kor'na watsi riì bwèy, m'a jàa tɔ̀ watsia ɲàn, sani è bà taamadzibe, à bàa taamaŋununbe mùn ne. Ŋà, nìì reè kor'na tà tsuru, à lataan bàa saabu, yè teren e re jaamabee doùn, è nà jaancin ka è mà.

12 Tɔ̀ kamà, ye fààn wɔ e si rèè flàunmaà ɲàn, ye fààn wɔ kun'nèè tsɔkɔɔn sa ɲan.

13 Tà doùn, ye jìì shi tsɛ, nìì tereòn, sànko, sànsɔn nèè raa sàn nèè mà bo e si dzu waa, ŋà, yè cɛrɛmabe.

Mìn re jaamabee fau'n kuru wuu fa

14 Ye e maxɔbe, jaancin yè bà ni e ko mòdzian sapɛ fi. Ye e yɛrɛ fɛnɛbe, ye bà Ŋaablà raa. Tɔ̀ ma fa fyeu, mòò pɛn jaa fa ɲɛn Tsìfaà mà waa.

15 Ye e yɛrɛ kaàwɔ, mòò pɛn mà nà e dzii bo Ŋaablà ɲanwùɔ ɲàn waa. Mòò pɛn to mà jà e ɲan, nìi nà xe bo a ci gɔ̀ɔ̀ku bàà ɲaùn, è goo rèè gbiiman waa. Tà boshɔ̀ùn, à bàà nà mòò giri sa kun.

16 Ye e yɛrɛ kaàwɔ sa, mòò pɛn mà nà bà mòdzin kɛkɛ̀ɛ̀ra waa. Mòò pɛn to mà bà goo fɛnɛɛ noobaa, a ci Isawù waa, tɔ̀ niì yè e re dzin jɔna shɛɛn ɲancinaun, ɲwɛyn ɲɔn soo ka.

17 Y'a tɔ̀, ci tà shɔ̀ùn, Isawù sàò na n'a re, wò fàà yè dzwɛ ji wò ra, ŋà, à fàà na e tsiì waa. È bè wɔ, fɔ è gɛɛy, ŋà, tɔ̀ pɛn na à wùbe waa.

Dzyèèsìbe yee raa goo rèè yè e si bɔrɔɔ raà rà

18 Àwà, ye na e kpɛrɛ̀ gè rà, mòo dzia e dzyɛn niì rà, a ci Isirayɛli dzin neè na ni nìi tsuru Sinayirì jèèn rà waa. Tɔ̀ gàne rɔ̀n, sà na deèn, ŋaamunun tsia ni, tsitsiì brìsi ni, ŋaa fyɛn bla yeè bà boò.

19 Vuru fyɛ vuà na ni, gooma vu yè bà boò. Nìì reè tɔ̀ myɛ̀un, è shi ɲaanfaa suun, y'à gaa ci vu rèe mà gooma ye ka dɛ.

20 È tɔ̀ fau, kàtsu nìi na dèe, è na dzi tɔ̀ ku e ɲan waa. Vuà na dziàn ci: «Mòò o moò ye e dzyɛn jèèn rà, arì jòònshu rii, tɔ nà dzyɛn vu kpàa ì ka.»

21 È nìi jàu, tɔ̀ na shiɲaan goo brisi, fɔ è bè wɔ, Musà yè dzin ci: «Mun shiɔ̀, fɔ mun mà yè bà sɔ̀ɔn.»

22 Ŋà nìi ye, ye yè e kpɛrɛu Siɲɔ̀n jèèn rà, ye yè e kpɛrɛ̀ Ŋaablà jaamaa rè wɔ̀ɔ̀ rà, tɔ̀ riì jìrànxɔ rɔ̀n Yerusalɛmùn, mɛ̀rɛ̀kɛ rèè gbaayirika yeè e si ladzyeeŋnà min niì jaaravi ra.

23 Ŋaablà dzin kpiri jɔna niì reè tsoò sɛbɛɔ̀n jìrànxɔɔ̀ doùn ye yè e kpɛrɛu twɛy ladzyeeŋmaà kur'la rà. Ŋaablà riì mòdzian sapɛ dzyeèma kitsibaa, ye yè e kpɛrɛ̀ tɔ̀ ra. Mòdzin tereunma nìì reè nàu bà mòdzin dziitsyɛunma, ye yè e kpɛrɛu twɛy rà.

24 Ye yè e kpɛrɛu Yesù rà, tɔ̀ riì mùn ko Ŋaablà fia lamɔnɔun, è dzyèèsìbe yeu dɔn mùn fi. Ye yè e kpɛrɛ̀ à tsìɛn nà, tɔ̀ riì koun, è bà vùn Abɛlì raà mà.

25 Tà doùn, ye e yɛrɛ kun, mòò riì goomaa ye ka, e maà e nɔn tɔ̀ re goomaa lamyɛɛ̀n mà waa. Dan dan, mòò riì yè e sarau mòdzian nà Ŋaablà re goomaa ka dzɔ̀nxɔɔ̀ tsɛ, è na e tsiì yè e toro wɔ tɔ̀ re waa. Tɔ̀un, è na e tsi byɛnbee rà waa. Tɔ̀ ye ba twɛy tàrau, nìi goomaa ɲe ka è bo fɔ jìrànxɔɔ̀ doùn doun mɔn, ɲe ye e bon wɔ tɔ̀ raa goomaa nà, ɲe nà dzi tsi dzùrù ?

26 Mòò riì vuà y'à tou dzɔ̀nxɔɔ̀ yè yuuyuu dan, tɔ nèe gooma ree dè kpàdèu dòònun ci: «Mun nà dzɔ̀nxɔɔ̀ yuuyuu nèe shɔ̀ùn jaa soo kɔn. Ŋà, à fa dàn dzɔ̀nxɔɔ̀ dànmaùn mà dɛ, ŋaablaxɔɔ̀ sa nà bà à tɛ̀y.»

27 À dè niì fau, ci "Nèe shɔ̀ùn jaa soo kɔn", tɔ̀ y'a kpàdèe ci, gè o ge ɲɛun, twɛy sapɛ nà yuuyuu yè fìrì bo mɔn. Nìì reè fa dzi yuuyuu bo e shɔùn waa, twɛy yè to.

28 Tà doùn, mìn tswɛ̀y fa Ŋaablà re, kàtsu, à ɲe dɔɔ̀n màsàbè gane ɲan, nìi na yuuyuu bo jàa e shɔùn waa. Àwà, mìn Ŋaablà blabe blàbèù'n kur'la, nìi dzi à ra, mìn majàà à re, mìn bà shia à jɔɔn.

29 Mìn tɔ̀ fa, kàtsu, ɲe re Ŋaabla ni a ci sà, nìi mòdziìn dzu kpaan boò mɔn.