Hébreux 8

Yesù saaka jɔɔndzin, nìi ko dzyee rèè na soo waa

1 Àyìwà, mùn yɛ nìi sapɛ deè nèe, tɔ̀ goò kùngɔɔ̀ rìì yɛ, ci tɔ̀ tsuru saaka jɔɔndzin ni ɲe re, nìi tsùuŋnà Ŋaablà re màsà gbaniɛn sirama si jaa rè, ŋaablaxɔɔ̀ doùn.

2 À ni e re saaka jɔɔndzinbee faagoò rà Ŋaablà re bùù gba vyamaa gàne fɛnɛɛ doùn. Tɔ̀ bùù gba vyama taki takìà, mòdzin ì na tɔ̀ gbaɔn waa, ŋà, Tsìfa Ŋaablà yɛr'la rìì y'à gbaɔn.

3 Saaka jɔɔndzian gè o ge, à tsùuŋnà nì, è bà kɔ̀ì faa gè rèè, ko saaka reè ladzia Ŋaablà tsɛ. Tà doùn Yesù, ɲe raa saaka jɔɔndzian, tɔ̀ sa wù, è bà ge ì ladzia Ŋaablà tsɛ.

4 È bà na ni dzɔ̀nxɔɔ̀ rìì tsɛ, à yɛ̀rɛ̀ fa bà saaka goojaabobaa tsu waa, kàtsu, saaka goojaabobaa ì ni nòn, yè bà kɔ̀ì faa gè rèè ladzia Ŋaablà tsɛ, a ci Musà rè Sàrìyaa y'à kpàdeò nìi tsuru.

5 Twɛy saaka goojaa bo reè faagoò faa bùù gba vyamaa gàne fɛnɛ riì doùn, tɔ jìran nɔ̀n naà bosi rìì, è bà à ɲɛyn. À ni a ci Ŋaablà y'a kpàdèu Musà rà nìi tsuru bùù gba vyamaa gban bwèy rɔ̀n. Ŋaabla dziun ci: «Musa, à fau'n kur'liì kpàdèu wo ra jèèn tsɛ, a maxɔbe, a fa tà tsuru.»

6 Dòònun, nìì Yesù, saaka goojaa bo niì wɔɔ tɔ̀ suun, tɔ ni saaka goojaa bo dzyee reè raà jɔɔn peu, kàtsu à sòròn fau, è dzyèèsìbè ye riì dɔ̀n Ŋaablà ko mòdzian fi, tɔ̀ dzyèèsìbee vùn jɔ̀naà mà peu. Tɔ gbaɔn layiri ì tsɛ, nìì reè tsuru na ni waa.

Dzyèèsìbè yee ni bɔrɔɔ jɔɔn

7 Àwà, Dzyèèsìbee jɔ̀naà yè bà na bàu dzyèèsìbe nìi dzii tsyɛɔ̀n, dzyèèsìbe kpɛrɛ yè gaa kɔn, tɔ̀ yeè ka à ɲancinan, tɔ̀ kùn naà ni dɛ.

8 Ŋà m'a jàa, ci Ŋaablà jàaŋ e re mòò rèè rà è re fìrìgoo rèè kàjaa tsɛ, nìi doùn à ci è ra ci:

«Àwà, Jisee ì nàa, mun Dzyèèsìbee Ŋaabla

mun nà Dzyèèsìbe yeu wɔ

ko Isirayɛli tɔɔn mòdzin neè ko Yudà tɔɔn mòdzin neè ka.

9 Mun ye è fàbɔɔ rèè kuun e si ra jisee riì, mun yè bo è ka Misiran jamaan doùn,

mun Dzyèèsìbe riì wɔu è ka, à fa bà tɔ̀ tsuru dzyèèsìbe waa.

È yɛ̀r'leè rìì tɔ̀ dzyèèsìbee barau.

Tɔ̀ kamà, mun Dzyèèsìbee Ŋaablà, mun sa yeè n magoo bo è ɲan.

10 Àwà, twɛy jisee reè shɔ̀ùn, mun nà Dzyèèsìbe riì wɔ ko Isirayɛlì mòdzin neè ka,

tɔ̀ rii siin:

Mun Dzyèèsìbee Ŋaablà,

mun nà n ne sàrìya reè ji è akir'là ɲàn,

mun y'à ɲììri è vunun tsɛ.

Mun nà bà è re Ŋaablà,

yè bà mun ne mòdzin ì.

11 Sɔn yeè bà ni e fadzìnsi tàmafa e neema karàn è ɲan kɔn, ci è mun tɔ̀,

tɔ gooma fa bà ni à ɲan dɛ,

kàtsu mòdzin kiɲaanin sen ɲɛn modzin bla tsɛ,

è sapɛ nà mun tɔ̀.

12 Mun nà è re fìrìgoo rèè mɛɛy bo è mà,

mun yè è vu ra gooɲaan tsii reè bo n akìr'là rà pe peu.»

13 Àwà, Ŋaabla tɔ̀ Dzyèèsìbee kiri nìi fau ci Dzyèèsìbè ye, à jɔ̀naà bàu bɔrɔɔ. Gèè to ye bɔɔ, à mà bà màgoo wubee dɛ, à bèe fìrìma nì.