Nɛɛ̀n raa goò
3
1 N neema ì, mòò giri mà bà e ɲan kàrànfa waa. Tɔ̀ mà fa waa, kàtsu ɲe nìì reè kàr'nà sìan, ɲe raa kitsia nà xɔbe, è geren dzyee rèè raà tsɛ.
2 Mùn sapɛ fìr'la fau'n kuru gir'la. Mòò riì na fir'la goomaa kàjaa tsɛ fyeu, tɔ mòdzin dzii tsyɛunma, è bà dzia dzi e gɔɔ̀n ko e kur'la sapɛ ra.
3 Mùn kààfiri wɔɔ̀ shù rèè dzu, gè riì ni à to, yè mùn sàò fa. Tà tsuru, mùn dzia è gɔɔ̀n ko e kur'la lakere be kàjaa sapɛ tsɛ.
4 Ye e kɛsɛ konkoron bla bla reè sa ma siin. È ko e blabee sa, fyɛn bla yeè bà è tèn beè, gèrii rìì saabu ɲan, à vwɛ̀ɛ̀ybaà y'à jaa ji beè e jaa ra gane ɲan.
5 Tɔ̀ soo tsuru, nɛɛ̀n gɔɔ̀n gàne kiɲaanin nì, ŋà à goo bla bla ì dèe, è tɔ̀ ka e yɛrɛ blabe. Sàà siin nèe, à kiɲaanin nì tu brìsi dzua.
6 Nɛɛ̀n sa sà rìì. À tsyɛɔ̀n ɲaan nà. À ni mùn gɔɔ̀n gàne rèè fi, è bà mùn gɔɔ̀n ko e kur'la sapɛ noo. À mùn ne jaamabee sapɛ dzua ko sà ka, sà rìi boo jààndamaa yɛ̀r'la doùn.
7 Jòònshua kuan sapɛ, ko kɛ̀yn neè, ko gè nìì reè yè e ger'na e don tsɛ, ko yu'un ge reè kuan sapɛ, adamàdzin mòdzin yeè è kor'na, à to yè koroò.
8 Ŋà nɛɛ̀n, mòò pɛn na dzia tɔ̀ koron waa. À gè ɲaun tsìì bɛy rii, è bà tsyɛɔ̀n mòdzìn vua bàà rà.
9 Mùn wò rii ka tsoo dzi ɲɛɛn mùn Tsìfa Ŋaablà tsɛ, mùn Fàà. Mìn sèè kɔn m'a ka dzwɛ ɲaan jia mòdzian nà, Ŋaabla twɛy nìì reè ɲɛun e bosi.
10 Dzwɛ wùɔ, ko dzwɛ ɲaan sapɛ boò tɔ̀ dzii soo rìì doùn. N neema ì, à na wù è bà tà tsuru waa.
11 Yu dziù ko yu màaŋma sa dzia dzyèè bo yu shi soo rè ò ?
12 N neema ì, fiigiku ni dzi olivi dzin ì wɔ ɔ ? ɛrɛ̀nzhɛ̀nku to ni dzi fiigi dzin ì wɔ ɔ ? kòòyua tsu na dzia yu tsiin bo waa.
Akiriblabe rìi daɔn è bo Ŋaablà re
13 Tsì rii ni ye ɲan è b'a jàa ci wò akiri blà, è bà dzi ? À tsìfa yè e faadziɛ ka à kpàdè e fau'n kuru wuɔ saabu rɔ̀n. È vununmacin ka à kpàdè ci wò akiri blà.
14 Ŋà jaaɲininbe ɲaun, ko si sɔɔn nì ye ba ni e duùn, e maà e yɛrɛ blabe, ye doò ka sààbeen bara waa. Tɔ̀ na akiriblabe waa.
15 Tɔ̀ akiri tsuà na daɔn è bo jìrànxɔ rɔ̀n waa. À dzɔ̀nxɔɔ̀ tsɛ raà rìì, mòdzin neè raà, Sùtan'naà.
16 Jaaɲininbeè ko si sɔɔn ni min o min, goo gbiimaunma rèè, ko goo ɲaan kaatsia sapɛ bàa ni mɔn nì.
17 Ŋà akiriblabe rìi daɔn è bo jìrànxɔ rɔ̀n, tɔ ni mòò riì ɲàn, à tsìfa fɛnɛɔ̀, à na kaa faa, à vunun ma dzi, à mɔ̀nɲɔɔ̀n, à màtsur'la fɔ è bè geren, faadzii wuu ni à ɲan, à na ɲànkɛrɛn faa, à to na duungoofiitsi.
18 Nìì reè y'à gaa jaancin yè bà ni, twɛy faagoò faa jaanciàn ɲàn. È to nìi tàr'la à tɔ̀nɔ̀n, tɔ terenbee rìì.