Maà mòò fyanbe mòò mà waa
2
1 N neema ì, e ɲɛn niì faɔ̀ mùn Tsìfa Yesù Kirisà rà, blàbee Tsìfaà, tɔ̀ ɲɛynaà doùn, e maà mòò bo mòò ɲàn waa.
2 Àwà mòkun fii tsuru ye be dɔ̀n ye re waajibifagbaà doùn, sɛnu daaniin ni soo si ra, vya wùu ì yè bà ni à mà, soo gbakɔɔn, vya nooŋma ì yè bà ni à mà,
3 ye ye vyawuutsià siin, yeè dzin tɔ̀ ra ci: «Wo y'à tsuù nèe tsùùma wùù ree ɲan.» Gbakɔɔn, yeè dzin tɔ̀ ra ci: «Wo y'à tsiì a saàn, tàmafa a tsuù dzɔn nɔ̀n mìin n san dzuun.»
4 Tɔ̀ faumaà, ye to na è si fyanbe e si mà fyeu ɔ ? Ŋɛ̀nɛ̀ɲàn ɲaan niì ni ye ɲan, tɔ̀ na ye bà ɲànkɛ̀rɛ̀nfabaa ì fyeu ɔ ?
5 N neema ì, mun ye nìì reè kɛ̀niɔ̀n fɔ è bè geren, ye e toro wɔ. Dziɲan dzin neè nìì reè jàa gbakɔɔn, Ŋaabla twɛy ɲankɛrɛɔ̀n rìì, yè bà gètsi ɲɛynaà kàjaa tsɛ, tà ko è re màsàbe riì làyiri seòn e kɛnbaa rèè rè, yè tɔ̀ tàrà shɛn.
6 Ŋà nìi ye, ye gbakɔɔn reè cèù boò. Tsi ì rìì ye xɔn biɛ, yè bà bèe ye ka kitsikunun neè rè ? À na gètsi rèè ɔ̀ ?
7 Yesù tsoo wùù riì ɲɛɔ̀n ye tsɛ, ye rìì na tɔ̀ barabaa rèè gbɛ ?
8 E kpɛyn ye ba Ŋaablà re màsàbee shi kpadèuma rèè shi jiɛ a ci à sɛbɛɔn à re Goomaa doùn nìi tsuru ci: «A modzìnsia kɛ̀n jàci a yɛr'la», tɔ̀ fakɔɔn wù e re.
9 Ŋà, ye ye ba mòdzian fyanbee e si mà, ye gooɲaan faa tɔ̀ ka, shi kpadèuma rèè to kitsi mɛɛ̀ ye tsɛ, kàtsu ye na è shi jiɛ waa.
10 Àwà, mòò riì kɛ̀nsɛɛn ye ba shi kpadèuma rèè sapɛ shi jiɛ, à ye dzi so bara nòn, à y'à dzyeè sapɛ rii barau.
11 À dzyeè sapɛ barau, kàtsu, mòò riì dziun ci: «Maà ɲànmɔ̀ɔ̀be fa waa», tɔ̀ rii dziun kɔn ci: «Maà mòò vu waa.» Tà doùn wo to kɛ̀sɛɛn ma ɲànmɔ̀ɔ̀be fa, w'e mòò vu, wo to na shi kpadèuma rèè jìì dɛ ?
12 Tà doùn, shi kpadèuma nìì reè mòò labaà, e goomau'n kur'la ko e goo fau'n kur'la yè kòrò tɔ̀ ka, kàtsu ye nà kitsi ɲɛn tɔ̀ rii tsɛ.
13 Mòò riì ma matsuru dzyee rèè rà, Ŋaabla nà kitsia kùnùn tɔ̀ tsɛ, arì à fa màtsuru waa. Àwà màtsur'la rìì kitsia mɛɛ̀.
Faadziɛ wù è ɲɛynaà kpàdè
14 N neema ì, à fee wùbee mòò mà è dzin ci: «Ɲɛynaà ni mun ne», à to na à kpàdeò e faadziɛ ɲàn waa. Tɔ̀ ɲɛynaà ni dzi à tsi ɔ ?
15 Àwà neemaa reè swey yè bà ni, kpiri tàmafa tàan, vya wɔràma na ni è re, è ɲɔɔndziɛ tsu to na ni è re waa,
16 ye sɔn yeè dzin è ra ci: «Ŋaa yè bè e ko xɛɛrɛ tsi, ye vya wɔ, ye mùnkɛɛ̀ bo e ra. Ye ɲwɛyn ɲɔn, ye cɛn.» Wo tɔ̀ sapɛ deè, è màgoo to ni nìi rà, wo na tɔ̀ siɔ̀n è ra waa. Tɔ̀ dzwɛɛ̀ fee wùbee ?
17 Ɲɛynaà sa tɔ̀ rii tsuru. È ba à bàsɔùn, faadziɛ mà bà ni à ɲan, à saɔn rìì.
18 Àwà sɔn dzia dzin ci: «Ɲɛynaà ni wo re, faadziɛ yè bà ni mun ne.» Tà doùn, a re ɲɛynaà kpàdè n na, faadzii mà bà ni à ɲan waa, mun sa nà faadziɛ ka n naà kpàdè wo ra.
19 Wo ɲɛɔ̀n à ra ci Ŋaabla soo. Tɔ wù. Ŋà e ba tɔ̀ ci kwey rèè sa ɲɛɔ̀n tɔ̀ ra, fɔ è mà yè bà sɔ̀ɔn shiɲaanbeè rè.
20 Mòdzin akiri bɛy, wo na à tɔ̀ ci faadziɛ ma ba ni ɲɛynaà ɲàn ci à goo maana ɔ ?
21 Ɲe fàbɔɔ Ibraximà do ? À kpàdèu dzùr'li ci à tereòn ? À na à faadziɛ kamà ɔ̀n ? À na e dzin kpiri Ishakà ɲɛn saakabomaà tsɛ ci wo nà à bà saaka ɔ ?
22 W'a jàa kɛ̀, tɔ̀ raa ɲɛynaà ko à faadziɛ sa na ni faagoò rà esire. Faadziɛ rìì baraka ɲan, à re ɲɛynaà bàu goo dzii tsyɛunma.
23 Tà tsuru, Ŋaablà re Goomaa doùn gooma de dɔ̀unma sɔn yeè bo e shi tsɛ, nìi yɛ ci: «Ibraximà ɲɛun Ŋaablà ra, tɔ̀ kamà, Ŋaablà y'a dan mòdzin tereonma.» Tɔ̀un, è kiri Ŋaablà dzunwɛynsi.»
24 Y'a jàa dɛ, Ŋaablà y'a kpàdè ci mòdzian tereòn, tɔ ni faadziɛ sa suun, à na ɲɛynaà bàsɔùn waa.
25 Àwà, tɔ̀ fau'n kuru soo rà, ɲànmɔ̀ɔ̀taan Àràxabù raà sa bàu tɔ̀ rii tsuru. Tɔ̀ sa raa faadziɛ rìì y'à tou, Ŋaablà y'a kpàdè ci à tereòn. Tɔ fau, kàtsu à Isirayɛli dzin neè rè kɛɛra reè ladɔun e re gàne rɔ̀n, è bèkɔɔn, à y'à to yè bo shi kpɛr'le.
26 Tɔ̀ doùn, xɔn ma ba ni gɔɔ̀n ɲàn tɔ bàa saɔn nìi tsuru, faadzii ma ba ni ɲɛynaà ɲàn, tɔ̀ sa bàa saɔn tɔ̀ rii tsuru.