Hébreux 11

Mòdzin niì reè dzibeu Ŋaablà ra, è ɲɛumaa kamà à ra

1 Àwà, a y'a myɛ̀n ɲɛyna, tɔ goo, wo si xɔ nìi tsɛ, ci à nà bo e shi tsɛ. Wo y'à jàa sààbèn goo, a to na jaà jaadzin na waa.

2 Nìi reè ɲɛun Ŋaablà ra dan, a y'a jà twɛy yè dzibe à ra, à tɔ̀ rii kamà.

3 Mùn ɲɛɔ̀n Ŋaablà ra nìi fa, tɔ̀ rii y'à tou m'a tɔ̀, ci goomaa nì baraka ɲan, Ŋaabla dziɲan ɲɛun. Tà tsuru, mùn jaa ni gè o ge rà dziɲan doùn, Ŋaabla twɛy sapɛ ɲɛun, è bo ge ɲàn, jaadzin na nìi jàa waa.

4 Abɛlì ɲɛunmaà kamà Ŋaablà ra, à saaka bou nìi vùn Kàyinìn naà mà. Tɔ̀ baraka rɔ̀n, Ŋaablà yeè e tsiiŋ à re blàbee rà, nìi y'à re saakaà, è kpàdè ci à tereòn. Abɛlì kpɛ̀yn saun, ŋà, à ɲɛunmaà kamà Ŋaablà ra, tɔ̀ baraka rɔ̀n, à goomaa arì she ŋe.

5 Nìi Enɔkì, tɔ̀ ɲɛunmaà kamà Ŋaablà ra, Ŋaablà y'a jaama sen teyn bèu e re, à na saàn jà waa. Mòò pɛn na à jà tà shɔ̀ùn dɛ, kàtsu Ŋaablà y'a sen beu e re. A deò Ŋaablà re Goomaa doùn, ci sani Ŋaablà y'a sen be e re, à goo na dzi à ra.

6 Mòò riì na ɲɛɔ̀n Ŋaablà ra fyeu, tɔ̀ goo na dzia dzibe à ra waa. Àwà, mòò riì yè e kpɛr'la Ŋaablà ra fɔ è ɲɛn à ra, ci Ŋaablà ni, à to nà e gaabaa rèè sàrà.

7 Nuùn ɲɛunmaà kamà Ŋaablà ra, Ŋaabla goo nìì reè dèu à ra, ci è nà fa, twɛy jà bɛ̀ybeè ko e raà sa, Nuùn e si kuun Ŋaablà re goomaa nà. È konkoron bla gbaan lamɔ̀nɔ̀n, sànko à ko e re mòdzìnbee yè tsi. Tà tsuru, à kitsi mɛrɔn e raa watsia mòdzian tsɛ. À to ɲɛn niì fau Ŋaablà ra, Ŋaablà y'a kpàdèu mòdzin tereonma tɔ̀ kamà.

8 Nìi Ibraximà, tɔ̀ sa ɲɛunmaà kamà Ŋaablà ra, Ŋaablà y'a kiriu è nìi dè à ra, à tɔ̀ shi jiiŋ. Ŋaabla dziun à ra, ci è bo e fatsiɛ doùn, è bè jàmàan ɲan, wo nà nìi sìn à ra, è bà à raa. Ibraximà to yè dɔ̀n be, tɔ̀ y'a tàrà, à bèe min niì, à na tɔ̀ tɔ̀ waa.

9 À ɲɛunmaà doùn Ŋaablà ra, Ŋaablà na tɔ̀ jàmàan nìi làyiri seòn à re, è bè e tsuù mɔn tɔnɔn. À na e tsuuŋnà bùù gba vyama ì doùn mɔn. Tɔ̀ làyiri soo seunmaà Ishakà ko Yàkubà sa re, twɛy sa na e tsuuŋnà bùù gba vyama ì rìì doùn.

10 Ibraximà tɔ̀ fau, kàtsu, à taa na ni wɔ̀ mà, Ŋaablà yɛr'la nìi jiɔ̀ e raa jiu'n kur'la, à dzunbamaà, bara na ni tɔ̀ mà waa.

11 Nìi Saràn, tɔ̀ sa ɲɛunmaà kamà Ŋaablà ra, à ko e re dzin kere bɛybeè sa, à dziu don sen, è dzin kere, tɔ̀ to y'à tàrà, à sìà na gereon dzin kere ma. Àwà, Saràn na à tɔ̀, mòò riì layir'lèe seòn, tɔ̀ yeè bà Ŋaablà, tɔ vusootsi.

