Dzyèèsìbè bɔrɔɔ bùù gba vyamaa raa goo rèè
9
1 Àyìwà, Dzyèèsìbee bɔrɔɔ doùn, shi kpadèuma ì na ni, è bè Ŋaablà blabeu'n kur'la kàjaa tsɛ. Gàne sa yeè bà ni dzɔ̀nxɔɔ̀ tsɛ, è Ŋaablà blabee min niì
2 bùù gba vyama na gbaɔn, à doòn yè tara fii. Doùn jɔ̀naà na kir'là gàne fɛnɛɛ. Tɔ̀ gàne fɛnɛɛ doùn, fìtsìnà wɔmaà na ni, tàbàr'la ni, Ŋaablà kɔɔ bur'leè yè bà tsùuŋnà tɔ̀ tsɛ.
3 Doùn fiira riì na ni teèn shiɲaanfi kunun vyaa bònè kèrè, tɔ̀ na kir'là gàne fɛnɛ fɛnɛɛ.
4 Tɔ̀ gàne rɔ̀n, wushuna dzuma gè sɛnuma na ni, ko Dzyèèsìbee sùàn tɔ̀ màà sapɛ yeè bà ni sɛn'na ka. Tɔ̀ sùàn doùn, tsyɛn sɛnuma na ni, manuà yè bà ni tɔ̀ doùn. Arunà rè kɔ̀n nìi kaun, tɔ̀ na ni. Ŋaablà dzugooma xɔù tsyeùn nèè na ɲììriɔ̀ wàla kpààma niì reè tsɛ, twɛy sa yeè bà na ni à doùn.
5 Gè fii na lamɔnɔɔ̀n mɛ̀rɛ̀kɛ ì jaa ka, twɛy yè tsìì sùàn tsɛ yè bà à kpàdèe ci Ŋaabla ni mɔn. Nìi sùàn dziitsyeè, tɔ̀ niì kir'là Ŋaablà re yɛ̀rɛ̀tomaà, mɛ̀rɛ̀kɛ tsuru gè fii rèè tànma rèè na kuuŋna tɔ̀ kùùn. Ŋà, à na wɔɔ̀ twɛy goo rèè sapɛ yeè dè bo e si ra soo soo dòònun waa.
6 Àwà, bùù gba vyamaa ko e doùn gè rèè dzyèèmaa na ni tɔ̀ niu'n kur'la rà, saaka goojaa bo reè yè bà dɔ̀ɔn watsi sapɛ doùn jɔ̀naà doùn, yè e re faagoò faa.
7 Ŋà, nìi doùn fiiraa, saaka jɔɔndzian soo pe rii na dɔ̀ɔn mɔn, à to na tɔ̀ faa jiɛ doùn jaa soo pe rii. È ba na dɔ̀ɔn mɔn, fɔ è dɔ̀n saaka tsiin ka, è tɔ̀ sìn Ŋaablà ra, e yɛr'la raa fìrìgoo rèè kamà, ko mòdzian raa rèè kamà, è na e tsooŋna yè twɛy nìì reè fa waa.
8 Ŋaablà re Dzi Fɛnɛɛ y'à kpàdèe mùn na tɔ̀ tsuru, ci è bùù gba vyama jɔnaà raa goo rèè to sààn, nìi gàne fɛnɛ fɛnɛɛ doùn dɔ̀ɔ̀n, tɔ̀ shia dzii naà saɔn ŋe waa.
9 Àwà, twɛy goo rèè na dòònun naa watsia goo rèè rìì tàànmàshɛn. Tɔ̀ y'a kpàdèe, ci twɛy saaka nìì reè na boò, ko twɛy kɔ̀ì niì reè na faa Ŋaablà re, tɔ̀ naà dzia à to, tɔ̀ fabaà duɔ̀n yè fòò fyɛ waa.
10 Tɔ̀ na mòdzian raa làndà goo ì rìì, nìì reè ni ɲwɛyn goo tsɛ, ko mììnge rèè, ko fòò fau'n kuru giri, e bà ni fɛnɛbe. Twɛy làndà goo reè to tsùuŋ tɔ̀ tsuru sààn, fɔ watsi riì, Ŋaablà na nà goò sapɛ lakere ba yeu.
Yesù rìì saaka jɔɔndzian jìrànxɔɔ̀ doùn
11 Dòònun, Ŋaablà Jaara Modzìàn, tɔ nàu saaka jɔɔndzin, sànko Ŋaabla goo nìì reè làyiri seunà, mìn twɛy tàrà. À dɔ̀n bou bùù gba vyama doùn, nìi blà, à dzii yè bà tsyɛɔ̀n dzɔ̀nxɔɔ̀ tsɛ raà mà. Mòdzin ì na tɔ̀ bùù gba vyamaa gbaɔ̀n e si ka waa, tɔ̀ y'a kpàdèe, ci à na nèe dziɲan ree doùn naa waa.
12 À dɔ̀n jaa soo pe rii fau tɔ̀ bùù gba vyamaa gànè fɛnɛ fɛnɛɛ doùn, tɔ̀ yeè bà à dàn. À dɔ̀nkɔɔn, à na dɔn bàkɔrɔ ì tsììn ka è tɔ̀ sìn, à to na dɔn nìì tòr'la ì tsììn ka è tɔ̀ sìn. À dɔ̀un e yɛr'la tsìɛn nì ka è tɔ̀ sìn, è tɔ̀ ka mùn tsi bo e re gooɲaantsiɛ ɲàn watsia sapɛ doùn.
13 Àwà, bàkɔ̀r'lèè tsìɛn, ko nìì tor'la reè tsìɛn, ko nìì na dzuumaà shià, tɔ̀ na koòn mòdzin ì tsɛ, nìì reè nooŋnà, è bè làndà shià tsɛ. Tɔ̀ kounmaà è tsɛ tɔ̀ na à toò, yè fɛnɛbe, è bè màà kàjaa tsɛ.
14 Twɛy gè rèè ye ba dzia mòdzian fɛnɛbe tɔ̀ tsuru, Ŋaablà Jaara Modzìàn raa tsììn niì vùn tɔ̀ sapɛ ma do, tɔ̀ fa mùn duɔ̀n fòò fyɛ bo fa bɛy goo reè ɲàn, à to mìn faagoò fa Ŋaablà jaamaa rè ò ? Ŋaablà re Dzi dobɛɛ baraka rɔ̀n, wò rii yè e yɛrɛ siun Ŋaablà ra a ci dzwɛka saaka, fyɛ̀ na ni nìi rà waa.
15 Tɔ̀ kamà, à bàu sòrònfabaa, è dzyèèsìbè ye dɔn ɲe ko Ŋaablà fi. Tɔ fau, kàtsu, mòdzian fìrìgoo nìì reè fau Dzyèèsìbee bɔrɔɔ watsi rɔn, à saunmaà y'à tou, tɔ̀ yeè mɛɛy bo è mà, yè bà Ŋaablà raa. Tɔ̀ tsuru, Ŋaablà na goo dziù dòbɛy niì reè làyiri seòn, à nìì reè kiriɔ, twɛy dzia tɔ̀ tàrà.
16 Àwà, à ma kpadè ci mòdzian saun fyeu, à kɛ̀nsɛɛn ye ba e shɛɛ̀n seun'n kur'la sɛbɛn fa tsuuŋnà, sɛbɛn nee shi na dzia jìì waa.
17 À saunmaà nì shɔ̀ùn, sɛbɛn nee shi dzia jìì. À y'à fabaà to sì rà, à na goo wùbee waa.
18 Tɔ̀ kamà, Ŋaablà ci e ye dzyèèsìbee jɔ̀naà sa wɔ ko mòdzian ka, à tsììn ni ka à fau.
19 Tà doùn, nìi Ŋaablà dzugooma xɔù rèè, twɛy ni sàrìyaa doùn nìi tsuru, Musà è sapɛ karaun mòdzian jaa ra ŋe. Tà shɔ̀ùn, è nìì tòr'làrii reè ko bàkɔ̀r'lèè tsìɛn sen è yu gbiiman tɔ̀ ɲan. Tɔ̀un, è gɔ̀ɔ sɔn naa sààn sen, nìi kir'là Izɔpuku, è sàà suu xèù sen, è tɔ̀ shì tɔ̀ ra, è tɔ̀ ka tsììn nee sɛrɛ sɛrɛ sàrìyaa kìtaabuà mà, à y'à sɛrɛ sɛrɛ mòdzian mà.
20 È dzin ci: «Ŋaabla Dzyèèsìbe riì wɔu ye ka, è bà ci ye y'à latsuù, nèe tɔ̀ tsìɛn nì yɛ nèe.
21 Tà shɔ̀ùn kɔn, è tsìɛn sɛrɛ bùù gba vyamaa mà, ko gè o ge ka Ŋaa blabee faa.
22 È bè Sàrìyaa shi tsɛ, tɔ̀ gè na bɛrɛ nìi na fɛnɛbeè tsìɛn ka waa. Gooɲaantsii reè to na dzia mɛɛy bo mòò vu ra fau'n kuru pɛn na, fɔ tsìɛn yè kon.»
23 Twɛy gè rèè jìrànxɔɔ̀ raa gè rèè ɲɛyn nì. Twɛy ye ba fɛnɛbeè tɔ̀ tsuru, tɔ̀ doùn, à wù jìrànxɔɔ̀ raa rèè yè fɛnɛbe saaka ka, nìi vùn twɛy saaka rèè sapɛ ma.
24 Mòdzian bùù gba vyama niì gbaun e si ka è bà jìrànxɔɔ̀ raà bosi, Ŋaablà Jaara Modzìàn na dɔn tɔ̀ doùn fɛnɛ fɛnɛɛ doùn dɛ, ŋà, à dɔ̀un jìrànxɔɔ̀ raà yɛ̀r'la rìì doùn, è bà tsìiŋnà Ŋaablà jaaterema dòònun, è mùn ne goo rèè jaa boò.
25 Saaka jɔɔndzian dɔ̀ɔn bùù gba vyamaa gàne fɛnɛ fɛnɛɛ doùn ko tsììn ka nìi na à yɛ̀r'la raa waa. À tɔ̀ faa jii sapɛ rii. Ŋà, Ŋaablà Jaara Modzìàn, tɔ̀ na dɔn jaa giri fa mɔn, è bè e yɛrɛ sin saaka waa.
26 È ba na tɔ̀ tsuru, è sen fɔ dziɲaan jɔ̀n bwey, à na nà bà byɛn jaa giri faɔ̀. Ŋà, nèe watsi latan nee ɲan, à nàu, è nà e yɛrɛ sin saaka jaa soo pe rii, sànko è gooɲaan fàan bara.
27 Àwà, mòdzian sapɛ saàn jaa soo pe rii, tà shɔ̀ùn kitsia yè kòmànà wɔ.
28 Tɔ̀ fau'n kuru soo rà, Ŋaablà Jaara Modzìàn sa bàu saaka jaa soo pe rii, è mòdzian rè gooɲaantsiɛ mɛɛy bo è vu ra. À tou è nà e jaa fiira ɲan kɔn. Tɔ̀un, à fa bà gooɲaantsii reè mɛɛy kamà dɛ waa, Ŋà, nìì reè y'à màshua, à nà bà naɔ̀ twɛy rìì tsi.