12 Tɔ̀ rii kamà, mòò sɔn dzin soo, nìi Ibraximà, tɔ̀ sìà bɔrɔumaà ko e raà sa, tsu bou à ɲan, nìi buuŋ a ci jìran nɔ̀n swɛyn nèè, è buu a ci kòòyù dziɛ rà cɛncɛndzian, mòò fa dzi è dan tsu.

13 Àwà, Ŋaablà na nìi làyiri seòn twɛy mòdzin neè sapɛ re, è ɲɛunma tou Ŋaablà ra è bè suu fɔ è saàn dzu, è na tɔ̀ tàrà waa. È kpɛ̀ynto y'à goò jàu jeenà, y'à taamadzibe fa. Yè e tsiiŋ à ra, ci ye tɔnɔn nauma ì nì dzɔ̀xɔɔ̀ tsɛ, yè to bèbaa ì rìì.

14 Nìì reè tɔ̀ dèe, y'à kpàdè fyɛɛ̀ tɔ̀ ka, ci ye e fatsii rii gaa.

15 È bou min niì, è akiri ye ba na ni tɔ̀ gàneè tsɛ ŋe, à ni ba nìi tsuru, yè e kpɛyn sèè mɔn, è fa ni tɔ̀ shi tarà ɔ̀ ?

16 Ŋà, à na ba tɔ̀ tsuru waa. Fàtsii kuru na ni è ra, nìi ni nèe jɔɔn, tɔ̀ yeè bà jìrànxɔɔ̀ raà. Tɔ̀ kamà, à dzi Ŋaablà ra yè wò kiri e re Ŋaablà, è bà wɔ̀ lamɔ̀nɔ̀n tsùuŋnà è re.

17 Ibraximà ɲɛunmaà kamà Ŋaablà ra, Ŋaablà ci e y'a sɔ̀n mà siin watsi riì bwèy, ci è Ishakà sìn wò ra saaka, Ibraximà na e nɔn waa. À na e nɔn e dzin kpiri soo sìàn mà waa, tɔ̀ to y'à tàrà, Ŋaabla na làyiri seòn à re.

18 Ŋaablà na dziɔn à ra ci: «Wo tsua nà bo Ishakà rìì ɲàn.»

19 Ibraximà na à tɔ̀, ci à dzi ni Ŋaablà ra, è fùn sèè bà jaama. Tà doùn, Ŋaablà y'a dziàn jaama seeŋ à mà, nìi bàu tàànmàshɛn bla.

20 Ishakà, tɔ̀ sa ɲɛunmaà kamà Ŋaablà ra, à dzwɛ jiu Yàkubà ko Isawù rà, watsi na nàmaà kamà.

21 Yàkubà ɲɛunmaà kamà Ŋaablà ra, à ci e ye san watsi riì bwèy, è dzwɛ ji Yusufù dzin nèè soo soo sa ra. Tà doùn, à mɛ̀ɲɛunma yè e ɲinaun e re kɔ̀ɔ̀n tsɛ, è Ŋaablà blabe.

22 Yusufù ɲɛunmaà kamà Ŋaablà ra, sani è san, à taa na ni à mà ci Isirayɛli dzin neè nà nà bo Misiran jamaan doùn. Wò to ye na san, è wù yè wò xɔ rèè kun nìi tsuru, è tɔ̀ sa shi kpadè è ra.

23 Musà ker'là gè rèè ɲɛunmaà kamà Ŋaablà ra, Musà kereumaà shɔ̀ùn, y'à mɛnɛun è bè tàrà fɔ kuu zhììgi. È tɔ̀ fau, kàtsu, y'à jàu ci dziɛ̀n dziin wùù. Tɔ̀un, Misiran jamaan màsà kpir'là na sàrìya riì tsùuŋnà, è na shi tɔ̀ jɔɔn waa.

24 Àwà, Musà ɲɛunmaà kamà Ŋaablà ra, à nàu bɔɔ watsi riì bwèy, à na e tsiì y'à kiri Fàràwuna dzin taan dzin waa.

25 À sa yeè byɛn Ŋaablà re mòò rèè ka, à tɔ̀ seun, sani taamadzibe yè bà n'a tsɛ watsi dɛɛnin bàsɔùn doùn, è bà ni gooɲaan gè doùn.

26 Musà y'à jàu, ci e seey Ŋaablà Jaara Modzìàn rè seey doùn, tɔ̀ nàfaà blà è geren Misiran jamaan nàfor'la sapɛ dzyeèma tsɛ. Sàr'lìi nà tàrà bònè, à jaa na ni tsuù tɔ̀ rii là.

27 Musà ɲɛunmaà kamà Ŋaablà ra, à bou Misiran jamaan doùn, è dɔ̀n be, arì à na shi siin màsà kpir'là rè vununta brìsià jɔɔn waa. Mòò na Ŋaablà riì jàa waa, à tou e ŋɛnɛ̀ɲaan tsɛ, a ci à tɔ̀ jàa rìì.

28 À ɲɛunmaà kamà Ŋaablà ra, à Geren n tsɛɛ̀ sɛr'là fau. À dziun Isirayɛli dzin neè rà, ci yè tsìɛn sɛrɛ e re gbà rèè dzii rèè rà, sànko mɛ̀rɛ̀kɛ xɔnbobaà mà e dzyɛn è dzin kpirima jɔna kereuma rèè rà waa.

29 Isirayɛli dzin neè ɲɛunmaà kamà Ŋaablà ra, è kòòyù xee fuuŋ a ci dzɔ̀nxɔ gɔ̀rɔ̀. Ŋà, Misiranka reè, twɛy ci e ye fuu siin, yuà yè è ɲɔn.

30 Isirayɛli dzin neè ɲɛunmaà kamà Ŋaablà ra, è Jerikò wɔ̀ɔ̀ laguruu bwèy ɲɛ̀ɛ̀nun doùn. Tà shɔ̀un, wɔ̀ɔ̀ sin neè yè mɛɛy.

31 Ɲànmɔ̀ɔ̀taan Àràxabù ɲɛunmaà kamà Ŋaablà ra, nìì reè na e nɔɔ̀n Ŋaablà re, à na san twɛy ka waa. À na san è ka waa, kàtsu Isirayɛli dzin neè nìì reè ka bèu, ci yè bè kààwɛɛ̀ fa, à twɛy kuun'n kuru wubeu.

32 À sapɛ fa dzi de waa. Nìì Gedɔ̀n, ko Bàrakì, ko Samusɔ̀n, ko Zhɛfutè, ko Dawudà, ko Samuyɛlì, ko kɛɛra dzyee reè, min bà ni twɛy sapɛ gooma de m'a vyɛ̀ e da'ùn watsia fa boi fa waa.

33 Twɛy mòdzin neè sapɛ ɲɛunmaà kamà Ŋaablà ra, è dziu màsa ì rà, yè goo tereonma fa. Ŋaablà na làyiri nìì reè seòn è re, twɛy bou e shi tsɛ è re. È jɛ̀rɛ ì dzii rèè kpàrau.

34 Yè sàden brìsi ì dzi. È tsiu kaamunun gbàan nà, yè fààn tarà kpɛrɛ e ɲiniunmaà shɔ̀ùn. È bàu kaadzin ɲimaxɔu ì. Yè kaadzin tɔnɔn ì kaa, fɔ yè vwɛ̀ɛ̀y.

35 Tàan rèè swey rè mòdzin saunma ì sèè kpunaun è kɔ̀ jaama. Àwà, swey, twɛy byɛun, a ci è ni san, ŋà, è na e yɛrɛ tsimà gaa waa. È na nìi gaa, tɔ̀ rii yɛ, è sèè kpunaunmaà shɔ̀ùn, yè bo saàn ɲàn, yè goo tàrà, nìi fyan.

36 Swey kɔn, è twɛy ɲɛ̀un, yè è dɔrɔ sɛyn ka, yè jɔ̀rɔ̀kɔ ì wɔ è ra, yè è tsyee kàsoò doùn.

37 È swey dzyɛun kpàà ì ka, fɔ yè è vu, yè swey fi kunùn fii. Swey yè vu kaamunun ka. Swey yè tsyeere beè min niì sapɛ. È na sàà tsun neè ko ba tsun neè rìì jia e ma vya. Gbaa na ni è ra, è xɔn bìiŋnà, yè bà kuun'n kuru ɲaan faɔ̀.

38 È na e ɲantsyeere beè jènjàà kor'nà doùn, ko jèn nèè tsɛ, yè e ɲɛn beè kpankɔɔ reè ko kɔ̀ɔ̀ rèè rè. È na mòdzin wuu ì, ŋà dziɲan naà wù è ka waa.

39 Twɛy mòdzin neè sapɛ ɲɛunmaà kamà Ŋaablà ra, è goo dzibeu à ra. Tà ko e sa ra, Ŋaablà na nìi làyiri seòn, è na tɔ̀ tàrà waa.

40 Tɔ̀ y'a kpàdèe, ci Ŋaablà na goo kpɛrɛ ŋɛ̀nɛ̀ɲaɔ̀n mùn ka, nìi tsuru na ni waa. Tɔ̀ fa ni dzi bo e shi tsɛ twɛy bàsɔùn nè ɲe shɔ̀ùn waa.